फॉरवर्ड करण जो लुतफ

अजु सीउ थोरो वधीक आहे सो सुजाग थियण खां पोय बि सवड जे सुख खां पाण खे महरूम करण जी चाहत जी गैर हाज़िरी सबब बिस्तरे ते पियो पासा वरायां पर वड़ा चयी विया आहिन त सुख त नसीब सां मिले। वजन्दड़ घिन्डणी न सिर्फ लाचार कियो त पाण खे सवड जे सुख खां महरूम कियां पर इहो बि बुधायो त नियम मूजिब निखिमिणोमल अची वियो आहे। गरम चाहिं जी चुसकी भरींदे ई साईं निखिमिणेमल जो दिमाग सुजाग थी पियो ऐं हू शुरू थी वियो।

एस पी सर ! तव्हां जे चवण ते मां नन्दलाल जन खे पंहिंजन व्हाट्सएप्प कांटेक्ट में त शामिल कियो हो पर सचु पुछो त बेज़ार थी पियो हुअम। सुबह थिये मस धणी जा गुड मॉर्निंग जा ब चार मैसेज हाज़िर। सिजु लहे मस जो धणी गुड नाईट जा मैसेज फॉरवर्ड करण जी तयारी में लगी वंञे। मां सोचियां पियो त आखिर इहे गुड मॉर्निंग जा फ़ॉरवर्डेड मैसेज न अचन हां त छा मुहिंजी मॉर्निंग गुड न हुजे हां ? जे को गुड नाईट न चवन्दो त छा रात जो सपनन में ड़ायिण जा दर्शन थींदा ?  

साईं निखिमिणामल ………

न ! न ! एस पी सर ! पहिरियूं मुहिंजी गालिह त पूरी थियण डियो ? अजु सुबुह जो छतीसगढ जे इन सजण जो मैसेज आयो :
अंगूठा घिस गया Good Morning की पोस्ट करते करते पर मज़ाल है कोई यहां चाय को भी पूछ ले।

डिसो न एस पी सर ! धणी केतिरो ज़बरदस्त कमु करे रहियो आहे ? को बि संदस शुकुरगुजार न आहे पर धणी लगो पियो आ नियम सां बियन जी मॉर्निंग गुड करण जे कम में।

मां कुछ चवां बि त कीयं ? निखिमिणोमल माठि करे त मुहिंजा चप चुरन न ?

सचु पुछो त एस पी सर ! इन धणीअ मुखे तव्हां जी महानता जो अहसास करायो। हिकु इहो धणी आहे जहिं खे को चाहिं वास्ते बि न थो पुछे चाहे हू सुबुह साण प्रभु नाम जपिण बदिरां बियन जी मॉर्निंग गुड करण में रुधियो पियो आहे। बिये पासे तव्हां आहियो एस पी सर जेके सुबुह सां न सिर्फ मुहिंजे सुवालन जा जवाब था डियो पर मथां रोज़ चांहि बि था पियारियो।

चाहिं जो ध्यान अचण सबब निखिमिणेमल गालिहायिण बंद करे चाहिं पियण शुरू कयी ऐं मां इन मोके जो फायदो वठन्दे चयो।

साईं निखिमिणामल इन फॉरवर्ड करण जो बियन जे शुकुरगुजार थियण या न थियण सां को लागापो ई कोन आहे। को बि शख्स फॉरवर्ड इन करे न कन्दो आहे त बिया उन जी तारीफ कनि या खेस ज्ञानवान मंञिन। फॉरवर्ड करण वारा त सिर्फ इन करे फॉरवर्ड कन्दा आहिन छो जो फॉरवर्ड करण जो पहिंजो हिकु खास लुतफ थिये। 

बराबर सही था चवो एस पी सर ! जहिं गंगा में टुबी कोन डिनी उन खे कहिड़ी खबर त गंगा जो पाणी केतिरो थधो आहे। अमिताभ जी हिक फिल्म में बि डायलॉग हुओ न अरे गधिड़िया तुला दारू जी मज़ा कुठे माहिती ? तूने कभी दारू पी ही नहीँ। इहो त सिर्फ असां फॉरवर्ड करण वारन खे ई खबर त फॉरवर्ड करण खां पोय संतोष मिलन्दो आहे त असां त समाज डांहुं पहिंजो फरज़ु पूरो कियो बाकी बिया वंञी डिसन।  तव्हां बि चवन्दा आहियो न एस पी सर त दुनिया में संतोष खां वड़ो को बियो सुख कोन्हे। 

निखिमिणोमल त पहिंजे नियम मूजिब फॉरवर्ड करण जो लुतफ माणिण वास्ते बिना मोकिलाये हलन्दो थियो आहे पर तव्हां कहिंजो पिया इन्तिज़ार कियो। पोस्ट मां लिखी पूरी कयी आहे तव्हां खे त बस हिकु बटण दबाये फॉरवर्ड करण जो लुतफ वठणो आ।