डॉ मोती प्रकाश

इहो सचु कबूल करण तमाम डुखियो आहे त मुल्क जी – जी डी पी (GDP) में लेखे जोग योगदान डियण खां पोय बि भारत में बियन कौमुन वांगुर सिंधियिन जो न त को अलग राज्य आहे ऐं न ही का अहिडी तज़वीज़ या बंदोबस्त आहे जेका पक करे त भारत जे सियासी तोड़े माली, फेसिला करण जे सिरश्ते [Decision making system] में सिंधी सिधे नमूने बहरो वठी सघन। जे मुल्क जे विरहांङें खां पोय बेघर थियिल सिंधी माली ऐं सामाजिक तौर थायिंका थिया आहिन त इहो इन करें न जो भारत में सिंधियिन खे वरी वसायिण वासिते कुझु ख़ासु बंदोबसतु वयो हो पर इन करे मुमकिन थियो आहे जो सिंधी कौम वटि हिकु आलिशान सांस्कृतिक ऐं सामाजिक वरसो हुअण सां गडु माली कामियाबी हासिल करण जी बि शानदार रिवायत आहे। जे असां इन रोशनी में डॉ मोती प्रकाश बाबत जानकारी पढ़िहन्दा सीं त संदस कामियाबिन खे वधीक सुठे नमूने समझी सघन्दासीं।

15 मई 1931 ते सिंध जे थट्टा जिले जे दारो गोठ में जावल डॉ मोती प्रकाश पहिंजे बालपणे जे पूरे थियण ऐं जवानी शुरू थियण वारी उमिर जी बुलंदी ते हुओ जो भारत लड़े अचण वासिते मज़बूर थियो। संदस इहो सिंधी कौमी तराने तोर मशहूर सिंधी गीत इजिहार आहे उन्हन दुखन तक़लीफ़ुन ऐं अणचाही हालतुन जो जिनखे सिंधी कौम मुहं डिनो। इहो गीत इजिहार आहे डॉ मोती प्रकाश – 16 सालन जे कोमल मन वारे बार जेको विरहांङें सबब घर खां बेघर थियण वासिते मज़बूर थियो ऐं जहिं नंढे भाउ जी पढ़ायी वासिते उन नंढी उमिर में लाचारी में कमु करण जो अहसास कयो। इहो सिंधी कौमी तरानो सिंधी कौम जी 1947 खां पोय भारत में हासिल कयल रश्क जोग शानदार कामियाबी जी अंदुरुनी ख़ुशी जो इजिहार पिणु आहे।

भारत में लड़े अची थाईंको थियण जे दोर में पढ़ायी वासिते पेसो कमायिण जी लाचारी ऐं ज़फ़ाकशीअ डॉ मोती प्रकाश जे मन में सिंधी कौम जी पढ़ायी बाबत कुछ लेखे जोग करण जी चाह ऐं बाहि पैदा कयी जहिंजे नतीज़े तौर अगते हले हू हिक तैलीम दान बणियो। 1951 में एस एस सी बोर्ड मां एस एस सी जो इम्तिहान पास करे हिन मुंबई चेम्बूर जे सिंध कॉम्पोलिटियन हाय स्कूल में सिंधी टीचर जी नौकरी कन्दे पहिंजी पढ़ायी शुरू रखण जो फेसिलो कयो।
इहो हिन जो पहिंजे कमु डान्हुँ लगाव जो फलु हो जो सिर्फ ट्रिन सालन जे अरसे में हुन खे मशहूर के जे खिलनानी ग्रुप ऑफ़ स्कूल में कमु करण जो मोको मिलियो। जिते हुन फरवरी 1977 तायीं कमु कयो। 14 साल कमु करण खां डॉ मोती प्रकाश खे दादर जे के जे खिलनानी हाय स्कूल जे प्रिंसीपल जे ओहदे ते मुकिरर कयो वयो।

खाड़ी जे मुलकन में रहन्दड सिंधियिन सेंट्रल बोर्ड ऑफ़ सेकंडरी एजुकेशन नई दिल्ली सां निसबत रखन्दड इंडियन हाय स्कूल शुरू कयो। उहे स्कूल जी मैनेजमेंट वासिते कहिं अहिड़े शख्स जी गोलिहा में हुआ जहिं खे स्कूल हलायिण ऐं वाधारे जी जवाबदारी डयी हू बेफिकर थियन। उन्हन जी गोलिहा डॉ मोती प्रकाश ते अची पूरी थी। फरवरी 1977 खां डॉ मोती प्रकाश इन स्कूल जे प्रिंसीपल तोर कम करण लगो। साल 2000 में डॉ मोती प्रकाश जे ओहदे में वाधि करे उन खे संस्था जे रेक्टर जे ओहदे ते बहाल कयो वयो। अप्रैल 2002 में डॉ मोती प्रकाश मोटी भारत मुंबई आयो।

भारत वापिस अचण खां पोय डॉ मोती प्रकाश इंडियन इंस्टिट्यूट ऑफ़ सिंधोलोजी आदिपुर सां जुडियो ऐं आदिपुर जे ई एस एच एन अकादमी जे बोर्ड मेंबर ऐं ट्रस्टीज तोर कम करण लगो। 1956 खां 1977 तायीं डॉ मोती प्रकाश आल इंडिया रेडियो सां जुडियिल हो। इन वक़त में हुन 200 खां बि वधीक रेडियो नाटक प्रोडयूस कया। डॉ मोती प्रकाश “अंञा त मां नंढड़ी आहियां ” (1962) ऐं “राति हिक तूफ़ान जी ” (1971) जहिडा के थोरा सिंधी नाटक बि लिखिया आहिन।
तैलिमी खेतर में पहिंजे लम्बे कामियाब कॅरियर जे दौरान हिन विद्वान तैलीमदान पहिंजे टीचर / प्रिंसीपल जे ओहदे खां सिवाय बियन केतिरिन तैलीमी संस्थाउन जे मुख़तलिफ़ ओहदन ते कमु कयो आहे। 4 अगस्त 2015 ते मुंबई में डॉ मोती प्रकाश जन जो स्वर्गवास थियो।