सुंञी सलाह

कुछ बि चवो एस पी सर ! पर तव्हां मुखे सुंञी सलाह खां बि लाहे छडियो इहा गालिह सुठी न आहे।
मां न पियो समझां त वरी कहिड़ी गालिह वास्ते मां साईं निखमिणेमल खां सलाह न वरती आ।
तव्हां पाण त वेठा चाहिं ढुक जो मजो वठो पर हिकु भेरो बि मुखे सुंञी सलाह बि न कयी।
पर साईं असां त वीडियो कॉल वसीले जुडियल आहियूं न ? सो बिलाशक हिक बिये खे डिसी ज़रूर सघऊं था पर मां तव्हां खे चांहि आछियां इहो त मुमकिन न आहे।
चांहि पियारिण जी गालिह करे केर थो ? मां त सुंञी सलाह करण जी गालिह पियो कियां ! खैर छडियो इन खे। इन सलाह जी गालिह ते मुखे याद आयो त काल्ह मां हिते अमेरिका में ताजो ताजो ठहियल दोस्त गेमी [असली नालो घुमणमल] जी मुजाज़पुर्सी वास्ते अस्पताल वियो हुयुम।
मां थधो साहु भरियो हल सुंञी सलाह मां त छुटकारो मिलियो।
खबर अथव एस पी सर त मुखे खबर पयी त बिना घूरे सलाह डियण सिर्फ भारत जे सिंधियिन जी आदत न पर सभनी सिंधियिन जे स्वभाव जो हिसो आहे।
मां सोचियो वरी सलाह ! हाणे सुंञी सलाह खां पोय सखणी सलाह खे बि शायद मुहं डियणो पवंदो।
बुधो था न एस पी सर ! अस्पताल जे आलीशान कमरे में गेमी जा कुछ बिया मकानी सिंधी दोस्त शानदार कुरसिन ते वेठा हुआ ऐं गालिह हले पयी गेमी – घुमणमल जी बीमारी जी।
हिक जी सलाह हुयी त अमेरिका में त कुछ थियणो कोन्हे सो गेमी खे भारत वंञी आयुर्वेदिक इलाज करायिण घुरिजे।
बिये खे हिकदम याद अची वियो त संदस हिक अमेरीकन दोस्त जे पीउ खे अमेरीकन डॉक्टरन जवाब डिनो जो पर उहो भारत जे केरल मां आयुर्वेदिक मसाज वारो इलाज कराये आयो ऐं केतिरा ई साल जियरो रहियो।
मां सोचियां पियो आखिर इहे मुफत जूं बिना घुरे मिलण वारियूं सलाहूं असां जो केतिरो न ज्ञान वधायिन थियूं। खास करे जे को अस्पताल में भरती हुजे। उन बीमारी ऐं उनजे इलाज बाबत डॉक्टर खे बि ओतिरो ज्ञान न हूंदो जेतिरो इहे बिना घुरे डिनल सलाहूं तव्हां खे डियन थियूं।
कहिड़ो विचार पिया कियो एस पी सर ! बी हिक सलाह बुधंदव त तव्हां जो त मथो ई फिरी वेन्दो। गेमी – घुमणमल जे हिक दोस्त जो चवण हुओ त रोज़ सिज लथे महफ़िल सजाये विहो पोय छा जो डॉक्टर ऐं छा बीमारी ?
अज़ब जी गालिह इहा थी जो मुखे बि हिक सलाह मिली। जे अमेरीका में रहणो अथव त जलद पहिंजो मेडीकल इन्शुरेंस करायो।
साईं इहा त सही सलाह अथव। बुधो आ अमेरिका में सभ खां महंगी गालिह आहे अस्पताल में भरती थियण।
उन गालिह खे छडियो एस पी सर ! मुखे सलाह डियो त मां हिते रहां या भारत मोटी अचां ?
मां पहिंजा करम पिटिया। वरी मुई सलाह !
दोस्तों हाणे तव्हां इन अस्पताल – गेमी या घुमणमल जी गालिह खे पासीरो रखी सलाह डियो – सुंञी सखणी सलाह न पर सुठी, सही ऐं सियाणप भरी सलाह त आखिर मां साईं निखमिणेमल खे कहिड़ी सलाह डियां ?