गोप कमल

गोप आसूदोमल दरयानी जो जनम 09 नवंबर 1948 में उतरप्रदेश जी मेरठ ऐराजी जे हिक नंढे गोठ में थियल आहे पर हुन पहिंजे विद्यार्थी जीवन तोड़े कामकाज़ी जीवन जा शुरुआती साल पुणे महाराष्ट्र में गुजारिया आहिन। मतलब गोप कमल हिकु अहिड़ो सिंधी साहित्यकार आहे जेको न सिरफ भारत में जावल आहे पर जहिं पढ़ायी लिखायी बि भारत में थी आहे। पुणे में गोप सेंट मीरा स्कूल (सिंधी माधियम) जो विद्यार्थी हुओ जिते श्री राम शर्मा खेसि सिंधी भाषा ते धियान डियण वासिते हिमथायो। विद्यार्थी जीवन में बि गोप कमल केतिरो आज्ञाकारी ऐं ज़हीन हुओ इन गालिह वासिते इहो लिखण ई काफी आहे त श्री राम शर्मा जे अखरन जो इहो असर थियो जो गोप एस एस सी इम्तिहान में सिंधी विषय में सजे महाराष्ट्र में पहिरियों नंबर आयो। स्कूली तैलीम हासिल करण खां पोय हुन M.E.S (मिलेट्री इंजीनियरिंग सर्विस) सां गडु सिविल इंजीनियरिंग जी पढ़ाई कयी। 1970 में गोप कमल खे पुणे में ई एयर फ़ोर्स में नोकरी बि मिली वयी।

स्कूली डीन्हन में हिकु भेरो संदस किलास जे साथी विद्यार्थिन गोप खे गडु खेड़ायिण खां इंकार कयो इन गालिह जो गोप खे बेहद ऐं ऐतिरो गहिरो सदमो पहुतो जो हुन प्ले ग्राउंड जे वञण जी जगह ते इहो वकतु स्कूल जी लायबिररी में गुजारिण जो फेसिलो कयो। इहा शुरुआत हुयी गोप कमल में पढ़िहण जी आदत पवण जी। खेसि जेको बि पढ़िहण जोगि मिलियो हुन सभु पढियो वेन्दे उर्दू जा शायरी जा किताब तोड़े नॉवेल हालांकि हुन कडिहिं बि रीतसर उर्दू भाषा सिखी कोन हुयी। इन पढ़िहण जी आदत धीरे धीरे गोप खे लिखण जो होसिलो डिनो ऐं जडहिं इन बिज वण जो रुप अख्तियार कयो त गोप खे इन ओज ते पहुचाये छडियो जो हुन 2014 में साहित्य जो वड़े में वड़े अवार्ड सिंधी भाषा जो साहित्य अकादमी अवार्ड हासिल करण में कामियाबी हासिल कयी।

गोप खे पाण खे ई इहा खातिरी कोन हुयी त अदबी लिहाज खां संदस लिखियल कविता पूरी तरह सां सही आहे या न पर जीयं त स्कूल जा बिया विद्यार्थी साराह कंदा हुआ ऐं कविता लिखण गोप खे साथियिन जी ताजो जो मरकज़ बणाए छडियो हुओ तहिं करे हुन कविता लिखण जारी रखण सां गडु कहाणियूं लिखण बि शुरू कयी। इन दोरन हिक सिंधी पत्रिका पुणे मां छपिजण शुरू थी जहिं में 1964 में संदस पहिरियीं कविता छपिजी। इहो त गोप खे नामवर मकबूल सिंधी अदबी शख्सियत एम कमल (मूलचंद मंघाराम बिंदरानी) सां मिलण खां पोय समझ में आयो त सिंधी कविता लिखण जी हकीकत मायना रीत छा आहे। एस कमल खेसि न सिर्फ सिंधी कविता जे अलग अलग उफ़क़न बाबत बुधायो पर सिंधी कविता लिखण जी बारीकुन बाबत पिणु सेखारियो। इहो शायद पहिंजे मेंटर एस कमल जे नाले जो असर आहे जो गोप आसूदोमल दरयानी कमल तख़ल्लुस कमि आणिण लगो।

1976 में गोप खे दुबई मुनिसिपालिटी में सिविल इंजीनियर जो कमु मिलियो जेको हुन जुलाई 2017 तायीं कयो। रियाइशी जगह में आयल इहो बदिलाव गोप जे हिक सिंधी कवी, सिंधी साहित्यकार जे रूप में जीवन सफर जी शुरुआत साबित थियो। हालांकि इहो सचु आहे त दुबई जी नोकरी खां अगु ई 1973 में गोप कमल जो पहिरियों किताब – हिकु सिंधी नॉवेल – ज़िंदगी ऐं चार डीन्ह छपिजी चुको हुओ ऐं 1981 में सिंध पाकिस्तान में इन किताब जो वरी छपिजण गोप कमल जी अदबी सलाहियतुन जो सबूत आहे। दुबई में उन समे वासुदेव मोही जहिड़े मकबूल सिंधी कवी अदबी बेठकुन जे सिलसिले जी शुरुआत कयी। इन्हन बेठकुन में डॉ मोती प्रकाश, कला प्रकाश, मोहन गेहानी ऐं गोवरधन शर्मा घायल जहिड़ा नामवर शिरकत कंदा हुआ। सिंधी कहाणी, नॉवेल, अदबी तनक़ीद ऐं आज़ाद कविता लिखण वारे गोप कमल खे इन्हन अदबी बेठकुन में शामिल थियण सबब साहित्य जी सभ खां पसंदीदा पर डुखी सिन्फ़ ग़ज़ल बाबत बेहद अहम गालिहियूं समझण ऐं सिखण जो वझु मिलियो। दुबई वञण जे लगभग 12 सालन खां पोय 1988 में गोप कमल जो पहिरियों सिंधी कविता संग्रह सरिहदुन ते गुल छपिजियो त संदस पहिरियों सिंधी ग़ज़ल जो किताब छांव वेढियल जिस्म 2009 में छपिजियो।

जेकडहिं गोप कमल जे अदबी सफर जो ज़ायज़ो वठिजे त समझ में अचे थो हिन अदल सिंधी कहाणी ऐं नॉवेल लिखण सां हिक सिंधी लेखक जे रुप में शुरुआत करे सिंधी कविता जे उफ़क़ खे खुशनुमा रंगन सां सजाये हिक बेहतरीन ऐं ज़हीन सिंधी ग़ज़ल रचनाकार जो रुतबो हासिल कयो आहे। इहो सिंधी ग़ज़ल लिखण में गोप कमल जी महारत ऐं ज़हनियत जो सबूत आहे जो खेसि सिंधी ग़ज़ल संग्रह सिज अगियां बुकु वासिते 2014 में सिंधी भाषा वासिते साहित्य अकादमी अवार्ड सां नवाज़ियो वयो।