थदड़ी ते तपत क्रोध जी Anger Fire

अजु जहिं वक़त निखिमिणोमल अची सामहूं वेठो त मुहिंजे वास्ते त जणु दुनिया जो अठों अजूबो सामहूं अची वियो छो जो निखिमिणेमल जे चेहरे ते हमेशा जी चंड्र जी शीतल चांड्रोकी जी जगह ते बाहि जी तपत जो अहसास करायिण वारी सिज जी हुकूमत पे नज़र आयी।
मां स्वागत कन्दे चयो साईं निखिमिणामल कल्ह ई त थदड़ी हुयी पोय अजु सुबह सां हिन क्रोध जी तपत सां गाडहे चेहरे जो सबब छा आहे ? निखिमिणेमल जी इन मामूली सवाल जी प्रतिक्रिया मुखे अहसास कराये छड़ियो त मां शायद त *नांग जे पुछ ते पेर रखियो* आहे।
इन थदड़ी जे सबब ई क्रोध जी कावड़ पैदा थी आहे न एस पी सर ? ऐं मथां वरी तव्हां ई था पुछो ?
मां सोचियुम त कुछ चवां पर निखिमिणेमल कहिं खे गालिहायिण जो मोको डिनो आहे जो मुखे मिले। मुहिंजी हालत *दिल के अरमान आसुंओं में बह गये हम वफ़ा करके भी तन्हा रह गये* जहिड़ी थी वयी।
खैर हिन खिल मज़ाक खे पासीरो रखण ऐं किन गालिहिन ते पूरी गंभीरता सां विचार करण जो वकतु अची वियो आहे। हिते मां तव्हां सां व्हाट्सएप्प जे सिंधी वाशिंदन जी करामातुन जा कुछ किसा शेयर कियां थो जेके डेखारिन त मशहूरी ऐं जसु हासिल करण वास्ते के सिंधी भाउर का बि हद पार करण – गैर अखलाखी हरकत जो वापर करण – खां बि परहेज़ न था कनि।
हाणे पहिरियूं निखिमिणेमल जी कावड़ जी गालिह न कयी त पक समझो त हिन गंभीर विषय ते विचार करे सघण नामुमकिन थी पवन्दो सो निखिमिणेमल जे क्रोध जो सबब संदस पहिंजी ज़ुबानी।
तव्हां खे खबर आहे न एस पी सर त हर डिण ते सिंधी कवी पहिंजी पहिंजी कविता व्हाट्सएप्प ते पोस्ट कन्दा आहिन। तव्हां जो बिलासपुर वारो कवी दोस्त आहे न एस पी सर ?
हा कन्हैयालाल आहूजा।
हा उहो ई उन थदड़ी जी हिक कविता रात जो पोस्ट कयी। सुबह जो उथी डिसां त सागी कविता हिक बिये व्हाट्सएप्प ग्रुप में आयी पई आहे फरकु सिर्फ ऐतिरो जो *कन्हैया* जी जगह ते बियो नालो लिखियो पियो आहे। तव्हां त पढियल लिखियल आहियो न एस पी सर छा इहा गैर अखलाखी हरकत सही आहे ?
पर साईँ निखिमिणामल *व्हाट्सएप्प ते इहो आम आहे त केतिरा ई शख्स जडिहिं कहिं बिये जी रचना फॉरवर्ड कनि त रचनाकार जो नालो गुम करे फॉरवर्ड कनि।* तव्हां खे इहो त कडिहिं ग़ैर अखलाखी महसूस न थियो आहे?
उहा अलग गालिह आ एस पी सर। हकीकत में इहो नालो गुम करण असां जी रीस ऐं हूस जो इजिहार आहे जेका असां खे फॉरवर्ड करण वास्ते त मज़बूर करे थी पर बिये जी मशहूरी असां छो कयूं सो नालो गुम करण वास्ते बि मज़बूर करे थी।
पर साईं निखिमिणामल आहे त इहा बि गैर अखिलाखी हरकत न ?
तव्हां चवण सोरहां आना सचु आहे एस पी सर। पर सिर्फ नालो गुम करण जा 2 फायदा आहिन।
[1] जिन खे इहा मां फॉरवर्ड कयी उन्हन मां किन खे त ज़रूर महसूस थींदो त इहा मुहिंजी रचना आहे मतलब मुहिंजी हालत *बिना कमायी नानका मुखे साधनि जहिड़ो कर* जहिड़ी थी पवंदी।
[2] मां वटि बहाना बि हूंदो न एस पी सर ? मुखे पोस्ट सुठी लगी सो फॉरवर्ड कयी *जे मुहिंजी नियत ख़राब हुजे हां त मां गुम कियिल नाले जी जगह ते पहिंजो नालो बि लिखी सघां हां ?* मां लिखियो छा पहिंजो नालो ? न न मतलब त एस पी सर मुहिंजी नियत सुठी आहे। हाणे जे इन सुठी नियत खे तव्हां ग़ैर अखिलाखी हरकत चवो त एस पी सर इहा तव्हां जी मरज़ी आहे।
इयें त साईँ निखिमिणामल को शख्स इहो सबब बि डयी सघे थो त *तव्हां जी लिखियिल सिंधी देवनागिरी में मात्राउन जूं गलतियूं हुयूं मां सिर्फ उहे दुरुस्त करे पोस्ट फॉरवर्ड कयी आहे।* इहो कहिं बिये शख्स जो कहिं रचनाकार जी रचना में फेर फार करण बि तव्हां खे गैर अखिलाखी महसूस कोन थींदो।
चाहिं पूरी थी चुकी हुयी सो निखिमिणेमल बीठे बीठे चयो। एस पी सर मां त तव्हां खे गालिह बुधायी हाणे इन गलत गालिह खे रोकिण वास्ते छा क्जे इहो कम मुहिंजो न पर तव्हां जो आहे एस पी सर।
निखिमिणोमल त हलियो वियो पर इहे गंभीर सवाल त सामहूं आहिन न ?
[1] कहिं रचनाकार जी रचना नालो गुम करे फॉरवर्ड कर्ण सही आहे या गलत ?
[2] कहिं कविता में असली कवी जो नालो गुम करे पहिंजो नालो लिखण ग़ैर अखिलाखी न आहे छा ?
[3] कहिं बिये जे कियिल कम खे पहिंजे या पहिंजी संस्था जे कम जे रूप में पेश करण जी ज़हनियत खे छा चयजे ?
तव्हां मां केतिरन जे दिमाग में इहो सवाल ज़रूर हूंदो *एस पी सर तव्हां त काफी चंगे वकत खां लिखो पिया ऐं घटि में घटि मां तव्हां जो को अहिड़ो मैसेज कोन डिठो आहे जेको तव्हां जो पहिंजो लिखियिल न हुजे पोय तव्हां सां कडिहिं अहिड़ो हादसो न थियो आहे छा ?*
[1] *मां सिंधी आहियाँ* मुहिंजी लिखियिल इन कविता में हिक राज्य जी सिंधी अकादमी सां जुडियिल ऐं नामवर सिंधी शख्सियत कविता जी सिट्रिन जे विच में पहिंजी वेबसाइट जो नालो लिखी फॉरवर्ड कयी।
[2] दादा जशन वासवाणी जन खे श्रद्धांजली जे रूप में लिखियिल मुहिंजी कविता में हिक अखिल भारतीय सिंधी संस्था जे राष्ट्रीय मंत्री मुहिंजो तखलुस *आज़ाद सचल* हटाये उन जी जगह ते पहिंजो नालो लिखी फॉरवर्ड कयी।
[3] ताज़ो ताज़ो मुहिंजी पोस्ट कियिल भारत जे सिंधी शहरन ऐं हर हिक शहर में सिंधी परिवारन जो आकड़ो डेखारिण वारी लिस्ट में बिन सिंधी संस्थाउन जे संस्थापक अध्यक्षन के तबदील करे इन लिस्ट खे भारत जी सिंधी जनसंख्या जी लिस्ट जे रूप में पोस्ट कियो पर नकल करण में अकुल खां कमु वठण खां परहेज़ करण सबब *आबू रोड* जी सिंधी जनसंख्या 2,25,000 थी वयी त *लख़नऊ* जी सिर्फ 450 ।
हाणे बि आहूजा जन जी कविता में जिन बिन शख्सियतुन “कन्हैया” गुम कियो आहे तिन मां हिकु शख्सु हिक राज्य जी सिंधी अकादमी जो मेंबर आहे ऐं बियो हिक सिंधी पंचायत जो अध्यक्ष। मज़े जी गालिह इहा बि आहे त इहे बयी शख्सियतूं पत्रकारिता सां बि जुडियिल आहिन मतलब *कॉपी राइट* नाले वारे अखर बाबत इन्हन खे सुठी जाण हूंदी।
*तव्हां जे वास्ते कुछ सवाल*
[1] मथियिन हादसन मां इहो त ज़ाहिर आहे त इन किसम जी हरकत करण वारा कहिं न कहिं सिंधी संस्था सां जुडियिल आहिन। छा इहा हरकत संस्था में हासिल ओहदे जे तकबर में कियिल आहे ?
[2] छा हाणे वकतु न अची वियो आहे त सिंधी नवजवान अगते अची सिंधी संस्थाउन जी सार संभाल लहन ?
[3] छा व्हाट्सएप्प जहिड़े असिरायिते प्लेटफार्म ते ग्रुप एडमिन खे ध्यान न डियण घुरिजे त जे को मेंबर इन किसम जी बिना नाले वारी पोस्ट करे थो त उन मेंबर खे ग्रुप मां रिमूव कजे ?