आशा चांद

पढ़ायी पूरी करण खां पोय आशा चांद बैंक ऑफ़ इंडिया सां जुड़ी बैंकिंग ऐं फाइनेंस जे खेतर में कमु करण शुरू कियो पर थोरे ई अरसे में खेस पहिंजी रूह जी बेआरामी जो अहसास सतायिण लगो। खेस इहो महसूस थियो त संदस ज़िंदगी जो मकसद हीउ खेतर न आहे। खुश किसमती सां हुअ सिंधी साहित्य जी मशहूर शख़्सियतुन जहिड़ो कि मोहन गेहानी, कला प्रकाश ऐं डॉ मोती प्रकाश [सिंधी कौमी तरानो लेखियो वेन्दड़ “आंधी में जोत जगायिण वारा सिंधी” जो रचनाकार ] सां उन्ही सुञाणप वारे लागापे में हुयी। बालपणे जे घर जे माहोल, सिखिया , जुनून ऐं हिन साहित्यकारन जे संग आशा चांद खे सिंधियत जी महफ़ूज़ी ऐं सिंधी भाषा जे वधारे लाय ता हयाती कमु करण जे फेसिले ते पहुचण में मदद कयी।

इहो बि हिकु संजोग आहे जो, धंधे जे लाडे वारी सिंधी कौम में हिक नवन विचारन वारी क्रांतिकारी औरत जे रूप में बरपा थियण वारी, आशा चांद ऐं नामवर क्रांतिकारी अमर शहीद हेमू कालानी जो जन्म सागे डीन्ह [23 मार्च ] ते थियल आहे। 1992 में आशा पहिंजी माउ सुंदरी उतमचंदाणी जी अण छपियल रचनाउन खे शाया करण जी मुराद सां जय सिंधी पब्लिकेशन शुरू कयी। हिन पब्लिकेशन न सिर्फ सिंधी साहित्य जे शैदायिन खे केतिरन ई किताबन – जिन में सुंदरी उतमचंदाणी जी लिखियल नंढी कहाणिन जो हिकु किताब बी शामिल आहे – जी सूखड़ी डिनी पर आशा माउ खे संदस जन्म डीन्ह ते संदस लिखियल कविताउन हिक ऑडियो सी डी जे रूप में जन्म डीन्ह जे तोफिहे जे रूप में डियण में बि कामियाब थी।

नवन विचारन जी पुठिभरायी करण वारी आशा चांद 2000 में सिंधी भाषा ऐं सिंधियत जी महफ़ूज़ी वास्ते ऑडियो विजुअल मीडिया कमि आणे “सिंधी साहित्य जी त्रिमूर्ती” उनवान सां हिकु वीडियो पेश कियो। सागे साल में दुबई जे हम खियाल सिंधियन सां मिली करे हुन सिंधी भाषा ऐं सिंधियत जे वाधारे जे मकसद लाय कमु करण वारो NGO सिंधी संगत बरपा कियो। हुअ इहो बि महसूस करे रही हुयी त भारत जे वड़न शहरन ऐं विदेश में रहण वारन सिंधी कुटुंबन जे घरन मां सिंधी भाषा तमाम तेज़ी सां गुम थी रही आहे सो हुन सिंधियत सां लागापो रखण वारन विंदर जे प्रोग्रामन ज़रिये सिंधी भाषा बचायिण जी कोशिश शुरू कयी।

सिंधी भाषा बचायिण जी पहिंजी नयीं तज़वीज़ खे हकीकत जो ज़ामो पहिराइन्दे 2001 में हुन मशहूर गायिका आबिदा परवीन जो बिन डीन्हन जो हिकु कार्यक्रम दुबई में रखियो। इन शो जी उम्मीद खां वधीक कामियाबीअ संदस होसिलो वधायो। हिन वक़त तायीं आशा खे अहिड़न 15 खां बि वधीक कार्यक्रम करण में कामियाबी हासिल थी आहे छो जो हाणे अहिड़ा प्रोग्राम दुबई ऐं यू ऐ ई जे सिंधियन जे सालाने कार्यक्रमन जो हिसो बणिजी पिया आहिन। हिनन प्रोग्रामन जी कामियाबीअ इहो बि साबित कियो आहे त विंदर जे प्रोग्रामन वसीले नवजवान सिंधी पीढ़ी खे सिंधी भाषा ऐं सिंधियत जी वाकफियत डियण जो आशा चांद जो फेसिलो गलत न हुओ।

सिंधी भाषा जे बचाव वास्ते हुन “Let’s Learn Sindhi” ऐं “Pahakas & Isthillah” जहिड़ा ऑडियो विजुअल साधन कामियाबी सां पेश किया आहिन। हिन वक़त आशा चांद सिंधी बारन लाय “Nursery Rhyme Singing competition” जहिड़े प्रोग्राम ते वधीक ज़ोर डयी रही आहे। बतोर टेलीविजन फिल्म प्रोडयूसर आशा चांद अटकल 25 नाटक ऐं फिल्म्स पेश करे चुकी आहे जिन मां केतिरा ई भारत में डी डी गुजराती ऐं डी डी इंडिया ते त सिंध में KTN चैनल ते बि डेखारिया वया आहिन । भारत में टेलीविजन ते भारत सरकार सिंधी चैनल शुरू करे इहा घुर करण वारन में अगिरी आशा चांद वेझडायी में सिंधी भाषा वास्ते हिकु मोबाइल एप्प बि पेश कियो आहे।

इहा गालिह सही आहे त आशा चांद सिंधी भाषा वास्ते अरबी लिपी जी पुठिभरायी करण जी सख्त हिमथायी आहे ऐं संदस अकीदो आहे त सिंधी भाषा बचायिण जी हलचल में देवनागिरी तोड़े रोमन लिपी को खास योगदान डियन इहो मुमकिन न आहे पर इहो बि सचु आहे त खेस पूरो पूरो अहसास आहे त सिंधी गालाहिण वारन जो तादाद वधायिण सिंधी भाषा बचायिण जो सभ खां बेहतर उपाय आहे। शायद त इहो अहसास ई खेस “Nursery Rhyme Singing competition” जहिड़े प्रोग्राम खे कामियाब बणायिण वास्ते घुरिबल सलाहियतूं डयी रहियो आहे।

खुशनसीब आशा चांद खे चांद पंजाबी जे रूप में अहिड़ो जीवन साथी मिलियो आहे जेको न सिर्फ सिंधी भाषा ऐं सिंधियत जो शैदायी आहे पर इन गालिह जो बि पूरो पूरो धियान रखन्दो आहे त आशा जो होसिलो कायम रहे ऐं खेस सामाजिक कमन वास्ते मुनासिब वक़त मिलन्दो रहे। संदन धीउ मूमल बि माउ जो खियाल रखण सां गडोगडु संदस प्रोग्रामन में बहरो वठी माउ जी मदद कंदी आहे।

आशा चांद जी कामियाबी में संदस कमु करण ऐं ज़िंदगी जे फलसफे “असां हिक बिये सां ग़ैर रज़ामन्द थियण ते रज़ामन्द आहियूं ” जो वडो हथु आहे छो जो इहो फ़लसफ़ो न सिर्फ खेस पहिंजे नमूने ऐं पहिंजन खयालन मूजिब कमु करण जी आज़ादी डिये थो पर गडोगडु सामहूं वारे खे नुक़तचीनी जा सख्त अखर वापिरायिण खां बि रोके थो।