title here
सिंधु नदी सां वाक़फ़ियत Introduction of Sindhu River
सिंधी समाज जे जीवन में सिंधु नदी ऐतिरी अहमियत रखे थी जो भारत में जेके कुझु थोरियूं सिंधी फिल्म्स ठहियूं आहिन उन्हन मां हिक कामियाब फिल्म आहे सिंधुअ जे किनारे। जेके चार इंसानी सभ्यताउं मेसोपोटामिया, इजिप्ट (मिस्र), सिंधु घाटी सभ्यता ऐं चीन सभ खां पुरातन लेखियूं वेंदियूं आहिन उन्हन मां सिंधु घाटी सभ्यता सिंधु नदी जे किनारे जी इंसानी सभ्यता आहे मतलब इहा सभ्यता तोड़े सिंधु नदी सिंधी कौम जे इतिहास में बेहद अहमियत वारी जगह रखन था।
सिंधु नदी जी सिंधी समाज लाय ऐतिरी अहमियत आहे जो सिंधी कौम चाहे सिंध छडे अची भारत में थाईंकीं थी आहे पर सिंधु नदी सां सिंधी कौम जो लागापो अजु बि कायम आहे। हर साल लेह लदाख में थियण वारो सिंधु दर्शन मेलो या उत्सव इन गालिह जो सबूत आहे त सिंधु नदी न सिर्फ ज़मीन ते वहे थी पर उहा हर सिंधी जे सरीर में वहन्दड रत में बि समायल आहे।
कराची पारि करे अरबी समुन्ड में वञी मिलण वारी सिंधु नदी जी शुरुआत देवन जे देव महादेव जो घरु लेखियो वेन्दड कैलाश परबत जी मानसरोवर झील जी वेझडाई वारी ऐराजीअ मां थिये थी। मानसरोवर झील जो इहो नालो संस्कृत जे बिन अखरन मानस ऐं सरोवर खे मिलाये ठहियल आहे। असां जो हिन्दु धार्मिक विशवासु चये थो त हकीकत में इन झील जो जन्म पहिरियूं सृष्टी जे सृजनकर्ता ब्रह्मा जे ज़हन में थियो हुओ ऐं पोइ इहा धरती ते नज़र आयी। हिन्दुन जो विशवासु आहे त मानसरोवर झील जो जलु पियण वारे खे मौत खां पोइ शिव जे लोक में स्थान मिलन्दो आहे।
सिंधु नदी जो सफर
तिब्बत जे हिमालय जबल मां डखण रुख में वहण जी शुरुआत करण वारी सिंधु नदी 3180 किलोमीटर जो पंहिंजो सफर पूरो करे अची अरबी समुन्ड में मिले थी। लदाख ऐं काश्मीर घाटी जे गिलगत – बाल्टिस्तान मां थींदे पाकिस्तान में दाखिल थिए थी। पंहिंजे इन सफर जे दौरान सिंधु नदी हिमालियन, हिन्दु कुश ऐं काराकोरम रेंज जी 4,53,000 चौरस किलोमीटर मिलाये कुल 11,65,000 चौरस किलोमीटर ऐराजी में सावक आणे थी। सिंध जेतोणोकि पूरी पुनी बरसात वारी ऐराजी आहे तहिं हूंदे बि पुरातन समे खां वठी सिंध जे सब्ज़ साये ऐं खेती में अगिरो हुअण सिरफु सिंधु नदी सबब मुमकिन हुओ। अज़ु बि इन ऐराजी जे फसलुन जो मदार भारत मां वही अचण वारे सिंधु जल ते आहे।
संस्कृत जे हिसाब सां डिसजे त सिंधु जो अरथु सागर थिए ऐं असां जा पुरुखा पिणु सिंधु नदी न पर सिंधु दरियाह चवन्दा हुआ। अजु बि डिसजे त सालानो सरासरी पाणी जे वहकरे जे हिसाब सां सिंधु नदी दुनिया जी वडी नदिन में शुमारी वेंदी आहे। सिंधु नदी में पाणी जे वहकारे जी रफ्तार लगभग 243 क्यूबिक किलोमीटर आहे जेको नील नदी जे वहकारे जी बीण जेतिरी आहे।
सिंध जे जीवन ते असर
सिंधु नदी खे महानद पिणु चयो वेन्दो हो ऐं नदिन जो पिता लेखियो वेन्दो आहे। लदाख में त सिंधुअ खे जंस्कर नदीअ जो साथु मिले ई थो पर सिंध जी भरवारी ऐराजी खे जिन पंजन नदिन जे करे पंजाब नालो मिलियो उहे पंज नदियूं चिनाब, झेलम, रावी, ब्यास ऐं सतलज़ अची सिंधु में मिलन थियूं। सिंधु नदीअ सबब सिंध न सिरफु पोख जी पैदायिश करे मालामाल थियो पर सिंधु में जेके लगभग 180 किसमन जूं मछियूं (22 त अहिड़े किसम जूं जेके बियो किथे न थियूं मिलन ) जे सबब सखर, थठो ऐं कोटरी मछी जे वापर जा वड़ा मरक़ज़ बणिजी पिया। सिंधी कौम मछीअ जो जेको किसम शौंक सां खाये थी ऐं जंहिखे पंहिजे इष्ट देव झूलेलाल साईं सां जोड़े थो उहो पलो बि सिंधु नदी में मिलन्दड मछिन में शामिल आहे।
वेदन में भारत जी पवित्र मंञी वेन्दड गंगा नदी खां (2 भेरा) वधीक भेरा सिंधु (30) जो ज़िकर हुअण तोड़े ऋग्वेद जे नदी स्तुती शिलोक में सिंधु जो शामिल हुअण इन गालिह जो सबूत आहे त सिंधु नदी वैदिक जुग में बि मौजूद हुयी।
हीउ लेख द सिंधु वर्ल्ड डॉट कॉम जे प्रोजेक्ट *सिंधियत* हेठि एस. पी. सर (मंघिरमलानी) कोल्हापुर लिखियो आहे। लेख जो या कन्हि हिसे जो कन्हि बि नमूने वरी उपयोग करण खां अगु लेख़क जी रज़ामंदी वठणु ज़रुरी आहे।
Posted on 07 फरवरी 2021