ख़ुशीअ जा ख़ूनी

हीउ हिकु नवों सुबह हुओ ऐं चाहिँ जो स्वाद माणीईंदे निखिमिणोमल हिक नयें सवाल सां गडु सामहु वेठो हो। तव्हां शायद त मुहिंजी साराह जा लफ़ज़ पिया गोलिहियो जो मां निखिमिणेमल खे हर भेरे संदस सवाल जो जवाब डयी खेस खुश करे वापस मोकलिण में कामियाबी पियो हासिल कियां पर मां विचार पियो कियां – दाद डियण पियो चाहियां निखिमिणेमल जे अभ्यास करण वारे रुख खे । आखिर बिना अभ्यास ऐतिरा ऐं रोज़ नवां सवाल पुछण किथां मुमकिन आहे ? खैर इहो सभु पोय पहिरियूं गालिह निखिमिणेमल जे नवें सवाल जी।

एस पी सर डिसो हिन सवाल जो सिधो जवाब डिजो का बि चालाकी करण जी कोशिश न कजो। मां डिठो आहे त जडिहिं बि को तव्हां खां पुछंदो आहे त खुश आहियो सर ? त तव्हां सिधो जवाब न डयी चवंदा आहियो। असांजो छा आहे ? असां आहियूं रिटायर माणुहू सो असां खे कहिड़ो टेंशन ?

मुखे ड्रपु लगण लगो त अजु किथे निखिमिणोमल मुहिंजी ई खल न लाहे वठे।

एस पी सर सचु थो चवांव गुजरियिल महीने खन खां विचार पियो कयां त छा टेंशन न हुअण ऐं माणुहूअ जो खुश हुअण हिक ई गालिह आहे ?

बियो को हुजे हाँ त शायद मां टारे वियो हुजां हां पर हिते गालिह हुयी निखिमिणेमल जी जेको हर सुबह जो अची किलाक खनु वेही मुखे मुहिंजे जियरे हुअण जो अहसास कराये वेन्दो आहे। सो लाचारी में जवाब डिनो।

डिसो साईं निखिमिणामल ख़ुशी दर हकीकत हिकु निसबति अहसास आहे जेको हिक शख्स खां बिये तायीं वेन्दे वेन्दे बदिलीजी वेन्दो आहे। मतलब जेका गालिह मुहिंजे लाय ख़ुशी जी आहे सा कहिं बिये वास्ते दुख जी थी सघे थी। तव्हां डिठो हूंदो नंढा बार घिटिअ में वेठल कुते खे परियां बिही पथर हणन्दा आहिन ऐं जहिं बार जो पथर कुते खे लगे सो ट्रपो डयी पहिंजी ख़ुशी जो इजिहार करे। इहो पथर हणण बारन वास्ते ख़ुशी आ त कुते वास्ते तकलीफ।

मां समझी वियुम त टेंशन न हुअण ऐं ख़ुशी बी अलग अलग अहसास आहिन पर एस पी सर पोय तव्हां सिधो खुश आहियां छो न चवन्दा आहियो ? छा तव्हां खुश न आहियो ? निखिमिणेमल जो इहो नवों सवाल हुओ।

डिसो साईं निखिमिणामल अजु खुश रहण विरली गालिह थी वयी आहे। उहे माणुहू त गोलिहिया न लभन जिन में ख़ुशी विराहिण जी खूबी हुजे पर ख़ुशी जा खुनी त हर घिटी हर शहर में 24 किलाक बारहां महीना तैयार वेठा आहिन न ? सो माणुहुअ वास्ते खुश रहण का सवली गालिह कोन रही आहे।

इहो त तव्हां सचु था चवो एस पीं सर हाणोके वक़त में को विरलो आहे जेको बिये जी ख़ुशी में रंडक न आणे।

हकीकत में जे डिसजे त असां पहिंजी ख़ुशी जा खूनी पाण पैदा कयूं पिया। साईं निखिमिणामल अजु असां पहिंजिन खुशियन खे बियन जो मोहताज़ बणाये छडियो आहे। वड़े पुट्र जो धंधो बराबर न थो हले या नंढे पुट्र खे नौकरी न मिलण जहिड़ियूं गालिहियूं असां जी ख़ुशी वास्ते ग्रहण साबित थियन पयूं। बियो त परे घरवारी जो देर सां चांहि डियण या असां जो मनपसंद खाधो तैयार न करण बि असांजी ख़ुशी जो खूनी बणजे पये थो ।

साईं निखिमिणामल हकीकत में ख़ुशी हिकु अंदरूनी अहसास आहे पर असां ख़ुशी खे बाहिरिन गालिहिन ते मदार रखण जी आदत विझी छड़ी आहे। जडिहिं को असां जी तारीफ करे थो असां ख़ुशी महसूस कयूं था पर नुक्तचीनी असां जी ख़ुशी जी खूनी पयी साबित थिये।

निखिमिणोमल त वञी पहिंजे घर पहुतो। उम्मीद त हीउ पढ़ी तव्हां खे ख़ुशी थी हूंदी। तव्हां जी ख़ुशी जे इजिहार जे इंतिज़ार में।