होली ते छो न लिखियो ?

मुखे समझ में न पियो अचे त निखिमिणेमल जे इन सवाल जो ज़वाब छा डियां ?

आखिर होली ते कुछ न लिखी मां को रोड तां लंघंदड़ छोकिरिन ते नाली जे पाणीअ जा फूकणा त फिटी कोन किया या मां कहिं सियासी अगुवान वांगुर चारे खे भंग समझी खायी त न वेठुम न ?

मुखे इहो बि समझ में न पियो अचे त आखिर होली ते लिखण छो ज़रूरी आहे ?

बिया हेतिरा विषय आहिन चाहे उहो नीरव मोदी हुजे या दिल्ली में सरकार ऐं ऑफिसरन जो झगड़ो जिन ते बिना रिसर्च किये बि लिखी सघजे थो त पोय होली ते न लिखण जी दांहं छो ?

रिवायत मूजिब मुहिंजे सवालन जे लफज़ी रूप में अचण खां अगु निखिमिणेमल जो जवाब हाज़िर हो।

एस पी सर तव्हां अदीबन जी दुनिया में त जनवरी खां तयारी शुरू थी वेंदी आहे। जिन अखबारून मैगजीन्स जा होली ते खास एडिशन्स छपिजणा हूंदा आहिन उन्हन जी लिस्ट ठाही वेंदी आ ऐं पहिंजी पसंद जे पंजन अठन खे फोटो समेत पहिंजी कविता या लेख फरवरी आखिर तायीं पहुंचायिण जी खबरदारी वरती वेंदी आहे।

होली सालिन ऐं भेणियिन जो साल जो पसंदीदा इकलोतो ड़िणु आहे जहिं डीन्ह ते उन्हन जी हर शरारत हर गुनाह माफ़ हूंदो आहे। 

एस पी सर डिसो न हिंदी फिलमुन वारा इन होली जो केतिरो न फायदा वठण चाहे उहो महबूब खे संदस पिरीं सामहूं छेणिण वास्ते फिल्मायो वियल रंग बरसे भीगे चुनरिया हुजे या डाकुन जे अचण खां अगु इन्तिज़ार में गायल होली के दिन दिल मिल जाते है – इन्हन होली गीतन ते फिल्म जो अधु बजट खरचु करण में बि परहेज़ न था कनि।        

निखिमिणोमल छा पियो इन ते मुहिंजो को खास ध्यान कोन हो। मुहिंजी हालत त होली ते हद खां वधीक भंग पीतल खां जुदा कोन हुयी। जीयं इहो शख्सु हर हर पियो सागी गालिह चवन्दो आहे तीयं मुहिंजी ख़ुशी जी सुई बि  निखिमिणेमल जी चयल गालिह एस पी सर तव्हां अदीबन जी दुनिया में ते अटकी पयी हुयी। निखिमिणेमल जे चवण जो मतलब हो त दुनिया वारन जी नज़रुन में मां बि अदीब थी आहियां।  बिना कमायी नानका मुखे साधन जहिड़ो कर। इहा गालिह सचु साबित थी वयी ?