हालु बीमार जो

कार हली रही हुयी ऐं मां सोचियां पियो त आखिर छा थियो आहे जो निखिमिणोमल ऐड़ो वधीक इसरार करे मुखे अस्पताल वठी हली रहियो आहे। कुछ डीन्ह ई अगु बुधायो हुआइयं त डॉक्टर खेस सेहत सुठी रखण ऐं बी पी खे कंट्रोल में रखण वास्ते मॉर्निंग वॉक जी सलाह डिनी आहे।  मुहिंजा विचार कहिं नतीजे रुपी मुकाम ते पहुचण जी पूरी पूरी कोशिश करे रहिया हुआ पर हमेशा वांगुर निखिमिणोमल रुखनो साबित थियो।

एस पी सर ! असां ह्लूं पिया मुहिंजे स्कूली दोस्त फ़ुरसतमल जी मिज़ाज़ पुरसी वास्ते। तव्हां खे इहा त खबर आहे त दिली वासी फ़ुरसतमल बिन साल खां असां जे शहर में पियो रहे पर शायद तव्हां खे खबर न हूंदी त हू ट्रिन डीन्हन खां अस्पताल में दाखिल आहे।

विशवास कियो या न कियो इहो बुधी जेको आथत मुखे मिलियो सो शायद त निखिमिणेमल खे डिसी फ़ुरसतमल खे मिलण बि मुमकिन कोन आहे।

सियारो पूरो थी चुको आहे ऐं उनहारे जी तपत पहिंजो असर डेखारिण शुरू करे चुकी आहे। मुंद बदलिजण जे असर सबब कुछ डीन्हन खां खंघि बुखार मुखे तंग पियो करे ऐं घरवारी रोज़ पयी चये त डॉक्टर खे डेखारे अचो। मुखे लगो त शायद निखिमिणेमल इहो बुधी वरतो आहे।

अस्पताल जो नालो बुधी त मुहिंजा पघर ई निकरी विया हुआ। शहर में जेके ब चार महांगा ऐं वड़ा अस्पताल आहिन इहो उन्हन मां हिकु आहे। मां सोचियां पियो त जे सिर्फ डॉक्टरन रिपोर्ट्स करायिण लाय बि चयो त मुहिंजी त सजे महीने जी पेंशन पूरी थीं वेंदी। शुकूर आ वाहेगुरु जो निखिमिणोमल मुखे फ़ुरसतमल सां मिलायिण वास्ते गडु वठी आयो आहे।

साईं निखिमिणामल सुबह जो त तव्हां फ़ुरसतमल बाबत कुछ न चयो हो ?

एस पी सर ! तव्हां त समाज में ऐतिरो उथो विहो कोन पर हक़ीक़त इहा आहे त अस्पताल में दाखिल कहिं अज़ीज़ जो हालु पुछण वञण बि हिक कला आहे। हाणे डिसो न सुबह जो मुखे इहा खबर किथे हुयी त फ़ुरसतमल खे कहिड़ी बीमारी सबब अस्पताल में दाखिल करायो वियो आहे ? छा इन बीमारी सबब खेस कडिहिं दिली में बि अस्पताल में दाखिल करायिणो पियो हो ? जे हा त कहिड़ी अस्पताल में ऐं उते डॉक्टरन छा चयो हुओ ? वगैरह ! वगैरह !

मुहिंजे वास्ते वाकयइ में इहा नयीं गालिह हुयी छो जो मां त समझंदो हुयुम त अस्पताल में दाखिल अज़ीज़ खे आथत ब लफ़ज़ चवण खोड़ आहे। आखिर चयो वेन्दो आ न त ज़ुबान अधु हकीम आहे।  

मुखे इहा खबर ई कोन हुयी त बीमारी जे किसम मूजिब आथत जे अखरन जो किसम ऐं मिक़दार बि डॉक्टर जी दवा जे डोज मूजिब बदिलजण ज़रूरी आहे। कार अस्पताल पहुची चुकी हुयी ऐं पहिंजन विचारन में खोयिल मां निखिमिणेमल सां गडु लिफ्ट में चढ़ी पंदिरिहे माडे ते पहुची वियो हुयुम।

फ़ुरसतमल अस्पताल जे प्रायवेट वार्ड जे हिक सुइट में दाखिल हुओ। बाहिरियें कमरे में बदक जहिड़ी सफ़ेद पोशाक में हिक नर्स वेठी हुयी जहिं जे पुठयां वारी भित ते लगियिल मन मोहीन्दड़ बार जी आलिशान तसवीर शांत रहण जो इशारो करे रही हुयी। असां जे अंदर दाखिल थींदे ई सामहूं वारो कांच जो दरू खोले फ़ुरसतमल जो पुट्र बाहिर आयो ऐं निखिमिणेमल खे चवण लगो।

अंकल कुछ वकतु हिते विहो। छा आहे जो नासिक मां मुहिंजा साहुरा आया आहिन बस थोरी देर में डैडी फ्री थी वेन्दा। कांच जी आलिशान सेंट्रल टेबल जे बिन्ही पासन ते रखियिल आलिशान मखमली कुरसिन ते वेहि हुनन जो गालिहायिण शुरू थी वियो।

हीउ वार्ड लगे थो हाणे शुरू कियो आ अस्पताल वारन ? निखिमिणेमल जो सवाल हुओ।

हा अंकल हर हिक सुइट में ट्रे कमरा आहिन। बाहिर नर्स वास्ते रिसेप्शन अलग। विचों ऐं वड़ो कमरो मरीज़ वास्ते , हिकु बैडरूम घर जे भातिन लाय ऐं हिकु बिन दरवाज़न वारो रूम आये वये लाय।

भाड़ो बि झझो रखियो हूंदो न अस्पताल वारन ?

अरे अंकल आखिर कमायिजे कहिड़े डीन्ह जे लाय थो ? जे बीमारी वक़त बि खर्च जो खियाल कजे त पोय कमायिण जो फायदो कहिड़ो ?

हा बेटा जी बराबर आहे आखिर मरण वक़त त माणुहू खे इन गालिह जो अफ़सोस न हुजे त डीहुं रात हिकु करे जेको पेसो कमायो सो कहिं कमि न आयो ?

सेण अखियन नेण सो अंदर त देर पयी ऐं मां वेठो पियो तंग थियां। इहो त शुकूर जो उन छोकरे  फ़ोन वगी ऐं खबर पियस त संदस साहुरा मायट्र त फ़ुरसतमल मां फुरसत पाये हेठ वंञी पहुता आहिन सो उहो अस्पताल खां बाहिर डांहुं त असां अंदिरियें कमरे में फ़ुरसतमल सां मिलण वास्ते वधियासीं।