पदम श्री रोमेश वाधवानी

जडिहिं बि भारत में आर्टीफीसियल इंटेलीजेंस जे खेतर में सिंधी सीड़प जो ज़िकुर थिये थो त इंडियन -अमेरीकन बिलिओनर, रोमेश वाधवानी उहो पहिरियों नालो आहे जेको सामहूं अचे थो। साल 2018 में मुंबई में रोमेश वाधवानी पहिंजे भाउ सुनील वाधवानी सां गडु मुंबई यूनिवर्सिटी में नयें बरपा कियिल वाधवानी इंस्टिट्यूट ऑफ़ आर्टीफीसियल इंटेलीजेंस वास्ते $30 million जी सीड़प जो ऐलान कियो। इहा गालिह वक़तसार यादगिरिन खे ताजो करण वारी आहे त 2015 में रोमेश वाधवानीअ भारत में एंट्रेप्रेन्योरशिप फंडिंग वास्ते $1 billion जी सीड़प करण ज़ाहिर कयी हुयी।
रोमेश वाधवानीअ सॉफटवेयर, इंटरनेट ऐं तकनीकी सेवाउन जे खेतर में कमु करण वारो सिम्फनी टेकिनोलॉजी ग्रुप बरपा कियो आहे ऐं बतोर उनजे चेयरमैन ऐं CEO कमु करे रहियो आहे। 1991 में हुन आस्पेक्ट डेवलपमेंट इनकारपोरेशन जी शुरुआत कयी ऐं 1999 में i2 टेक्नोलॉजीज जे $9.3 billion में इन जो ताबो हासिल करण तायीं चेयरमैन ऐं CEO रहियो। सिम्फनी टेलेका कारपोरेशन, MSC सॉफटवेयर इनकारपोरेशन, सिम्फनी हेल्थ सॉलूशन्स इनकारपोरेशन ऐं शॉपज़िला इनकारपोरेशन इहे कुछ बियूं कम्पनियूं आहिन जिन जो एक्सक्यूटिव चेयरमैन रोमेश वाधवानी आहे।
रोमेश वाधवानी जो जन्म 1947 जे आसपास कराची [सिंध] में थियो आहे छाकाण त जहिं वक़त संदस पिता टेकचन्द वाधवानी परिवार सूधो भारत लड़े पियो आयो त बालक रोमेश माता शांता जी हंज में हुओ। मुंबई में सिर्फ बिन सालन जी उमिर में रोमेश पोलियो जो शिकार बणिजी पियो। इहा गालिह संदस तैलीम हासिल करण में हिक वड़ी रुकावट साबित थी। आखिर सभनी रुकावटुन ऐं रूखनन खे पारि करे, दुख ऐं तक़लीफ़ुन वारो अरसो गुजारे रोमेश वाधवानी पहिरियूं मुंबई जे इंडियन इंस्टिट्यूट ऑफ़ टेक्नोलॉजी मां बेचलर ऑफ़ आर्ट्स/ साइंस जी डिग्री ऐं पोय कार्नेगी मेलोन यूनिवर्सिटी मां मास्टर ऑफ़ साइंस जी डिग्री हासिल कयी। अगस्त 2018 मुंबई जी इंडियन इंस्टिट्यूट ऑफ़ टेकिनोलॉजीअ खेस डॉकटरेट जी ऑनररी उपाधी डिनी। 2013 जे इंडिया अब्रॉड अवार्ड जे लाइफ टाइम अचीवमेंट वास्ते जिन नालन ते विचार कियो वयो हुओ उन्हन रोमेश जो नालो पिणु शामिल हुओ। 2020 में भारत सरकार रोमेश टेकचंद वाधवानी खे पदम श्री अवार्ड सां नवाज़ियो आहे।रोमेश वाधवानी ज़ाल कैथलीन [केथी] सां गडु पालो आल्टो कैलिफ़ोर्निया में रहंदो आहे।