तीरथ बसंत

तीर्थ बसंत जो जन्म 07 सितम्बर 1909 ते सिंध खैरपुर जे हिक नंढे गोठ लकमन में थियिल आहे। तीरथ वेडिहोमल बसंत जी उमर ब साल बि कोन हुयी जो हिन जी माता जो सुरगवास  थी वियो नतीज़े तौर हिन जी संभाल संदस डाडीअ कयी। संदस डाडी  हिक धारमिक विचारन वारी औरत हुयी। तीरथ जे घर जे आसपास जो इलाको पिण रुहानियत वासिते मशहूर हो। इन माहोल जे असर हेठि तमाम नंढी उमिर खां ई तीरथ बसंत पहिंजी अंदर में रवाजी दुनियावी संसार खां अलग संसार वासिते कशिश महसूस कयी।  हुन  सिर्फ डहन साल जी अबोध उमिर में ई  घर छड़े डिनो। नतीज़े तौर खेसि  रिवायती इसकूली तैलीम हासिल करण जो वझु कोन मिलियो।  इहा तीरथ बसंत जी इहा  सियाणप हुयी जो हुन इन कमीअ जी पूरत करण वासिते मगरबी [अंग्रेजी] साहित, फिलोसॉफी, इतिहास, इकनॉमिक्स ऐं समाज शासतिर जो तमाम उनिहो अभियासु कयो। गुजर बसर वासिते – रोजी रोटीअ लाय  न सिर्फ बी. ए. एम. ए. जे पर साइंस में बि डिग्री हासिल करण जे खुआइशमंद विद्यार्थिन खे टूशन ते पढ़ाहिण जो कमु करण वारे तीरथ बसंत लाय  इहो अभियास करण जरुरी बि हुओ  छो जो  खेसि विद्यार्थिन खां वधीक गिआनु हुजण ज़रूरी हुओ।

अदबी दुनिया खे तीरथ बसंत जी वाकफियत संदस अंग्रेजी में लिखियिल ऐं “सिंध आब्जर्वर” तोड़े “एडवांस इंडिया ” जहिडिन मकबूल साहित्यिक मैगजीन्स में छपियिल संदस लेखन वसीले थी। इहो विशन जगतियानी हो जहिं न सिर्फ तीरथ बसंत खे पहिंजी अख़बार “रोशनी” वास्ते सिंधी में लिखण वासिते हिमथायो पर राज़ी बी कियो। थोरे ही अरसे में तीरथ बसंत जो नालो उन्हन सिंधी लेखकन में शुमारिजण लगो जिन जा लेख “फुलेली” (हैदराबाद मां छपिजन्दड उन समे जी सभु खां वधीक मकबूल सिंधी मैगज़ीन) में छपिजन्दा हुआ।

तीरथ बसंत अटकल अघु सदीअ जेड़ो वडो अरसो सिंधी साहित्य जी सेवा कई आहे। हुन साहित्य जे लगभग हर दायिरे में पहिंजी महारत जो इजिहार कियो आहे। चाहे मज़मून, कहाणियूं, बायोग्राफी, सिंधी ड्रामा लिखण हुजे या तनक़ीद नज़र वारियूं रचनाऊँ या वरी नज़म हुजे [ तीरथ बसंत जी कविता बाबत लगभग न जे बराबर जाण मयसर आहे ] तीर्थ बसंत जी हर हिक अदबी रचना अदबी तोड़े लेखणी जे लिहाज खां नवां मयारु बरपा कया। हालांकि हिन साहिब जे लिखियल सभनी किताबन जी लिस्ट मयसर कोन आहे पर तीरथ बसंत जे लिखियिल ऐं छपियिल किताबन जो तादाद चालीहन जे आसपास आहे।

हेलमेट, हीरो ऐं हीरो वरशिप, किंग्स लेडी इहे तीरथ बसंत जा तरजुमो कियिल मशहूर रचनाउं आहिन। ही मशहूर संत मीरा बाई जी जीवन सां बि काफी वधीक मुतासिर हो सो हिन हिक नयीं निगाह सां संदस जीवनी “मीरा ” नाले वारे सिंधी ड्रामा जे रूप में पेश कयी। हिक गालिह जेका लिखण लाज़िमी लगे थी सा आहे त तीर्थ बसंत पहिंजी लेखणी में सिंधी पहाकन जो चंगे तादाद ऐं असिरायिते नमूने उपयोग कियो आहे। केतिरन हंदन ते संदस भाषा ते पर्शियन या फ़ारसी जो असर बि साफ़ साफ़ नज़र अचे पियो नतीज़े तोर विरहांङें खां पोय भारत में जन्म वरतल सिंधियिन खे किन किन जगहुन ते खेसि समझण डुखियो महसूस थी सघे थो। सिंधी साहित्य जी हिन अजीमोशान शख्सियत जो 30 सितम्बर 1994 ते सुरगुवास थियो।
जन्म तारीख: 07 सितम्बर 1909
सुरगुवास: 30 सितम्बर 1994