सपनन वारी लोकशाही Dream Democracy

जे जियरो रहण ज़रूरी आहे त सपना डिसण बि इंसान जो ज़रूरी बुनियादी हकु आहे।

इहो मुहिंजो न पर असां जे दुलारे साईँ निखिमिणेमल जो चवण आहे। तव्हां खबर हुजे या न हुजे एस पी सर न रुगो माणुहू पर जानवर बि सपना डिसन्दा आहिन ऐं मज़े जी गालिह आहे त जानवरन जे सपनन जो मुख्य मरकज़ी विषय हूंदो आहे इंसान थियण। हाणे तव्हां बुधायो एस पी सर त घणा आहिन उहे माणुहू जेके जन्म त माणुहुअ जे रूप में वठन था पर सजी उमिर उन्हन खे इंसान बणिजण जो मोको ई कोन थो मिले त तव्हां पाण विचार कियो त जानवरन जे इंसान बणिजण जे सपनो जो कहिड़ो हश्र थींदो हूंदो।

इंसान बि अजीब आहे एस पी सर सुमहंण खां पोय त सपना डिसे थो पर अहिड़ा बेशुमार माणुहू आहिन जेके खुलियिल अखियइन सां बि सपना डीसी सघन्दा आहिन। हाणे डिसो न इहो सपनो न आहे त बियो छा आहे त असां समझूं त असां जे देश में लोकशाही आहे मतलब माणुहुन जी हुकूमत, माणुहुन वास्ते ऐं माणुहुन वसीले।

छा हकीकत बि इहा आहे ? न एस पी सर असल में त अजु बि असां राजशाही में ज़िंदगी गुजारियूं पिया। डिसो न असां जे चूंडियल ऐवजिन खे ? छा इन्हन जी हलत, इन्हन खे मिलण वारियूं सहूलियतूं ऐं इन्हन जो सामाजिक रुतिबो कहिं राजा महाराजा खां घटि आहे ?

शायद त ओचितो निखिमिणेमल जे सरीर में कहिं टी वी चॅनेल ते बहस में वेठल कहिं सियासी पार्टी जे नुमाईन्दे जी आत्मा दाखिल थी वयी हुयी छो जो जेको अगलो जुमलो संदस वात मां निकतो तहिं जो मथियें विषय सां को लागापो ई कोन हो।

तव्हां या देश जा बेशुमार शहरी भले कांग्रेस खे केतिरियूं ई गारियूं छो न डियो पर एस पी सर इहो त तव्हां खे कबूल करणो पवंदो त इहा कांग्रेस आहे जेका गोलिहे कढ़ी आयी आहे त अजु जेका बीजेपी जी सरकार आहे तहिं खे 35 % खां बि घटि वोट मिलियल आहिन मतलब देश जा 65 % जे आसपास जा शहरी देश में बीजेपी जी सरकार जे खिलाफ आहिन। 

बलिहारी असां जे देश जी लोकशाही जी जो हिते अहमियत सिर्फ तादाद जी आहे। हाणे डिसो न एस पी सर इन कांग्रेस जी मेहरबानी सां कर्नाटक में उन पार्टी जो मुख्यमंत्री बणिजी रहियो आहे जहिं जा केतिरा ई उम्मीदवार ज़मानत बचायिण जेतिरा वोट हासिल करण में बि कामियाब कोन थिया आहिन।

पर साईं निखिमिणामल करे बि त कुछ न थो सघिजे ? आखिर असां जी लोकशाही जा कायदा ई अहिड़े नमूने ठहियल आहिन।

न एस पी सर ! अहिडी गालिह कोन आहे। हकीकत में त इहो चवण डेखारे थो त न त असां वटि हालतुन में बदलाव आणिण जी हिमथ होसिलो आहे ऐं न ही असां हालतुन में सुधार आणिण जी इच्छा रखूं था ?

त तव्हां ई बुधायो न त आखिर देश जा आम नागरिक छा कनि ? पंजन सालन में हिकु मोको मिले थो सो हर सुजाग शहरी वञी वोट करे अचे थो।

डिसो एस पी सर असां जो वोटिंग सिस्टम गलत नमूने जो न चईजे त घणन सियासी पार्टियिन जे लिहाज़ खां ठहियिल ई कोन आहे। सभ खां वधीक वोट हासिल करण वारो खटी थो वञे। तव्हां शायद ध्यान न डिनो हूंदो एस पी सर पर आम तोर खटण वारे खे 35 खां 40 सैकड़ो वोट मिलन्दा आहिन मतलब जिन वोट कयो उन्हन में वधीक उहे हुआ जिन खे इहो शख्स पहिंजे नुमाईन्दे तोर पसंद कोन हो।

एस पी सर जे देश जा नागरिक पहिंजी ते पवन त इलेक्शन कमीशन ऐं सरकार खे वोटिंग सिस्टम में हेठियूं तबदीलियूं आणिण वास्ते मज़बूर करे सघन था।

[1] खटण वारे लाय इहो ज़रूरी हुजे त उन खे थियल वोटन जे 50 % खां वधीक वोट मिलिया हुजन ऐं ऐराजी जे कुल वोटरन मां घटि में घटि 75 % वोटरन वोट डिनो हुजे।

[2] वोटिंग ऐं गणप जे विच में 2 -3 डिन्हन खां वधीक अरसो न हुअण घुरिजे।

[3] जे 75 % वोटर्स वोट न था कनि या कहिं बि उम्मीदवार खे थियल वोटन जे 50 % खां वधीक वोट न था मिलन त जेको पहिरियों आरतवार अचे उन ते उन ऐराजी में वरी वोटिंग थींदी।

[4] जे बिये भेरे बि 75 % वोटर्स वोट न था कनि या कहिं बि उम्मीदवार खे थियल वोटन जे 50 % खां वधीक वोट न था मिलन त इन्हन सभनी उमीदवारन खे 3 सालन वास्ते चूंडिन में बहरो वठण लायक न ज़ाहिर करे हिक महीने खां पोय वरी चूंडूं करायिण घूरिजन।

[5] चूंडिन खां पोय कहिं बि पार्टी खे जे बहुमत न थो मिले त सिर्फ उहे पार्टीयूं मिलीकरे सरकार ठाहे सघन थियूं जिन चूंडिन में राज्य या सजे भारत में 25 % खां घटि सीट्स ते हिक बिये जी मुखालफत में उमीदवार न बिहारियो हुजे। आज़ाद उमीदवार सरकार खे सपोर्ट त करे सघे थो पर न त उन खे को ओहदो मिलन्दो न ई उहो मंत्री थी सघन्दो। सागे नमूने उहो कहिं पार्टी में शामिल बि न थो थी सघे। 

मिसाल तोर उ.प्र. में 80 सीट्स आहिन हाणे जे बीजेपी, कांग्रेस, सपा ऐं बसपा मां हर हिक इन्हन मां 20 खां वधीक सीट्स ते पहिंजो उमीदवार बिहारियो आहे मतलब इन्हन सीट्स ते वोटर्स खे इन्हन चईनी पार्टीयिन मां कहीं हिक जे उमीदवार खे पहिंजे ऐवजी तोर चूंडिणो आहे त रिजल्ट ज़ाहिर थियण खां पोय इन्हन मां ब या वधीक मिलीकरे सरकार न थियूं ठाहे सघन।

त दोस्तों हाणे तव्हां बुधायो त छा असां जे निखिमिणेमल जी हीउ सपनन जी लोकशाही हकीकत जो जामो पाइण जोग आहे या न ?