किशोर लालवाणी
Introductory
नागपुर जे सिंधी अदाकार, नाटक नवीस, लेखक अयं तरजुमेकार किशोर लालवाणी जी जानकारी द सिंधु वर्ल्ड डॉट कॉम ते शामिल करण जो खियाल अचण जी देर हुयी जो मुहिंजे विचारन जो उफक नागपुर जी मिठिन नांरगिन जी याद, नागपुर जी हिंदी नाटक परंपरा अयं राजकुमार हिरानी जहिडे नागपुर सिंधियिन जो मानु वधायिण वारे नाले जी खिविण जी चमकंदड रोशनी सां भरिजी वयो। हाणे विज जी चमकाहट थी त बादलन जी गजगोड़ बि जरुर हूंदी। इन गजगोड़ जो ई नालो आहे किशोर दीपचंद लालवाणी।
नागपुर जी नांरगिन जी याद अचण अजायो न आहे। इहे नारागियूं मिठे सुवाद वासिते त जरुर मशहूर आहिन पर बियन नांरगिन वांगुर इहे बि खटी तासीर रखन थियूं। मतलब इहो त नांरगियूं हकीकत में हिक खां वधीक सिफतुन जे हिक ई हंद ते या हिक में मोजूद हुजण जी निशानी आहिन। किशोर बि हिक पासे पहिंजे मिलनसार सुभाव मिठो गालिहाये मददगार शखस जे रुप में मशहूर आहे। बिये पासे डिसजे त विगयान (B.Sc.) अयं कानून (L.L.B.) जी पढिहायी किशोर नोकरी कयी बैंक में। सिरफ ऐतिरो ई न पर जिंदगी जा केतिरा ई साल पेसे डोकड़ सां लागापो रखण वारे आरथिक खेतर में कमु करण वारो किशोर लालवानी अदबी खेतर में हिक कामियाब अयं मशहूर शखसियत आहे। चवण जो मतलब सिरफ ऐतिरो आहे त नागपुर जूं नांरगियूं अयं नागपुर जो ई किशोर लालवाणी हिक खां वधीक सिफतुन जा धणी आहिन।
किशोर लालवानी :: शुरुआती जीवन (Biography)
किशोर जो जनम नागपुर निवासी परिमलादेवी अयं दीपचंद लालवाणी जे पुट जे रुप में 15 जून 1957 ते थियल आहे। नागपुर में ई पलिजी वडो थियल किशोर नागपुर में ई तेलीम हासिल कयी आहे। विगयान (B.Sc.) अयं कानून (L.L.B.) जी डिग्री सां गडु हुन बिजनेस मेनेजमेंट में डिप्लोमा हासिल करण खां पोय किशोर लालवाणीअ 1977 खां वठी बैंक ऑफ़ बड़ोदा में नोकरी करण शुरु कयी।
06 जनवरी 1985 खां वठी किशोर खे जीवन संगनीअ जे रुप में रशमी जो साथु मिलंदो अचे पयो थो। खुशहाल जिंदगी गुजारिण वारे इन जोडे खे संतान जे रुप में टे धीअरु आहिन। तबादले वारी नोकरी हुजण सबब किशोर लालवानीअ खे महारष्ट्र जे अलग अलग शहरन में रहण जी मुशकिलात खे मुहं डियणो पयो आहे पर हिन पहिंजो घरु नागपुर में ई कायम रखियो सो संतान जी पढिहायी न त का तकलीफ आयी न को रुखिनो। 2017 में 40 चालीह साल नोकरी खां पोय हिन अदल रिटायर कयो। हिन वकत किशोर पहिंजे परिवार सां गडु नागपुर में रहंदो आहे।
किशोर लालवानी - अदाकारी नाटक मंच ऐं साहितिक जीवन सफर
बालपणे जे शुरुआती सालन में नकाली (Mimicry) अयं अदाकारी (acting) खे अजब अयं करामात या कमाल जे नजरिये सां डिसण वारे किशोर लालवानी जे नाटक मंच ऐं अदाकारी जी शुरुआति संदस इसकूली पढिहायी जे समे खां थी। हुन पहिंजे इसकूल में सिंधी नाटक लालूअ माउ पंजुअ माउ पेश कियो। मजे जी गालिह इहा रही जो किशोर इन नाटक में छोकिरो हूंदे बि औरत किरदार मतलब लालूअ माउ जो किरदार निभायो हुओ। इहो नाटक हिक किसम इशारो हुओ किशोर जे वडे थी घण खेतरी घण हुनरी शखसियत बणिजण जो। कॉलेज जी पढिहायी लाय हुन सालने जलसे जे प्रोग्राम में नाटक शामिल करण जी रिवायत हुजण वारे सिंधु कॉलेज में दाखिला वरतो। किशोर कॉलेज जी इन नाटक पेश करण जी रिवायत खे सिंधी नाटक जी रिवायत में बदिलाइन्दे पहिंजा पहिंजा अधिकार उनवान वारो सिंधी नाटक पेश कियो। इन नाटक किशोर खे न सिरफ कामियाबी जी खुशीअ जो अहसास करायो पर संदस वासिते अदाकारी ऐं नाटक मंचन जी शाही राह बि खोले छडी। हिन वकत तायीं किशोर नागपुर शहर में अदाकारी में सुठी महारत रखण वारे सिंधी नवजवान तोर मशहूरी हासिल करे वरती हुयी।
खुशकिसमतीअ सां नाटकन जी रिवायत हुजण वारे नागपुर शहर जी सिंधी नाटकन सां जुडियल संसथा सिंधु कला केंद्र, सिंधी नाटक किंग एस पी मेंघानी साहिब जे बेहतरीन सिंधी नाटक याद कंदा खे पेश करण जो फेसिलो कियो। जिन मकानी अदाकारन जा नाला चूंडिया वया उनहन नालन में हिकु नालो किशोर लालवानी जो बि हुओ। इहो मोको किशोर लाय पुठि वराये न डिसण जहिडो साबित थियो।
बैंक जी तबादिले वारी नोकरी करे केतिरा ई भेरा कहिं नंढे वडे शहर में किशोर खे मजबूरी में अकेलो बि रहणो पवंदो हुओ। नोकरी खां पोय मिलण वारो खाली वकतु सकारतो कंदे हुन न सिरफ नाटक लिखण शुरु किया पर मकानी कलाकारन जी मदद सां मकानी सिंधी समाज सामहूं नाटक पेश करण बि शुरु कयो। मतलब इहो थियो त अकेले रहण जी मजबूरी किशोर लालवानी जे बतोर नाटक नवीस अयं हिदायतकार जे जीवन जी शुरुआति साबित थी। हिकु अंकी नाटक सूरीअ सडु कयो किशोर जी कामियाबी जी मंजिल में हिकु अहमियत वारो डाको साबित थियो। इहो नाटक हुन नागपुर जे बियन कलाकारन सां मिलीकरे अखिल भारत सिंधी बोली अयं साहित सभा पारां रीथियल ऐं दिल्ली में 1978 में थियल चटाभेटी दोरान पेश कियो हुओ। किशोर जे बतोर अदाकार, नाटक नवीस अयं हिदायतकार वारे जीवन में अहिडो अहमियत वारो मोको आयो 1980 में। हिन भेरे प्रो राम पंजवानी जे जनम डींह जे जलसे में हुन हुजइयी नाणो त इन उनवान वारो नाटक पेश कंदे हमेशा वांगुर हिकु मजाकिया किरदार बि निभायो।
अमरावती शहर में थियल तबादिलो किशोर जे अदाकारी अयं मंच वारी जिंदगी जी कामियाबी में बेहद अहमियत वारो साबित थियो। हकीकत में इन समे में नागपुर जे मशहूर नाटक हिदायतकार तुलसी सेतिया लडे अची अमरावती में रहणु शुरु कियो हुओ। बिनही मिलीकरे करे केतिरा ई नाटक पेश किया। किशोर लालवानीअ जी पेशकशिन में जागंदी रहे जोत सदायीं (झूलेलाल साहिबन जो जीवन) अयं सिंधुडीअ जो सरताज कंवर (भगत कंवरराम साहिब जो जीवन) खे मुकुट या ताज जो दरजो डियणु गलत न आहे। ऑडियो विज़ुअल बेले जे रुप में पेश किअल, चालीहन जे आसपास शामिल हुजण वारन कलाकारन खे संभाले कामियाबी हासिल करण हिक नाटक नवीस अयं हिदायकार लाय लासानी कामियाबी आहे।
वकत जी जरुरत अयं घुर समझंदे किशोर वीडियोज अयं फिलमस में न सिरफ अदाकारी शुरु कयी पर बतोर लेखक बि जुडियो। सिंधी फिलमुन टपड़ टेशन ते अयं वायसर ई गुम सां किशोर लालवाणीअ जो नालो बतोर कहाणीकार ऐं स्क्रिप्ट लिखण वारे तोर जुडियल आहे त फिलम लखी मुहिंजो लखन में ऐं तुहिंजे पियार में जी स्क्रिप्ट हुन लिखी आहे। किशोर खे 2018 रायपुर जी शदाणी दरबार जे गदेसर संत युधिष्ठिरलाल जन सां गडु सिंध जी यात्रा ते वंञण जो मोको मिलियो। इन दोरान हुन नागपुर जी सिंधुडी युथ विंग जे कलाकारन सां गडु घोटकी अयं हयात पिताफी में शदाणी संत राजाराम उनवान वारो नाटक पेश कियो। भारत मोटी अचण खां पोय संदस सफरनामो होजमालो उनवान सां छपजियो आहे।
अदाकार, हिदायकार, नाटक नवीस किशोर लालवानी बियन केतिरिन ई सिंधी अदबी, तहजीबी अयं सामाजिक संसथाउन सां जुडियल आहे। नागपुर जी सिंधुडी जो PRO त सिंधी सदा सलामत जो सेक्रेटरी आहे। भारतीय सिंधु सभा सांस्कृतिक मंच नागपुर जो प्रेसीडेंट रही चुको किशोर लालवानी हिन वकत (2023) सेंट्रल साहित अकादमी नई दिल्ली जी सिंधी सलाहकार समिती जो मेंबर आहे त माजीअ में महाराष्ट्र राजिय सिंधी अकादमी जो मेंबर रही चूको आहे।
किशोर लालवानी लिखियल किताब
झूलण तूं दया करि – सजण देर कयी ईंदे ईंदे – जलवेदार सिंधी – हलियूं मायूं बीमार पुछण – बंद लिफाफो – हा मां गोठाणो आहियां – होजमालो -असां वडन जो कमु आहे सलाह डियणु – सचित्र जीवन गाथाएं – अभी तो दिल जवान है – सिंधुडीअ जो सरताज कंवर – अचो त डिण वार मलिहायूं – वांदो वासु – नाटय सम्राट
किताबी झरोखो
किशोर लालवानी अवार्डस
1980 – महाराष्ट्र राज्य नाटय महोत्सव दोरान बेस्ट एक्टर अवार्ड
2013 – नागपुर महोत्सव दोरान नागपुर महानगरपालिका पारां सतिकार
2017 – महाराष्ट राजिय सिंधी अकादमी पारां खासु तरजुमो अवार्ड
2019 & 2023 – सिंधी नाटक लिखण लाय थियल चटाभेटीअ में राजस्थान सिंधी अकादमी पारां अवार्ड
2023 – सफरनामे होजमालो लाय महाराष्ट राजिय सिंधी अकादमी पारां साहित अवार्ड
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.