चूंडियूं ऐं जनता जो इशारो

काफी घणे वक़त खां पोय न सिर्फ तव्हां जी पर मुहिंजी पिण हिकु भेरो वरी निखिमिणेमल सां मुलाकात थी रही आहे। उमीद त तव्हां खे याद हूंदो त रिटायर थीयिल खुशहाल निखिमिणोमल कहिं समे नियम सां रोज़ सुबह साणु चाहिँ पियण ऐं पहिंजन अज़ब सवालन ऐं गज़ब तर्कन सां मुहिंजे मथे जो खानो ख़राब करण वास्ते हाज़िर रहन्दो हुओ।

विच में खेस बी पी ऐं कॉर्डिअल अरेस्ट सबब अस्पताल में बि दाखिल करणो पियो हो ऐं मुहिंजे वास्ते इहा अज़ब जी गालिह हुयी त अस्पताल मां छुटी मिलन्दे ई निखिमिणोमल भारत में सिंधी सियासी पार्टी ठाहिण जे कम में लगी वियो। संदस सियासी दौरन सबब असां जी रोज़ सुबह जी मुलकात जो सिलसिलो टूटिणो ई हुओ सो टुटी वियो।

अजु सुबह जो पुराणे वक़त ते निखिमिणोमल मुहिंजे सामहूं अची वेठो त मुखे बि ओतिरो ई अज़ब लगो जेतिरो तव्हां खे लगी रहियो आहे। आखिर काफी समे खां पोय कहिं शख्स जो वापस अचण कब्र मां मुरदे जे बाहिर अचण जहिड़ो थिये न।

त एस पी सर, हीउ जेको बी जे पी हिंदी भाषी राज्यन में हाराये वयी आहे इन बाबत तव्हां जो रायो छा आहे ? छा इन्हन राज्यन जी जनता सजे भारत जी नुमाईंदगी कन्दे को इशारो बि कियो आहे ?

वारिस शाह त चयो हुओ त चाहे कुछ बि थिये पर इंसान पहिंजियूं आदतूं कोन बदिलाये। मुखे बि यह गालिह अजु सचु महसूस थी रही आहे। सिंधी सियासी पार्टी जो आजीवन बरपा कन्दड़ अध्यक्ष बणिजण खां पोय बि निखिमिणोमल कोन बदिलियो आहे। अगे बि सवाल पुछि पाण जवाब डियण शुरू कन्दो हो ऐं अजु बि मुंहिंजे जवाब जे इन्तिज़ार खां अगु ई पाण शुरू थी वियो।

त एस पी सर इहा त चूंडिन खां अगु ई खबर हुयी त राजस्थान में बी जे पी न खटन्दी। राजस्थान आहे राजाउन महाराजन ऐं हर हालत में पहिंजी आन बान ऐं शान कायम रखण वारन जो मुल्क सो हर विधानसभा चूंडिन में सरकार बदिलायिण जो सिलसिलो त कायम रहिणो हुओ न।

पर साईं …. मां कुछ चवण जी कोशिश मस कयी जो

न न एस पी सर पहिरियूं मुहिंजी गालिह पूरी थियण डियो। मध्यप्रदेश वास्ते चवन पिया त मामे शिवराज जो पेरू अंगद जो पेरू आहे सो उन खे केर लोडे सघन्दो। छतीसगढ़ बाबत बि इहो आम रायो हुओ त चांवरन वारे बाबा जे रमल में रुखिनो विझण सवलो कोन आहे पर डिसो न बीजेपी जी सभु खां ख़राब हालत छतीसगढ़ में ई थी आहे न।

त साईं निखिमिणामल छतीसगढ जी जनता बुधायो त असां भारत जा वाशिंदा उन हालत में न आहियूं जो असां वटि बीजेपी खे वोट डियण खां सिवाय बियो इलाज कोन्हे।

खुलियल अखियन सां सपना न डिसो एस पी सर !

निखिमिणेमल जे आवाज़ में बुलंदी जो अहसास थियो पर शायद त सियासी अगुवान थियण जो असर आहे जो बरवक़त आवाज़ जाब्ते हेठ बि अची वियो।

इहो जेको कांग्रेस जलसा पयी थी करे तहिं खे शायद याद न आहे त राजस्थान में सभ खां वधीक मशहूर नारो हुओ मोदी तुमसे बैर नहीं वसुंधरा की खैर नहीं।  

सागे नमूने बीजेपी खे बि सोचिणो पवन्दो त जे अंगद जो पेरू बि डाँवाडोल थी सघे थो, चांवरन वारे बाबा जे रमल में रुखिनो अची सघे थो त 2019 में कुछ बि थी सघे थो।

इहो सचु आहे त भारत जा वाशिंदा उन हालत में न आहिन जो असां वटि बीजेपी खे वोट डियण खां सिवाय बियो इलाज कोन्हे पर इहो बि सचु आहे मरता क्या नहीं करता।