तारीख बदली रही आहे !

त एस पी सर ! नयें साल जूं एडवांस में वाधायूं हुजनव। सीअ जे सतायल कारी बाहुन ऐं अजीबोगरीब स्लोगन्स छपियल पहिंजे ब्राउन जैकेट जी खरगोश जहिड़ी टोपी खे पहिंजे मथे तां हेठ कन्दे निखिमिणेमल चयो।

पर साईँ निखिमिणामल असां त सिंधी आहियूं न ? असां जो नओं साल त चेट्री चंड्र खां शुरू थिये जेको हिन साल 06 अप्रैल छंछरवार ते आहे, सो वाधायूं डियण जी ऐतिरी तकड़ छो पिया कियो ?

तकड़ ! मां त समझां पियो त लेट थी वियो आहियां ? अजु 31 दिसंबर आहे मतलब साल 2018 जो आखिरी डींहुं सुभाणे खां 2019 शुरू थी वेन्दो।

मुहिंजी गालिह खे बुधो अणबुधो करे निखिमिणोमल शुरू थी वयो ऐं हमेशा वांगुर मूं वठि माठि बाकी बची।

हाणे मुखे ब गालिहियूं बुधायो पहिरियों त तव्हां जो नयें साल जो रिजोलुशन छा आहे ? बियो हिन साल जी कहिड़ी हिक गालिह तव्हां 2019 में बि कायम रखण चाहियो था ?

रिजोलुशन जी त गालिह ई न कियो त बेहतर साईं ! तव्हां पाण गुंजीरियल ट्रिन सालन खां वठी पाण सां वायदो पिया कयो त नॉन वेज खायिंण बंद कयुम ? छा इहो रिजोलुशन पूरो थियो आहे ?

तव्हां त अखर पकड़े वेठा आहियो ? गालिह खे समझो एस पी सर ! इहा हिक रिवायत आहे। नयें साल जो स्वागत कन्दे रिजोलुशन बुधायिण।

मतलब नांगु हुजे न हुजे तव्हां जो मकसद आहे लीक कुटिण।

इन्हन पहाकन जो पीछो छड़ियो एस पी सर ऐं अजु त पियण जो पुरसुकूं लुतफ वठो। हुंअ बि हीय 31 दिसंबर खास अथव ?

छा खास रोज़ वांगुर सिर्फ तारीख ई त बदली रही आहे न ? हा साल बि 18 जे बदिरां 19 थी वेन्दो पर इहो त हर भेरे दिसंबर में थिये पियो न।

करे छड़ियव न न्यूटन जे बिल्ली ऐं संदस बार खे घर अंदर मोकलिण वास्ते बंद दरवाज़े में ब टुंग करायिण जहिड़ी गालिह। थोरो ध्यान डियो एस पी सर अजु ऐकविहीं सदी जो 18 सालु 2018 पूरो थी रहियो आहे। सुभाणे खां 2019 शुरू थी वेन्दो।
मुखे माठि में वेठल डिसी निखिमिणोमल शुरू थी वयो।

तव्हां विचार करण, लेख लिखण वारन जी इहा ई मुसीबत आहे एस पी सर ! सवली गालिह तव्हां खे सवलायी सां समझ में कोन अचे ? हाणे जे अजु ऐकविहीं सदी जा 18 साल पूरा पिया थियन त उहा सुभाणे खां बालिग लेखी वेन्दी न। मतलब आज़ाद खुद मिखितयार पहिंजा फेसिला पाण करण जी अखितियारी हासिल कियल। इलेक्शन में वोट करण जो हकु हासिल करण वास्ते बि बालिग थियण ज़रूरी आहे न ?

ठीक साईं निखिमिणामल तव्हां गालिह कबूल त लोकशाही उमिर जा 18 साल पूरा थियण खां पोय वोट करण जो हकु डिये थी पर छा ऐकविहीं सदी जा 18 साल पूरा पिया थियण खां पोय आम माणुहू बि उन खे बालिग थियण जो हकु डींदो ? छा वक़त जे बालिग थियण जो अहसास कन्दे आम माणुहू बि बालिग जहिड़ी हलत हलन्दो ?

तव्हां त मुंझाये विधो एस पी सर ! वक़त जे बालिग थियण खां पोय बि इंसान बालिग हलत न थो हले। हाणे डिसो न राजस्थान में छा थियो ? उहो ई जेको हर भेरे थींदो आहे। हिन भेरे तूं त बिये भेरे हू। तव्हां जे पहाकन जी ज़ुबान में चवां त शींह खां बचण वास्ते वाघुन जे तलाव में ट्रिपो डियण।

मां बि त इहो ई पे चयो न साईं निखिमिणामल ! तारीख बदिलजण ते ऐतिरो वधीक खुश थियण बेमानी आहे। खुश त तडहिं थिजे जो असां तारीख [Date] न पर तवारीख [History] बदिलायिण में कामियाब थियूं।