मुलाहितो महांगों मरण

अजु वरी साईं निखमिणोमल सामहूं आहे पर अजु सिलसिलो बदिलियिल मतलब अजु सवाल मुहिंजा त जवाब साईं निखमिणेमल जा आहिन।
हिक गालिह त बुधायो साईं निखमिणामल भारत में त कोरोना जे बीमार जो ठीक थी घर मोटिण जो मतलब आहे अस्पताल जो लखन में बिल ?
हमेशा वांगुर निखमिणेमल मुखे पहिंजी गालिह पूरी करण न डिनी।
मुखे हिक गालिह बुधायो एस पी सर ! वड़ी अस्पताल ऐं वड़े डॉक्टर जो मतलब तव्हां जे मूजिब छा आहे ?
साईं निखमिणामल जहिं अस्पताल में सभु सहूलियतूं हुजन – बीमार जो खियाल रखण वास्ते नरसुन ऐं वार्ड बॉय जो मजमो [[वडो तादाद ] हुजे सा वडी अस्पताल ऐं जेको डॉक्टर होशियार आजमूदेगार हुजे सो वडो डॉक्टर।
इते ई तव्हां गलत आहियो एस पी सर ! वडो डॉक्टर मतलब जहिं जो पीउ / सहुरो वड़ो पेसे वारो हुजे। वडो डॉक्टर मतलब वडी अस्पताल – मतलब शानदार इमारत [बिल्डिंग ] – जाच करण वास्ते वडियूं मशीनियूं ऐं संभाल वास्ते अणगणियो हॉस्पिटल स्टाफ – मतलब करोड़न में सीड़प [investment ] ऐं लखन में महीने जो खरचु।
त छा हिकु गरीब आम सिंधी
बस ! बस ! एस पी सर ! मां समझी वियुम। तव्हां त सिंधी समाज जे सोचिण जे तरीके ऐं विशवास खे ई गुम करण पुठियां पिया आहियो।
पर साईं निखमिणामल मां कहिड़ी गलत गालिह चयी आहे ?
मुहिंजी गालिह ते ध्यान डियो एस पी सर ! असां जे सिंधी समाज जो सोचिण जो तरीको ऐं विशवास आहे जो महाँगो सो मुलाहितो डिसो न असां सिंधी घिटी जे किराणे वारे वठां पंजे रूपये जी हैड्र खरीद न था कयूं पर मॉल में वंञी पंजाहु रुपयन में खरीद करे अचूं था छाकाण त जो महाँगो सो मुलाहितो
पर साईं
न न पहिरियूं मुहिंजी गालिह त पूरी थियण डियो एस पी सर ! असां सिंधियिन कडहिं इन गालिह जी परवाह न कयी त सिंधी स्कूल बंद था थींदा वंञन ऐं असां जो ज़ोर आहे लखें रुपया फी वठण वारन स्कूल में बार खे पढ़िहायीण ते छाकाण त सिंधी समाज पूरो पूरो विश्वास रखे थो जो महाँगो सो मुलाहितो
मां सोचियां पियो गालिह किथां शुरू थी ऐं किथे अची पहुति आहे पर असां वटि साईं निखमिणेमल जी गालिह बुधण खां सिवाय बियो इलाज कोन्हे। सो अचो त कोरोना जे इलाज जे महाँगे हुअण खे पासीरो रखी साईं निखमिणेमल जी गालिह ते ध्यान डियूं।
तव्हां शायद ध्यान न डिनो आहे एस पी सर ! हुअं त सुरगवासी खे समाज में को मुलहु कोन हुओ पर संदस पोयां बारिहे मारके ते सउ बिन जी रोटी मोकिलाये हुन जे मरण खे महांगों बणाए समाज में मुलाहितो स्थान [जगह – रुतिबो ] कामियाबी सां हासिल न था कनि ? थियो न इहो मुलाहितो महांगों मरण
हमेशा बांगुर पहिंजी गालिह ख़तम करे मुहिंजी गालिह ते ध्यान डिने बिना साईं निखमिणोमल त हलियो वियो पर मां वेठो सोचियां पियो त मुहिंजा सोशल मीडिया जा दोस्त कहिड़ा उपाय वठी मुहिंजो मरण मुलाहितो महांगों मरण बणाइन्दा ? जे तव्हां खे को उपाय समझ में अचेव त ज़रूर लिखजो ऐं मुखे मुलाहितो महांगों मरण समझण में मदद कजो।