निखिमिणेमल जो मोटी अचण

उन बरसात ऐं तेज हवाउन वारी सुबूह जो घिंटी वगी हालांकि पहिंजी आदत मूजिब मां उथण पोय दरवाजो खोले सिरफ बेकिडे अची वेठो हुयुस। घिंटीअ जे आवाज ते मूहिंजे उथण खां अगु ई मुहिंजे सामहूं हुओ तव्हां जो सिकी लधो साईं निखिमिणोमल।
व्हाई यू आर सो सरपिराईजड एस पी सर? मैं कोई ईद का चांद तो हूं नहीं न? मां त तव्हां जो पुराणो सुबूह जी चाहिं जो संगी आहियां न।
तव्हां खे बि महसूस थियो हूंदो त बेहद वडो फरकु अची वयो आहे साईं निखिमिणेमल जी सिंधी में।
न साईं एहिड़ी त गालिह कोन आहे पर छारीअ हेठां कांव वांगुर गम थियल मोटे या अरसो अगु दफन कयल मुरदो कबर फाडे सामहूं अची वंञे त विचार त करणो पवे थो।
निखिमिणेमल चाहिं जो ढुक भरे चयो।
तव्हां सचु चवन्दा आहियो एस पी सर – नयीं नूंह नंव डीन्ह लथे पथे डह डीन्ह।
साईं निखिमिणामल मुखे तव्हांजे हिन पहाके जे कमि आणिण जो मतलब समझ में न आयो?
मुहिंजी गालिह ते धियान डिने बिना हमेशा वांगुर निखिमिणेमल पहिंजो दुहिल पाण पिटिण शुरू रखियो।
मुखे हाणे अहसास पयो थिये एस पी सर त तव्हां जो चवण -वण जे बिन खां हथ जे हिक जी अहमियत वधीक थिये – सचु आहे।
तव्हां जो इहो चवण बि हिकदम सही आहे त – पहिंजो विसतार वडो करण वारन मां सिरफ उहे वण जियरा रही सघन जेके पहिंजी पाड़ुन सां जुडियल रहन था।
पर साईं निखिमिणामल आखिर थियो छा आहे?
छा थींदो एस पी सर! जेको थियो आहे सो न त नओं आहे ऐं न ई को सिरफ मूं सां थियो आहे। इहो त जुगन खां थींदो आयो आहे ऐं शायद त जेसी तायीं सिंधी आहिन थींदो ई रहंदो।
पर साईं —
साईं निखिमिणोमल पहिंजो पुराणो फॉर्म हासिल करे चुको हुओ सो हुन हमेशा वांगुर -मुखे न बिन में न बारिहन में लेखीन्दे – पहिंजो गालिहायिण शुरू रखियो।
तव्हां खे त खबर आहे एस पी सर त अरसो थियो जो मां सिंधी समाज वासिते हिक इंटरनेशनल संस्था ठाही हुयी ऐं केतिरिन ई हजारें सिंधियिन खे जोडे सिंधी भाषा जे वाधारे जो कमु शुरू कयो हुओ।
बराबर साईं पर भारत में त सवें हजारें संस्थाउं आहिन न जेके सिंधियत जे फैलाव जे मकसद सां कमु पयूं कनि?
तव्हां जी इहा गालिह बिलकुल सही आहे त देश में बेशुमार अखिल भारतीय सिंधी संस्थाउं आहिन पर सचु इहो आहे त संस्थाउन जो इहो वडो तादाद ई भारत में सिंधियिन जे पहिंजन हक हासिल करण में – राजनीती में मुनासिब हिसेदारी हासिल करण में वडी रुकावट बणिजी वयो आहे।
साईं निखिमिणोमल पर इन वडे तादाद वासिते त तव्हां अगुवान जवाबदार आहियो न?
निखिमिणेमल चाहिं ढुक भरण वासिते पहिंजी फरमाइश ते घुरायल चाहिं जो बियो कोपु हथ में खंयो।
मां हिकु भेरो वरी कोशिश कयी त इन मोके जो फायदो वठां।
साईं निखिमिणामल तव्हां चयो त सिंधी संस्थाउन जो तादाद सिंधी समाज जी राजनीती में तरकी जी राह में रुकावट बणिजी वयो आहे इहा गालिह पूरी तरह सां साफ न थी आहे।
निखिमिणेमल तकिडो तकिडो चाहिं ढुक भरे कोपु हेठि रखन्दे चयो
धिआनु डयी बुधिजो एस पी सर! मां पॉइंट टु पॉइंट किलीयर थो कयांव
01. हर सिंधी संस्था जो बानीकार या बरपा कन्दड चाहे थो त उन जी संस्था पहिरियों नंबर सिंधी संस्था ऐं उहो पाण सजे देश जे सिंधियिन जो अकेलो अगुवान लेखियो वंञे।
02. संस्था खे सरकारी मदद मिले, पहिरियों नंबर लेखी वंञे, हुन खे वडे सिंधी अगुवान जो दरिजो मिले इन वासिते राजनैतिक रुतिबो हुजण बेहद जरुरी आहे।
03. जनसंख्या जे आधार ते सिंधी समाज खे या कहिं सिंधी अगुवान खे राजनैतिक रुतिबो हासिल थिये घटि में घटि भारत में त इन गालिह न जे बराबर उमीद आहे।
04. सिंधी अगुवानन तोडे सिंधी संस्थाउन वटि पेसे जी कमी त आहे कोन सो हर सिंधी अगुवान जलसा करे लोकल (बियन समाजन जे) मशहूर राजनेताउन खे घुराये शहर, राज्य ऐं देश में राजनैतिक रुतिबो हासिल करण चाहे थो।
05. भारत में लोकशाही आहे ऐं लोकशाही जो मूल मंत्र आहे गडिहन अगियां गजर लटकायिण में कामियाबी हासिल करण सो भारत जी हर राजनैतिक पार्टी इहो ई कमु पयी करे।
06. का पार्टी फ्री डियण जी गजर पयी लटकाये त का करज माफी जी या वापारिन जी सहूलियत वारा कायदा ठाहिण जी गजर।
07. सिंधी समाज जी धंधे में कामियाबी ऐं सियाणे हुजण जी मशहूरीअ सबब राजनैतिक पार्टिन खे खबर आहे त हिते गजर लटकायिण सां कमु न थींदो।
08. सिंधी समाज में बधी न आहे जे हुजे हां त ऐतिरियूं वधीक संस्थाउन जो वज़ूद न हुजे हां बस इन गालिह जो फायदो हर राजनैतिक पार्टी वठे थी ऐं सिंधी समाज जे जलसन में शामिल त थिये, सिंधी समाज खां भरपूर चंदो बि वठे थी ऐं पार्टी में बिन चैयन सिंधियिन खे नंढो वडो ओहदो डयी खुश बि करे थी पर सिंधी समाज खे बियन घटितायी वारन समाजन वांगुर लोकशाही जा नागिरक हक मिलन इन गालिह ते न त विचार करे ऐं न ई कोशिश करे।
09. हर राजनैतिक पार्टी खे खबर आहे त इलेक्शन वकत हिक न त बी, बी न त ट्रियीं सिंधी संस्था उन पार्टी जो प्रचार करे सिंधी वोट हासिल करण में मदद कन्दी।
साईं निखिमिणेमल कोपु खणी चाहिं जो आखिरी ढुक भरे हेठि रखन्दे चयो।
मुखे खबर आहे एस पी सर तव्हां जी गालिह अध में आहे पर मुखे वंञणो आहे। बुधो आ कुझु महीना थिया जो अजमेर जे कहिं सजण योग ते रोज जो वेबिनार शुरू कयो आहे सो अजु मां शामिल थी डिसण थो चाहियां त देश मां घणा सिंधी उन में शामिल था थियन ऐं इन वेबिनार करे घणो योग सिखिया आहिन।
वापस मोटी वंञण खां अगु ज़रूर वरी चाहिं पियण ईंदो मांव पर कडिहिं इन गालिह जो मदार डीन्ह राति हलण वारन वेबिनारस मां फुरसत मिलण ते आहे।