हिकु भाकुर Just One Hug

कल्ह बाजार में घणे अरसे खां पोय निखिमिणोमल नज़र अची वियो सो मुहिंजी ड़ोरापन जी जुबान इन मोके जो पूरो पूरो फायदो वरतो। डिसजे त वेचारे निखिमिणेमल जी शिकायत गैर वाज़िब न हुयी। हुन जो चवण हुओ त अचण बंद करण जो सबब आहे त एस पी सर तव्हां त मुखे बराबर इज़्ज़त डयी पाण सां विहारे चाहिं पियारो था पर तव्हां जे लेखन खे पढ़हन्दड़ मां केतिरन मुखे मज़ाकिया किरदार बणाए छड़ियो आहे। खैर गालिह खुटायिणी भाकुर पाये गिला शिकवा दूर करे अचण जो वायदो करे निखिमिणेमल रुखसत वरती।

अजु सुबह जो प्रभात वेले चाहिं जी चुस्की वठन्दे निखिमिणेमल गालिह उतां ई मतलब भाकुर पायिण खां शुरू कयी जिते कल्ह बाजार में छड़ी हुयायीं।

एस पी सर मुखे इहो त बुधायो त आखिर माणुहू भाकुर पाये छो थो ? छा भाकुर पाइण खां सिवाय निंड्र न अचेस या खाधो न थो हज़म थियेस ? आखिर इंसान भाकुर पाये छा थो हासिल करे ?

साईं निखिमिणामल इंसान अलग अलग मोकन ऐं माहोल में अलग अलग मकसद सां भाकुर पाये थो।

इयें न एस पी सर मिसाल ड़यी बुधायो।

ठीक आहे साईं। त बुधो पुट्र जडिहिं महसूस कन्दो आहे त गालिहिन सां पीउ जी कावड़ खतम कोन थींदी त भाकुर पाये पीउ जो गुसो शांत कन्दो आहे।

मतलब त एस पी सर भाकुर पाइण माफ़ी घुरण जो इजिहार आहे, पर इहो त बुधायो त ज़ाल मुड़स खे भाकुर छो थी पाये ?

साईं निखिमिणामल, आम माणुहुन जो रायो आहे त ज़ाल सिर्फ बिन हालतुन में मुड़स खे भाकुर पाये थी पिहिरियों त जडहिं का फरमाईश पूरी कराइणी हूजेस ऐं बियो जडिहिं मुड़स का फ़रमाइश पूरी कयी हूजेस।

इहो त थियो आम माणुहुन जो रायो पर एस पी सर इन बाबत तव्हां जो पहिंजो विचार छा आहे ?

इहो मुड़स हुजे या ज़ाल हक़ीक़त में उन्हन जो भाकुर पाइण पियार जो बि इजिहार आहे त शुकुरगुजारी जो बि।

चंगो हाणे इहो त बुधायो एस पी सर त मां जो कल्ह बाजार में तव्हां खे भाकुर पातो उन जो मतलब छा हुओ ?

साईं निखिमिणामल उहो त तव्हां जो मुहिंजे वास्ते तव्हां जे दिल में समायल सिक हुब ऐं पहिंजाएप आहे जो तव्हां नाराज़ हूंदे बि पाण खे मुखे भाकुर पाइण खां रोके न सघियव।

त तव्हां जो मतलब आहे एस पी सर हिकु भाकुर माफ़ी जो इजिहार आहे – हिकु भाकुर पियार जो बयान आहे – हिकु भाकुर शुकुरगुजारी आहे – हिकु भाकुर पहिंजायप जी निशानी बि आहे।

बिलकुल साईं निखिमिणामल तव्हां दुरुस्त चवो पिया।

मां तव्हां जी गालिह कबूल कयी एस पी सर। बस मुहिंजे आखिरी सवाल जो ज़वाब डियो। जे हिकु भाकुर सचुपचु ऐतिरो कुछ आहे त टी वी लागीतो हिक भाकुर ते बहस छो थी रही आहे ? छा थी पियो जे इहो भाकुर संसद जे अंदर पातो वियो ?

हमेशा वांगुर निखिमिणेमल जे इन आखिरी सवाल जो जवाब मां वटि त कोन्हे जे तव्हां वटि हुजे त ज़रूर लिखन्दा पढ़ी निखिमिणोमल बि खुश थींदो ऐं थी सघे थो त  हिकु भाकुर पाइण तव्हां जे घर पहुची वंञेव।