खरु या भूर Boss of Toss

छा त अजीब गालिह पियो बुधां मां एस पी सर ! चवन था त आय सी सी टेस्ट क्रिकेट में मैच शुरू थियण खां अगु थियण वारे टॉस खे बंद करण जी गालिह ते विचार करे रही आहे ? बियो त परे इंग्लैंड जो बोर्ड बि इन जी हिमायत पियो करे।

तव्हां सही बुधो आ साईं निखिमिणामल। छा आहे जो मेजमान टीम पहिंजी टीम वास्ते मददगार पिच तैयार करे थी ऐं टॉस जीतो मैच जीतो खे हकीकत जो जामो पहिराईन्दे मेहमान टीम खे हाराये छड़ी थी।

तव्हां जी गालिह सही थी सघे थी एस पी सर ! पर भारत खे त विरोध करण घुरिजे न ? आखिर न सिर्फ क्रिकेट या कहिं बी रांदि में त छडियो पर टॉस त असां भारत जे माणुहुन जी ज़िंदगी जो तमाम अहम हिसो आहे।

एस पी सर मुखे त इहो अहसास पियो थिये त इहे आय सी सी वारन बॉलीवुड जू फिल्म्स बि कोन डिसन्दा आहिन ? न त इन्हन खे खबर हुजे हां त इहो टॉस ई आहे जहिं शोले में अमिताभ बच्चन खे धर्मेंद्र ऐं हेमा मालिनी वास्ते क़ुरबानी डियण जो मोको डिनो। थोरो विचार कियो एस पी सर जे इहो टॉस न हुजे हां ऐं अमिताभ मरे न हां त छा गबर जियरो बची सघे हां ?

मुखे त इहा हिक वडी साज़िश पयी लगे एस पी सर ? इहो टॉस खतम करण जो फेसिलो इन करे न थो थिये जो मेहमान टीम खे बचाउ मिले ?

तव्हां खे इन्हन अंग्रेजन जी पूरी खबर कोन अथव एस पी सर , दर हकीकत में इहा साज़िश आहे भारत जी पीढ़िन खां उन्हन जूं यादूं खसे वठण जी। याद कियो एस पी सर नंढे हूंदे डीकी डकर खेड़ण खां अगु असां टुटल मटके तो टुकर – ठिकरी गोलिहिंदा हुआसीं छो जो टॉस करण वास्ते कहिं वटि सिको कोन हूंदो हो तहिं करे इन ठिकरीअ ते हिक पासे थुक हणी मथे उछाले खर भूर जो फेसिलो कन्दा हुआसीं।

केतिरो न मजो हूंदो हो एस पी सर असां ठिकरी जी गोलिहा में मसाणन में पहुची वेन्दा हुआसीं ऐं उतां लावारिस अम्ब जे वण तां अम्बिडीयूं पटे वठन्दा हुआसीं !

हाणे डिसो जे क्रिकेट में टॉस न थींदो त छा असां जो पोट्रा डोहिट्रा असां खां पुछंदा त असां जे ज़माने में टॉस थींदो हो या न ? जे थींदो हो त कीयं थींदो हो ? तव्हां पाण विचार कियो एस पी सर टॉस बंद करण जो मतलब कहिं पीढ़ी खां यादूं खसिण जी साज़िश न आहे त बियो छा आहे ?

मां कुछ चवण जी नाकामियाब कोशिश ज़रूर कयी पर तव्हां खे त खबर आहे न त जे हिक दफ़ो निखिमिणेमल गालिहायिण शुरू कियो त हू कहिं जी न बुधंदो आहे।

टॉस त असां भारतीयन जे जीवन जो हिकु अहम हिसो आहे। हाणे इहा कहिं खे खबर त मथे उछालियिल सिको खर पासे थो किरे या भूर थी अची ? टॉस मतलब नसीब जी गालिह आहे।

इहे अंग्रेज त पोयें जन्म में विश्वास कनि कोन सो एस पी सर इन्हन खे नसीब जी अहमियत किथां समझ में अचे ? मतलब इहो टॉस न करण जो फेसिलो न सिर्फ कहिं पीढ़ी खां यादूं खसिण जी साज़िश आहे पर असां जे विश्वास खे बदिलायिण जी बि कोशिश आहे।

हमेशा वांगुर अजु बि निखिमिणेमल खे पहिंजी गालिह पूरी थियण खां पोय विहण ग़वारा कोन हुओ।

मां शायद त चवण पे चाहियो त अज़ोके वक़त में जेको डाढो सो गाबो मतलब डिसो न 5 – 10 एम एल ऐ खे कुछ करोड़न जी लालच डयी पहिंजे पासे करण गलत आहे पर मुख्यमंत्री जे ओहदे जो लालच डयी हिक सजी पार्टी खे पहिंजे पासे करण मतलब लोकशाही खे बचायिण।

खैर इहो फेसिलो तव्हां पाण कियो त टॉस बंद करण जो मकसद क्रिकेट खे वधीक बेहतर बणायिणु आहे या निखिमिणेमल जे विचारन मूजिब इहा हिक साज़िश आहे ?