बबीता शिवदासानी

फेमस सिंधी एक्ट्रेस – करीना ऐं करिश्मा कपूर
बबीता जो जन्म 20 अप्रैल 1947 ते फ़िल्मुन लाय चाहु रखन्दड शिवदासानी कुटुंब में थियो। बबीता बॉलीवुड जी मशहूर सिंधी अदाकारा ऐं हिन्दी फिल्म्स जे सुनहरे परदे वारी दुनिया में मिस्ट्री गर्ल जे नाले सां मशहूर साधना जी भाट्रयी आहे सो कुदरती तौर नंढी उमर खां ई बबीता फ़िल्मी दुनिया वास्ते पाण में कशिश महसूस कन्दी हुयी।

कुदरत बबीता खे कशिश कन्दड़ ऐं मन मोहीन्दड शख्सियत जो मालिक बणायो आहे सो मशहूर फिल्म प्रोडयूसर जी पि सिप्पी बबीता खे पहिंजी फिल्म “दस लाख ” जी हीरोइन तौर चूंडियो। पर बबीता जी पहिरियीं फिल्म जेका रिलीज़ थी सा दस लाख न पर “राज ” हुयी जहिं में संदस हीरो हो राजेश खन्ना। “राज” अगते हली बॉलीवुड जे पहिरियें सुपर स्टार जो लकब हासिल कन्दड़ राजेश खन्ना जी पिणु पहिरियीं फिल्म हुयी।

फिल्म्स में कमु करण वारे वक़त में बबीता लखें कॉलेज पढ़हन्दड छोकिरिन वास्ते फैशन जी प्रेरणा हुयी। बबीता खे उन समे में टाइट चूड़ीदार ऐं कुरिते, कनन में घेरेदार वडियूं वालियूं ऐं चेहरे खे ढके छड़िण वारो गो – गो चश्मो फैशन स्टाइल जे तौर कम आणिण जी रीत शुरू करण वारी लेखियो वेन्दो आहे। बबीता खे न त स्विमिंग अीन्दी हुयी ऐं न वरी हुअ का सुठी डांसर हुयी तहिं हूंदे बि हुन फ़िल्मुन में केतिरा यादगार किरदार निभाया आहिन।

बबीता जो फ़िल्मी जीवन को खास लम्बो न पर 1966 खां 1974 तायीं सिर्फ 8 सालन जे अरसे ऐं 19 फिल्म्स ताईं महदूद हो छो जो बबीता पहिंजे स्कूली डींहन जे प्यार रणधीर कपूर – जहिं सां गडु हिक फिल्म “कल आज और कल ” में बि कमु कियो हो – सां शादी करण जो फैसलो कयो। शादी खां पोय बबीता कपूर खानदान जी रिवायत मूजिब फ़िल्मुन में कमु करण बंद करे छडियो।

रणधीर कपूर ऐं बबीता जे घर बिन धीउन करिश्मा ऐं करीना जन्म वरतो पर जोड़े में के अहिडा निफ़ाक़ पैदा थिया जो शादी शुदा ज़िन्दगी गडु न गुजारे सघिया। उन्हन बिन्ही धार धार रहण जो फैसलो कियो। हिन वक़त बबीता करीना सां गडु अंधेरी में रहन्दी आहे। वडो थियण ते करिश्मा ऐं करीना कपूर खानदान जी रिवायत जे बरख़िलाफ़ हिंदी फिल्म्स में कमु करण जो फैसलो कयो।