बियो कहिड़ो इलाज़ आहे ?

चवन पिया त दुनिया में को अहिड़ो मरज़ु कोनिहे जहिंजो इलाज न हुजे पर हकीम लुकमान चयी वियो आहे त शकु करण लाइलाज बीमारी आहे। शायद त संदस वंशजन ई बियो को रसितो न हुअण जी लाचारी जे इजहार वासिते बियो कहिड़ो इलाज आहे चवण जी रिवायत शुरू कयी हूंदी। हाणे डिसो न मां चाहे निखमिणेमल जी कहिं बि गालिह सां एकराय न हुजां पर उन जी गालिह बुधण अयं तवहां खे बुधायिण खां सिवाय मूं वटि बियो कहिड़ो इलाज आहे ?गालिह शुरू थी आ शक अयं निखमिणेमल खां सो असां वटि इन दायरे अंदर रहण खां सिवाय बियो कहिड़ो इलाज आहे ? रोज़ जे नियम मूजिब हिकु भेरो वरी निखमिणोमल अची सामहूं वेठो अयं वड़े आवाज़ में पहिंजो अचण ज़ाहिर कंदे चाहिं जी फरमायिश कियायीं, हाणे मुहिंजी भागभरीअ वटि को बियो इलाज कोन हुओ सो निखमिणेमल सां गडु मुखे बि चाहिं मिली।
गरम चाहिं जी चुसकिन सां पहिंजो अंदरु ठारइंदे निखमिणोमल चयो
एस पी सर हीउ जेको गुजरात में कांग्रेस मंदिर दरशन जो कारियकिरम शुरु कियो आहे या वरी हाणे गुजरात में आरती जो पिरोगिराम या महाराष्ट्र में मंदिरन जे दरशन करण जो कारियकिरम करण जी रिथा करे रही आहे सो शकु न थो पैदा करे ? हाणे डिसो न कांग्रेस जे मंदिर दरशन खां पोय बि वोट त बीजेपी जा वधिया आहिन न ? हिते मुखे हिकु बियो शकु बि आहे त उतरप्रदेश अयं दिल्ली जी मुखालफत वारियूं सियासी पार्टियूं जेको चवन थियूं त बटण कहिड़ो बि दबायो वोट त बीजेपी खे ई मिलंदो सो सही त कोन आहे ?
मां समझी वयुम त अजु निखमिणोमल हकीम लुकमान जे लाइलाज मरज़ जो शिकार आहे सो मूं वटि हा – हूं करण खां सिवाय बियो इलाज कोनिहे। सो मां बि चयो
थी सघे थो त तवहां जो विचार दुरुसत हुजे पर इन में बि हिक शंका आहे। चाहे गुजरात में बीजेपी जा वोट वधिया आहिन पर सीट्स त घटिजियूं आहिन न ?
मां समझां पियो त निखमिणोमल हाणे विषय बदिलाये मुखे बियो कहिड़ो इलाज आहे वारी हालत मां मुक्ती हासिल करण में मदद कंदो पर हुन त गालिह अगते वधायींदे चयो
एस पी सर इहा गालिह ई मुहिंजे शक खे वधाये थी। मंदिर दरशन जे कारियकिरम खां पोय बि कांग्रेस चाहे गुजरात में सरकार न ठाहे सघी पर उहा गुजरात में बीजेपी खे कमज़ोर करण में कामियाब त थी आहे न ?
निखमिणोमल त आहे रिटायर माणुहू मथां वरी बयी पुट अयं धीउ अथस पैसे वारा सो हुन वटि वकतु ई वकतु आहे पर रिटायर हूंदे बि मूं वटि त कमु आहे सो गालिह खतम कंदे मां चयो
तवहां बिलकुल सही चवो था पर असां वटि बियो कहिड़ो इलाज आहे सिवाय शक जो इजहार करण जे।
शायद निखमिणोमल हार कबूल न करण जी तैयारीअ सां आयो हो।
एस पी सर मुखे पूरो पूरो शक आहे त कांग्रेस गुजरात जो मंदिर दरशन जो कारियकिरम 2019 जी लोकसभा खां अगु सजे देश में कंदी पर शायद कांग्रेस खे खबर कोनिहे त हिन वक़त माणुहुन वटि बीजेपी खे वोट डियण खां सिवाय बियो इलाज कोनिहे ? 
निखमिणोमल त हली वियो पर मुहिंजे मन में शकु पैदा करे।
छा हकीकत में भारत जे वोटरन जी इहा हालत आहे जो उन्हन वटि बीजेपी खे वोटु डियण खां सिवाय बियो इलाज कोन्हे ?
मां बि विचार कियां पियो अयं को शकु कोनिहे त तवहां बि विचार कंदा त छा बीजेपी जी सरकार कम कोन किया आहिन ?
छा असां उन हालत में आहियूं जो चयजे त बीजेपी खे वोटु डियण खां सिवाय असां वटि बियो कहिड़ो इलाज आहे ?