हीरो शेवकानी
Introductory / TSW Citation
फेमस सिंधी लेखक – सिंधी साहित्य – साहित्य अकादमी अवार्ड 2008 – सिंधी लेक्चरर
हीरो शेवकानी सिंधी अदबी आकाश जे उन्हन विरलन परिन्दन मां हिकु आहे जेके पंहिजे परवाज़ सां अदबी आकाश खे रोशन कन्दे पंहिजे वासिते नंवंन उफ़क़न जो सिरजन कनि था। हिक तैलीमदान – उल्हासनगर जे आर के तलरेजा कॉलेज जे प्रिंसीपल – तोर सिंधी भाषा जे वाधारे में योगदान डियण वारे हीरो शेवकानी सिंधी साहित्यिक संसार खे अदबी नुक़तचीनी जे नयें तरीके जी वाकफियत डीन्दे नुक़तचीनी जे नयें उफ़क़ जो सिरजन कयो। इहा सिंधी साहित्य जी ख़ुशक़िसमती जो इन दोर में हरीश वासवानी बि इन सागे रुख में योगदान करे रहियो हुओ। समूरो सिंधी साहित्य जगत हीरो शेवकानी जी सियाणप सां न सिर्फ मुतासिर थियो पर संदस सिरजन जो त शैदायी थी पयो। पंहिंजी सिरजनातमक रचनाउन खां सिवाय हीरो शेवकानी हिक तरजुमेकार तोर श्री एल एक अजवानी जे अंग्रेजी में लिखियल History of Sindhi Literature जो सिंधी भाषा में “सिंधी अदब जी तारीख ” जे रूप में तरजुमो करे सिंधी साहित्य खे बेमिसाल सूखड़ी डिनी।
बायोग्राफी - हीरो टीकमदास शेवकानी
हीरो शेवकानी, आर के तलरेजा कॉलेज उल्हासनगर जो माज़ी प्रिंसीपल, अकादमी अवार्ड सां नवाज़ियिल फेमस सिंधी लेखक ऐं सिंधी अदबी दुनिया जी नामवर नुक़तचीनी [Critic] कन्दड़ शख्सियत आहे। हीरो शेवकानी खुशनसीब आहे छो जो झूलेलाल साहिब जी सरज़मीं थठो जे वेझो गोठ चूहड़ जमाली में 06 जनवरी 1935 ते हुन जो जन्म थियो हो पर इहा झूलेलाल साहिब जी जन्म भूमी ते जन्म वठण जी खुशनसीबी घणो वकत कानि रही छो जो मुल्क जे विरहांङें सबब संदस कुटुंब खे मज़बूर थी लड़े भारत अचिणो पियो। छहें दरिजे जे शागिर्द -जहिं जा पेर हर हर दुख गुसे ऐं लाचारी जे अहसास सां भरियल दिल जो बारु न संभाले सघण जी फरियाद पिया कनि – लाय इहो आज़मूदो केतिरो न दुखदायी हून्दो इन जो अंदाज़ लगायिण बि सवलो न आहे।
जहिं रचनात्मक खूबी वास्ते हीरो शेवकानी सिंधी अदबी दुनिया में मशहूर आहे दरअसल में उन खूबी जे वधण वसण जी बुनियाद बि उन विरहांङें जे दौर में ई रखजी वयी हुयी। हीरे इन्हन डुख भरी यादुन खे पहिंजी सिरजनातमक बाहि खे वधीक तेज़ करण वासिते जलाउ पदारथु ( ईंधन- fuel) तोर कम आन्दो। संदस कुटुंब अहमदाबाद में रहण जो फेसिलो कियो ऐं साल 1961 में हीरे शेवकानी गुजरात यूनिवर्सिटी में फर्स्ट किलास फर्स्ट अची B.A. (आनर्स)]जो इम्तिहान स्पेशल सिंधी विषय खणी पास कियो। 1963 में M.A. जी डिग्री हासिल करण खां अगु ई हू अहमदाबाद जे कॉलेज में सिंधी लेक्चरर जे ओहदे ते नौकरी करण शुरु करे चुको हो।
साल 1968 में हीरो शेवकानी उल्हासनगर जे मशहूर आर के तलरेजा कॉलेज सां बतौर सीनियर लेक्चरर [सिंधी] जुड़ियो ऐं 1995 में कॉलेज जे प्रिंसीपल जे ओहदे तां रिटायर थियण तायीं जुड़ियो रहियो। वक़त जे इन अरसे में हुन सिंधी लेक्चरर खां सिवाय बियन केतिरन ओहदन ते रहन्दे सिंधी बोली ऐं सिंधी साहित्य जी सेवा कयी। इन दौरान हीरो शेवकानी जिन ओहदन ते रहियो तिन मां के अहमियत वारा ओहदा: –
1981 – मुम्बई यूनिवर्सिटी में सिंधी विषय में Ph. D. जो गाइड
1985 – मुम्बई यूनिवर्सिटी जे बोर्ड ऑफ़ स्टडीज इन सिंधी जो चेयरमैन
1986 -1995 महाराष्ट्र स्टेट बोर्ड ऑफ़ सेकंडरी एंड हायर सेकंडरी एजुकेशन पुणे जे बोर्ड ऑफ़ स्टडीज इन सिंधी जो कन्वीनर
1992 – साहित्य अकादमी नई दिल्ली जे सिंधी एडवायजरी बोर्ड जो मेम्बर
1992 -1995 भारतीय ज्ञान पीठ साहित्य अवार्ड जी सिंधी भाषा जी कमेटी जो मेम्बर
1995 में रिटायरमेंट वठण खां पोय हीरो शेवकानी बतोर एग्जीक्यूटिव सेक्रेटरी, गांधीधाम कॉलेजिएट बोर्ड आदिपुर सां जुड़ियो ऐं 2001 तायीं इन ओहदे ते रहियो।
विद्यार्थी जीवन जे दौरान हीरो शेवकानी अहमदाबाद जी हरीशचंद्र पाठशाला में थींदड अदबी बेठकुन में न सिर्फ हाज़िर रहंदो हो पर बहरो बि वठन्दो हो। इन गालिह न सिर्फ संदस साहित्यिक सलाहियतूं वाधायूं पर सिंधी साहित्य खे समझण जो नज़िरियो पैदा करण में बि मदद कयी। हालांकि हीरे शेवकानी जी लिखियल पहिरियीं कहाणी 1954 में ई मुम्बई जी हिक मैगज़ीन में छपिजी चुकी हुयी पर संदस लिखियल पहिरियों किताब 1975 में छपजियो।
पहिंजियूं कहाणियूं, मज़मून, छन्ड छाण वारन लेखन खां सिवाय हीरे शेवकानी तरजुमो बि कियो आहे ऐं “सिंधी अदब जी तारीख ” जे रुप में सिंधी साहित्य खे बेमिसाल सूखड़ी डिनी आहे। सिंधी अदबी दुनिया में आम तौर चयो वेन्दो आहे त हीरो शेवकानी ऐं हरीश वासवानी मिली करे सिंधी साहित्य जी नुक़तचीनी [criticism] जे तरीके खे न सिर्फ पूरी तरह सां बदिलाये छडियो पर उन में के नवां उफ़क़ बि जोड़िया आहिन।
30 जुलाई 2021 ते सिंधी अदब तोड़े तैलीमी खेतर जी मानवारी शख्सियत हीरो शेवकानी पहिंजो जीवन सफर पूरो करे परलोक पधारिया।
अदबी योगदान - लिखियल किताब
हीरो शेवकानी – किताबन जी लिस्ट [In alphabetical Order of Titles]
चूंड सिंधी कहाणियूं
जाइजो
जिद्दत जो हफहूम ऐं सिंधी कहाणी
कटिघरे में
लोक लाहवारो वहे तूं कचो वहु
नयीं सिंधी कहाणी
नयीं सिंधी कविता
नुकत-ऐ -नज़र
साहित्य सुरिहां
सिंधी अदब जी तारीख
सिरजन जो संकट ऐं सिंधी कहाणी
ज़िन्दगी ऐं कैक्टस
Books Window
हीरो शेवकानी - अवार्ड
साहित्य अकादमी अवार्ड (सिंधी भाषा): 2008
किताब जो उनवान: सिरजन जो संकट ऐं सिंधी कहाणी
बिया अवार्ड
श्री एल एक अजवानी जे अंग्रेजी में लिखियल History of Sindhi Literature जो सिंधी में “सिंधी अदब जी तारीख “में तरजुमो करे हीरो शेवकानी साहित्य अकादमी जो तरजुमो अवार्ड 1997 में हासिल करे चुको आहे। सिंधी साहित्य जी कयल सेवा वासिते वास्ते गुजरात सिंधी साहित्य अकादमी हिन खे गौरव पुरस्कार सां नवाज़ियो आहे।
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.