100 ग्राम अंगूर

अजु निखिमिणोमल वेठो मस हो जो पुछण शुरू कियांयी एस पी सर सिंधी छोकरा त सजी दुनिया में मशहूर आहिन पोय भला सिंधी समाज में मिट्री मायट्री जे वकत तकलीफ छो थी थिये ?

मां जवाब डियां उन खां अगु ई हमेशा वांगुर निखिमिणोमल चीन छडे वंञी जापान पहुतो। पर बिहो एस पी सर पहिरियूं सिंधी छोकरन जी सियाणप जी गालिह कजे।

छा गालिह कजे साईं निखिमिणामल सिंधी छोकरा मतलब सियाणप जा टोकरा !

तव्हां जी इहा गालिह त सवा सोरिहां आना सचु आहे एस पी सर , पर जे को मिसाल डियो त वधीक बेहतर थींदो।

हाणे राजा जे घर त मोतिन जो अकाल न थिये। मां बि पूरा 27 साल मास्तर रहियो आहियां सो मिसालन जी मूं वटि कहिड़ी खोट।

ध्यान सां बुधिजो साईं निखिमिणामल ! हिकु सिंधी छोकरो अमेरिका में NASA जी ऑफिस में इंटरव्यू डियण वियो ऐं उन खां जेको पहिरियों सवाल पुछियो वियो सो हुओ :

जे भारत में तुहिंजे शहर में अंगूर 100 रूपया किलो जे अघ ते विकामजन था त तूं 100 ग्राम अंगूर घणे में खरीद कन्दे ?

बिहो ! बिहो ! एस पी सर ! NASA त अवकाश जे खेतर में खोजबीन करण वारी संस्था आहे न ? पहिरियूं इहो समझायो त अवकाश संशोधन करण वारी संस्था जो अंगूरन जे अघ सां कहिड़ो लागापो ?

इहा  ई त सियाणप जी टेस्ट आ न साईं निखिमिमल। सिंधी छोकरो त सिंधी, सो हुन जवाब डिनो
साईं मुहिंजे घर में असां चार भाती आहियूं सो 100 ग्राम अंगूर मुहिंजे कहिड़े कम जा ? मां त हिकु किलो अंगूर खरीद कंदुम।

बराबर चयो छोकरे माणुहू पहिंजी घुरज खे ई ध्यान में रखी खरीद कंदो आहे। पर एस पी सर छोकरो सेलेक्ट थियो या न ?

इंटरव्यू वठण वारो बि हार कबूल करण वास्ते तयार कोन हो सो उन चयो
तुहिंजी गालिह अगते पर जे तोखे सिर्फ 100 ग्राम अंगूर खरीद करणा पवन त तोखे घणा पेसा डियणा पवन्दा ?

सिंधी छकोरे यकदम जवाब डिनो
छा गालिह था कियो ? सिर्फ 100 ग्राम अंगूरन जा बि जे पेसा डियणा पवन तो पोय मुहिंजो सिंधी जे रूप में जन्म वठण ई बेकार आहे।

वाह ! छा त जवाब डिनो छोकरे ! 100 ग्राम अंगूर त असां सिंधी खरीद करण खां अगु ई खटे मिठे जी जाच कन्दे खायी छडियीन्दा आहियूं।

इंटरव्यू वठण वारो बि अमेरिकन हुओ सो उन सवाल जो रूप बदिलाये चयो ठीक आहे तूं 100 ग्राम अंगूरन जा पेसा न भरींदे पर जे तुहिंजो पीउ बाजार वियो हुजे हां त उहो 100 ग्राम अंगूरन वास्ते घणा पेसा ड़यी अचे हां ?*

इहो बि हिकु सियाणप भरियो सवाल आहे न एस पी सर ? इंटरव्यू वठण वारे खे त छोकरे जे हिसाब किताब करण जी काबिलियत जाचिणी हुयी न ?

छोकरे जो जवाब बुधी त तव्हां जा कन खुली वेन्दा साईं निखिमिणामल। हुन चयो

मुहिंजो बाबो ! हू त जवानी छा पहिंजे बालपणे खां ई फ्रूट जे शैदायी तोर सजे शहर में मशहूर आहे। तव्हां असां त अंगूर खायी खटे मिठे जो फेसिलो कयूं था न पर मुहिंजो बाबो त अंगूर डिसी बुधाये सघन्दो आहे। हाणे सवाल पेसन जो त मुहिंजो बाबो के बि पेसा कोन ड़यी ईंदो ?

छो अंगूर विकण वारो तुहिंजो मामो थिये जो तुहिंजो पीउ पेसा न ड़यी ईंदो ? इंटरव्यू करण वारे जो सवाल हुओ।

इहो त अमां बाबा ई बुधाये सघन था त फ्रूट वारो मुहिंजो केर आहे ? पर साईं मां पहिंजे बाबे खे सुंञाणा न। तव्हां खे शायद खबर न आहे त मुहिंजो बाबो बुढो थी वियो आहे। डन्द बाकी बचिया कोन अथस सो हू केले खां सिवाय बियो को फ्रूट खायी कोन सघे। हाणे जे अंगूर वठन्दो ई कोन त पेसा छा जा डिये ?

निखिमिणोमल त 100 ग्राम अंगूर जपीन्दे, खिलन्दे खिलन्दे उथी हलियो वियो आहे इहो विसारे त हू आयो हो मूं सां सिंधी समाज जे मिट्री मायट्रिन में थियण वारिन तक़लीफ़ुन जहिड़े गंभीर विषय ते गालिहायिण वास्ते पर अजु बि इंटरव्यू वठण वारे अमेरीकन जी हालत ख़राब आहे जहिं जे हिसे में सिंधी छोकरे जो इंटरव्यू वठण आयो हुओ। डॉक्टरन केतिरयूं ई कोशिशूं कयूं आहिन पर सालन जा साल गुजिरण खां पोय बि संदस निंड्र में 100 ग्राम अंगूर बड़बड़ायिण बंद कोन थो थिये।