हरीश वासवानी

कुदरती नज़ारन जे शौकीन हरीश वासवानी खे कुदरत खे पहिंजन अखरन जे रूप में उकेरिण में महारत हासिल हुयी। १९६२ में नयीं दुनिया में छपियल “मुस्कराहट” नाले कहाणी खे हरीश वासवानी जे साहित्यिक सफर जी शुरुआत करे लेखिजे थो पर थोरे ई अरसे में सागी मैगज़ीन में छपियल कविता “सभ्यता” अहसास करायो त हुन खे कविता में वधीक महारत हासिल आहे।

हरीश वासवानी जे पहिंजे चवण मूजिब साहित्यिक रचना उहो सिरजनातमक कमु आहे जेको असां जे पहिंजे अंदुरुनी संसार में वापिसी जे सफर सबब, पहिंजो पाण जे हकीकी रूप खे समझण जे अहसास सां भावनाउन जे उफान सां शुरू थियो थो। आम तोर दुनिया भावनाउन जे इन्हन वहकरन खे कविता कोठे थी। जेकडहिं हरीश वासवानी जे समूरे जीवन खे नज़र सामहूं रखूं त हिन जे अदबी सफर जी शुरुआत न त कविता सां थियिल आहे न कहाणी सां। छो जो B.A. जो विद्यार्थी हून्दे हुन नामवर हिंदी कवी जय शंकर प्रसाद ते हिकु लेख लिखियो हो जो दरअसल हिक तनक़ीद हुओ। इहा तनक़ीद, नुक़तचीनी ऐं छंड छाण अगते हली हरीश वासवानी जी लेखणी जो अहम ऐं ताकतवर हिसो बणिजी।

हरीश वासवानी जी कविताउन जे पहिरियें किताब “चालीह – छाहतर” जो उनवान ई संदस सिरजनातमक बुद्धि ऐं बियन खां अलग राह वारो डेखारिण जो मिसाल आहे। हिन जो जन्म 1940 में थियल आहे सो बियन खे पहिंजो जन्म साल याद करायिण वास्ते हिन इहो खास तरीको कमि आन्दो। 1987 में सिंधी भाषा में लिखियल जहिं किताब वासिते हरीश वासवानी खे साहित्य अकादमी जे मानवारे साहित्य अकादमी अवार्ड सां नवाज़ियो वियो तहिं सिंधी किताब जो उनवान बि “चालीह चोरासी” हुओ।

हरीश वासवानी खे कविता ऐं कहाणी लिखण जेतिरी ई महारत नुक़तचीनी ऐं छंड छाण में बि हुयी ऐं बतौर तनक़ीद कार हुन केतिरा असरायिता लेख ऐं किताब बि लिखिया आहिन। संदस किताब चालीह चौरासी अहिड़न डहन मजमूनन जो मेडु आहे। इन्हन डहन लेखन मां चार कहाणिन सां, ट्रे कविताउन सां, ब नॉवेल सां ऐं हिकु नाटक सां लागापो रखे थो। इहो किताब साबित करे थो साहित्य हर खेतर में हरीश वासवानी खे महारत हासिल हुयी। हिन जेके ब नॉवेल चूंडिया हुआ से “पियार जी पियास” लेखक गोबिन्द माल्ही ऐं “मुहिंजी आत्मा जो मौत ” लेखक लाल पुष्प जहिड़न नामवर ऐं मोतिबर अदीबन जा हुआ। इहा धियान में आणिण जोग गालिह आहे त गोबिन्द माल्ही ऐं लाल पुष्प, हरीश वासवानी खां अगु अकादमी अवार्ड हासिल करे चुका हुआ।

हरीश हंसराज वासवानी जो जन्म बलूचिस्तान जी पहाड़ी ऐराजीअ में लोर इल्लाई गोठ में 22 नवम्बर 1940 ते थियो हो। मुल्क जे विरहांङें सबब भारत लड़े अचण वकत संदस उमिर अठ साल हुयी पर हिन जो कुटुंब धंधे जे लिहाज खां बेहतर ऐं वधीक मुनासिब जगह जी गोलिहा में जूनागढ़, आगरा, अजमेर, दिल्ली ऐं कुछ बियन शहरन में घुमन्दे घुमन्दे आखिर 1959 में गांधीधाम अची आदिपुर में थायीन्को थियो। इहो शायद त हरीश वासवानी जी सियाणप जो असर आहे जो विरहांङें जे तक़लीफ़ुन सां सरोबर ऐं भारत में अटकल डहन सालन जी खानबदोश ज़िंदगीअ जे आज़मूदन खे हुन पंहिंजी अदबी सिरजनातमक सलाहियतुन खे सींगारिण ऐं सजायिण वास्ते घुरिबल बाहि जे रूप में कमि आन्दो।

हरीश वासवानी जी सियाणप, हर हुनरी शख्सियत, सिंधी अदब में नयीं कविता ऐं नयीं कहाणी जी रिवायत जी शुरुआत करण जी सलाहियत ऐं अदबी क़ाबिलियत जो अहसास करण वासिते, साहित्य अकादमी पारां हरीश वासवानी ते रखियल परिसंवाद में सिंधी साहित्य जे मोतिबर अदीबन जे गालिहायिण जे विषयन ते नज़र विझण ई काफी आहे।

शेफाली वासुदेव: – मुहिंजो पीउ मुहिंजो दोस्त – सिरजनातमक लेखक ऐं शख्सियत
अमित बोदनी : हरीश वासवानी जी सियाणप ऐं हुनरी शख्सियत में मौजूद बिकुंड़ा तत्व
वासुदेव मोही: हरीश वासवानी जी कविता जूं खूबियूं ऐं खामियूं
कीर्ती खत्री : हरीश वासवानी बतौर कॉलम लेखक
डॉ कमला गोकलानी: हरीश वासवानी जूं कहाणियूं
डॉ विम्मी सदारंगानी: धारा कॉलम – रचना मैगज़ीन में छपिजन्दड हरीश वासवानी जो कॉलम
मोहन हिमथानी: हरीश वासवानी जी कविता जी लेबोरेटरी टेस्ट