हरीकांत जेठवानी

सिंधी साहित्य जी दुनिया में हरीकांत जेठवानी खे सिंधी कविता लिखण जे पुराणे तरीके या रिवायती सिंधी कविता जो पुजारी लेखियो वेन्दो हालांकि संदस अदबी सफर जे दौरान खास करे 1960 वारे डहाके धारे सिंधी साहित्य में नयीं कविता जो काफी गहिरो असर नज़र अचे थो। हरीकांत पहिंजी कविताउन तोड़े कहाणिन में सियासी तंज, सियासतदानन जे कम करण जी रीत ऐं आम माणुहू जो चित्र उकेरिण वासिते नामवर रहियो आहे।

05 सितम्बर 1935 ते, जेको डींहुं भारत में टीचर्स डे तौर मलिहायो वेन्दो आहे, नानाणे घर जेकबाबाद सिंध में जन्म वरतल हरीकांत जेठवानी जी हयाती ते नज़र विझण सां ब गालिहियूं चिट्री तरह सामहूं अचन थियूं। हिकु संदन तैलीम हासिल करण जो शौंकु ऐं बियो संदस ज़िन्दगी में खानाबदोशी जो दोरन जो चंगा भेरा दाखिल थियण। जन्म खां वठी संदस दिल्ली में आकाशवाणी में नौकरी करण तायीं, जहिं नौकरी मां हरीकांत 1993 में रिटायर थियो, संदस हयाती में खानाबदोशी जे दोरन जी हुकूमत रही आहे। हरीकांत जे पिता रूपचंद ऐं डाडे कीमत राय जे सरकारी नौकरी में हुअण करे कुटुंब खे तबादिलन (transfer) सबब हिक खां बी जगह पियो घुमणो पवन्दो हो। हरीकांत जी उमिर बिन साल जो अरसो बि पूरो कोन कियो जो संदस माता जो स्वर्गवास थी वियो ऐं हुन खे पहिंजन चाचान जे घर ऐं नानाणे में कडहिं हिते कडहिं हुते रही बालपणे जो शुरुआती अरसो गुजारिणो पियो।

1947 में मुल्क जे विरहांङें सबब कुटुंब भारत लड़े अची राजस्थान जे अजमेर शहर में रहण लगो। हरीकांत जी ज़िन्दगीअ में भटकण जे दोर न ते वकती पाबन्दी आयी। अजमेर में हरीकांत गवर्नमेंट हाय स्कूल जे विद्यार्थी तोर मैट्रिक जो इम्तिहान पास करे हुन सरकारी खाते में तरजुमो करण जो कमु शुरू कियो। संदस कमु हो सिंधी अखबारुन रिसालन में छपियल लेख ऐं एडिटोरियल जो अंग्रेजी में तरजुमो करे ओहदेदारन खे मोकिलिण। इन दौरान हुन पंजाब यूनिवर्सिटी मां बी. ए. ऐं हिन्दी साहित्य सभा प्रयाग जो साहित्य रतन इम्तिहान पास कियो। पहिंजी तैलीमी पियास सबब हुन अजमेर जे गवर्नमेंट कॉलेज में एल एल बी वास्ते दाखिला वरती पर ज़िन्दगी में आयल नयें खानाबदोशी जे दोर सबब हिक साल जे अंदर ई खेसि अजमेर छड़े दिल्ली वञणो पयो।

दिल्ली में सरकार जे व्यापारी खाते में नौकरी कन्दे हरीकांत M.A. वासिते दिल्ली यूनिवर्सिटी में दाखिला वरती पर सिर्फ बिन सालन में नौकरी तोड़े पढ़ाई बयी छड़े वेठो ऐं काफी अरसो हिक या बी अटकल 8 -10 नोकरियूं करे गुजारियो। इन दौरान 1962 में संदस शादी M.A. पास नौकरी कन्दड़ राधा सां थी।

हरीकांत जेठवानी पहिंजे अदबी सफर जी शुरुआत हिक ई वकत बतौर कवी ऐं कहाणी लेखक तौर कयी। संदस लिखियिल पहिरियीं कविता “भटकन्दड रूह ” ऐं कहाणी “पटेवालो” अजमेर जे अख़बार हिन्दु में छपिजियूं। काफी अरसे तायीं हिन जूं रचनाऊँ हिंदवासी, ज्वाला, कलाकार, कुमारी, ज़िन्दगी ऐं बियन अखबारुन ऐं रिसालन में छपजंदियूं रहियूं। संदस कविताउन जो पहिरियों किताब 1961 में छपजियो हो।

1991 में पहिंजे किताब “सोच जूं सूरतूं” वास्ते अकादमी अवार्ड हासिल कन्दड़ हरीकांत जेठवानी खे 1980 में तैलीमी खाते बि संदस सिंधी ड्रामा जे किताब “फैलजन्दड रेगिस्तान” वासिते अवार्ड डिनो हो। सिंधी साहित्य जगत तोड़े सिंधी साहित्यकार इहो बुधी हिक किसम सां बे आवाज़ थी वया त 08 मई 1994 जे डीन्ह ते उमिर सजा सठि साल पूरा करण खां बि अगु हरीकांत जेठवानी जो पहिंजे घर दिल्ली में सुरगुवास थियो।

पंहिजे लगभग बिन डहाकन जे साहित्यिक सफर में हरीकांत जेठवानी सिंधी कविता, सिंधी कहाणियूं, सिंधी ड्रामा, तनक़ीद वगेरह साहित्यिक सिंफ़न में कुल मिलाये 14 किताब लिखिया आहिन। जिन में 5 कविताउन जा, ब कहाणिन जा, हिकु हिंदी कविता, हिकु तरजुमो [हिक सपने जी मौत] ऐं कुछ तनक़ीद ऐं सिंधी ड्रामा जा आहिन। हिन जो लिखियल नाटक मुखे कुंवार खपे संदस मौत खां पोय खटराग उनवान सां किताब जे रूप में छपजियो आहे।