यू पी ऐं एनसीआर -सिंधी जनसंख्या

इहो आज़मूदो रहियो आहे त जडिहिं बि यू पी -उतर प्रदेश या दिल्ली / न्यू दिल्ली जी सिंधी जनसंख्या जी गालिह निकरे थी त ग़ैर रज़ामंदी सां शुरू थिये थी ऐं तक़रार ते पूरी थिये थी। हालांकि बिन्ही वासिते पंहिंजा पंहिंजा सबब आहिन पर सिंधी जनसंख्या आम अखर आहे।
उतर प्रदेश भारत जो सभ खां वधीक आदमशुमारी, 75 जिलन ऐं सिंधी साहित्य अकादमी वारो राज्य आहे सो इहा आम समझ आहे त भारत में वधि में वधि सिंधी यू पी में रहन था ऐं समझ ई तक़रार जो बुनियाद बणिजे थी।
पोयन लगभग ट्रिन खां चैयन सालन खां वठी असां उतर प्रदेश जे सिंधी समाज बाबत जाण हासिल करण जी कोशिश करे रहिया आहियूं पर हिन वक़त तायीं 52 शहरन /गोठन जी जानकारी हासिल करण में कामियाब थिया आहियूं। जीयं त असां सोशल मीडिया वसीले कोशिश करे रहिया आहियूं सो इहा अज़ब जी गालिह न आहे। असां खे जेका जानकारी हासिल थी उन जे आधार ते
1) आम तोर हर शहर / गोठ में सिंधी जनसंख्या हिक हज़ार खां घटि आहे।
2)जिन शहरन / गोठन जो तादाद काफी वडो आहे जिते सिंधी जनसंख्या ट्रिन हज़ारन खां घटि आहे।
3) ट्रिन हज़ारन खां वधीक पर डहन हज़ारन खां घटि सिंधी जनसंख्या वारा शहर बेहद घटि आहिन।
4) के थोरा शहर आहिन जिते सिंधी जनसंख्या डहन हज़ारन खां वधीक आहे।
5) सिर्फ आगरा ऐं लखनउ जी सिंधी जनसंख्या हिक लख जे आसपास आहे त कानपुर जी पंजिहतर हज़ार जे वेझो ऐं वारणसी जी सिंधी जनसंख्या ट्रीहन हज़ारन खां बि वधीक आहे। राज्य जी कुल सिंधी जनसंख्या जेका सत लख थियण बि मुशकिल महसूस थिये थी तंहि जो 40 % इन्हन शहरन में रहे थो।
सोशल मीडिया जी मदद सां जानकारी हासिल करण सबब अंगन में बदिलाव अचण मुमकिन आहे। सिंधी पंचायतूं संस्थाउं सही जानकारी मोकिले सहयोग कंदा इहा उमीद रखिजे थी।
सिंधियत सुहिणी रहे
एस पी सर (मंघिरमलानी) कोल्हापुर