गोवरधन भारती

सिंधी शायर – लेखक – गायक – नाटकनवीस – साहित्य अकादमी अवार्ड – शीशे जा घर – सिंधी फिल्म- होजमालो
सिंधी अदब जे नामवर शायर,1990 जे सिंधी भाषा वासिते साहित्य अकादमी अवार्ड सां नवाज़ियिल फेमस लेखक, गायक ऐं नाटक नवीस श्रो गोवरधन भारती जो जन्म 13 जनवरी 1929 ते सिंध जे हिक नंढडे गोठ [आराज़ी] में मास्तर आसूमल महबूबानी जे घर थियो थो। सिंधी फिल्म होजमालो ऐं शल धीउर न जमन में अदाकारी जो ज़लवो डेखारीन्दड, सिंधी साहित्य जी हिन मकबूल शख्सियत, खास करे सिंधी नज़म जे उभ में पहिंजी चमक सां रोशनी फैलाईंदड “भारती ” जो छटीअ जो नालो त गिरधारी हो पर हू गोवरधन जे नाले सां मशहूर थियो। स्कूल में बि इहो मतलब गोवरधन आसूमल महबूबानी नालो लिखायो वियो हुयुस।

गोवरधन भारती जी हयाती इन गालिह जो मिसाल आहे त ज़ाहिर नुकिसानकार गालिह में बि वड़े फायदे जे गालिह लिकियल थी सघे थी। मैट्रिक जो इम्तिहान पास करण खां पोय भारती जडहिं भारतीअ हैदराबाद जे हिक स्कूल में ड्रामा सिखण जी मुराद खां दाखिला वरती त कुछ ही महीनन में ऐतिरो बीमार थी पियो जो डाक्टरन खेस नाच ऐं संगीत खां परे रही बिसतिरे ते आराम करण जी सलाह डिनी। लाहौर में भाउ जे घर बिसतिरे ते आराम कन्दे हिन जो वकत, टैगोर, प्रेमचंद, सुदर्शन ऐं बियन आला दरिजे जे अदीबन जूं रचनाउन जो अभ्यास कन्दे गुजारे पियो। इन गालिह भारती जे अंदर में मौजूद अदबी सलाहियत जे बिज खे पाले पोसे हिकु वडो शानदार वणु बणायो जहिं सिंधी साहित्य जे बाग़ खे महकाये छडियो।

गोवरधन भारती जी हयाती काफी लाहिन चाडिहिन वारी रही आहे। घर में गीत संगीत ऐं नाटक जो माहोल हो सो नंढी उमर खां ई भारती में इन्हन खेतरन में चाहु पैदा थियण का ग़ैर कुदरती गालिह कोन हुयी। पहिंजे गोठ जी स्कूली ज़िन्दगीअ वारे अरसे खां वठी हिन इन तरफ पहिंजियूं सलाहियतूं ज़ाहिर करण बि शुरू कयूं हुयूं। पहिरियें दरिजे में हूंदे यक़तारे ते सूफी कलाम गाये हिन सभनी खे अज़ब में विझी छडियो हो। हैदराबाद में बि हाय स्कूल में पढ़ायी जे दौरान नाटकन में बहरो वठन्दो रहियो। इन दौरान हू नाटकन में आमु स्त्री किरदार अदा कन्दो हो पर हुन जी अदाकारी अहिडी पुरसोज हून्दी हुयी जो चाहे तारामती हुजे या मूमल डिसन्दडन खे अहसास ई कोन थीन्दो हो त इहो किरदार हिकु छोकरो निभाये रहियो आहे।

1946 में जडहिं हिन सजी सिंध में बियो नंबर अची मैट्रिक जो इम्तिहान पास कियो त पिता आसूमल जी चाहत हुयी त गोवरधन डॉक्टरी या इंजीनियरिंग जी उचे दरिजे जी तैलीम हासिल करे। बिये पासे भारती जे वड़े भाउ जो रायो हो त संदस अंदर जे कलाकार खे वझु डिजे जीयं अगते हली गोवरधन नृत्य कला में माहिर या आला दरिजे वारो चित्रकार बणिजे।

भारत लड़े अजमेर अची रहण जो शुरुआती दोर बि काफी तक़लीफ़ुन भरियो रहियो छो जो हिन पहिरियूं हाय स्कूल जे मास्तर जो कमु कियो ऐं पोय रेलवे में क्लिर्क जी नौकरी करण लगो। नौकरी कन्दे गोवरधन महर्षि दयानंद नाईट कॉलेज में पढ़ायी कयी ऐं 1953 में आगरा यूनिवर्सिटी मां हिंदी, अंग्रेजी, इकनॉमिक्स ऐं पोलिटिकल साइंस इहे विषय खणी B.A. जी डिग्री हासिल कियां ई। अगते हली हुन पंजाब यूनिवर्सिटी मां प्रभाकर जो इम्तिहान बि पास कियो। हिन दौरान बि संदस तन्दुरिसिती पूरो साथु कोन पयी डिये सो हू बिना शादी कये भाउरन जे घरन में रहंदो हो। हुन हिक किसम सां पाण खे सिंधी साहित्य जी सेवा वासिते अर्पण करे छडियो हुआयीं। सिंधी साहित्य जे मुख़तलिफ़ दायरन , नज़म, शायरी, नाटक ऐं फिल्म जी स्क्रिप्ट लिखण वगैरह में पहिंजियूं रचनाउं रचिण सां गडु गोवरधन भारतीअ साहित्य अकादमी जे सिंधी एडवायजरी बोर्ड जे ऐं राजस्थान सिंधी अकादमी जे मेंबर तौर कमु करे बि सिंधी साहित्य जे वाधारे में बेशकीमती योगदान डिनो आहे।

सिंधी अदबी दुनिया में गोवरधन भारती खे बुनियादी तौर अहिड़ो कवी लेखियो वेन्दो आहे जेको गायिण में बि महारत रखे थो। वधीक सही अखर कमि आणिजन त हीउ साहिब कवी खां वधीक गीतकार हुओ। कहिं समे त भारत में आज़ादी खां पोय ठहियल उहा सिंधी फिल्म गोलिहिण डुखियो हुओ जहिं जा गीत गोवरधन भारती न लिखिया हुजन। अज़ु बि जेके सिंधी लाड़ा भगवंती नावांणी ऐं सतराम रोहिड़ा जी आवाज़ में बुधउं था तिन मां केतिरा ई हिन जा लिखियल आहिन।

1990 में “शीशे जा घर” वास्ते मिलियिल साहित्य अकादमी अवार्ड बि इन जी पुठिभरायी करे थो त सिंधी अदब वास्ते हिन जो योगदान बेमिसाल लासानी हुओ। गोवरधन भारती खे उमर मारवी ऐं बिगडियील घर जहिडन वडन नाटकन, तूफानी राति ऐं इज़्ज़त जहिडन हिक अंकी नाटकन लिखण ऐं हिंदी तोड़े सिंधी में अटकल वीह नाटक पहिंजी हिदायतकारी हेठि पेश करण जो जसु हासिल आहे। केतिरन नाटकन ऐं फ़िल्मुन में हिन पहिंजी अदाकारी जो ज़लवो बि डेखारियो आहे जिनमे शामिल आहिन “होजमालो ” ऐं “शल धीउर न जमन ” वगेरह। पंहिंजी लेखणी सां सिंधी साहित्य खे मालामाल करण वारे गोवरधन भारती जो 22 जून 2010 ते सुरगवासु थियो।