देवनागिरी लिपी ऐं वेबसाइट हैकिंग

अजु हिक भेरो वरी साईं निखिमिणोमल चांहि जो स्वाद माणीदें माणीदें मुहिंजो टेन्शन घटि करण जो कमु बि कियो। तव्हां खे त खबर आहे ई त हुन जे वातां एस पी सर बुधंदे ई मुहिंजो ब्लड प्रेशर पेट्रोल जो अघु बणिजी पवे जेको घटिजे त विरले पर वधे रोज़ थो।
अजु निखिमिणेमल शुरुआत कयी एस पी सर हीउ जेको सोशल नेटवर्किंग साइट्स तां डाटा चोरी जो मामिलो हली रहियो आहे न ? या थोरा डीन्ह अगु भारत सरकार जे किन खातन जी वेबसाइट हैक थियण जी जेका न्यूज़ हुयी  उन बाबत तव्हांजो रायो छा आहे ?
तव्हां वास्ते इहो सुठो हुजे या न पर मुहिंजे वात खोलिण खां अगु ई हुन पाण ई जवाब डियण जी शुरुआत करे छड़ी।
तव्हां खे त खबर हूंदी ई – तव्हां ज़रूर पढिहियो हूंदो – एस पी सर इहा अज़ब जी गालिह न आहे त चवन था देवनागिरी लिपी वेबसाइट हैकिंग बि रोके सघे थी ? 
इहो सही आहे साईं निखिमिणामल मुंबई यूनिवर्सिटी जे हिंदी जे प्रोफेसर डॉ करुणा शंकर उपाध्याय मूजिब जे वेबसाइट जे पासवर्ड वास्ते हिंदी [देवनागिरी लिपी में] जे घटि कम अचण वारन अखरन जो उपयोग कजे ——–इहा त तव्हां नयीं गालिह था बुधायो एस पी सर त वेबसाइट जो बि पासवर्ड थींदो आहे ? मुयी वेबसाइट न थी बैंक खातो थी वियो ? 
साईं निखिमिणामल वेबसाइट हैकिंग जो मतलब आहे वेबसाइट ते जेका जाण वेबसाइट ठाहिण वारन शामिल कयी हुजे उन खे बदिलाये बि जाण डेखारिण। 
इहो त सही आहे एस पी सर पर इन गालिह जो पासवर्ड सां कहिड़ो लगापो ? 
डिसो साईं जेको वेबसाइट ठाहे थो सो इहो चाहे थो त वेबसाइट ते शामिल जाण में बियो को शख्स का बदल सदल न करे सघे तहिंकरे हू पासवर्ड जो उपयोग करे थो।  थोरे में चयजे त हैकिंग मतलब वेबसाइट जो इहो पासवर्ड गोल्हे लहण। 
इहा गालिह त बिलकुल ठीक था चवो एस पी सर चाबी जे हथ में हूंदी त तालो खोलिण में कहिड़ी देर ? त साईं निखिमिणामल डॉ उपाध्याय जो चवण आहे त हिंदी जा घटि वापर वारा अखर देवनागिरी में बि सही सही लिखण सवली गालिह न आहे सो इहे पासवर्ड वधीक सलामती वारा आहिन। डॉ उपाध्याय जो इहो बि चवण आहे त जिन बि इहा गालिह मञी पहिंजी वेबसाइट जे पासवर्ड वास्ते देवनागिरी लिपी जो उपयोग कियो आहे तिन जी वेबसाइट हैक न थी आहे।  
मुहिंजे कोप में थोरी चाहिं बाकी हुयी पर निखिमिणोमल उथी हलन्दो थियो।  पुछण ते बिना रुकण जे जवाब डिनायीं।  
हमेशा तव्हां मुखां अगु लिखी छड़ियों पिया एस पी सर पर देवनागिरी लिपी जे हिन फायदे बाबत मां तव्हां खां अगु लिखण चाहियाँ थो सो सुभाणे वरी गड़िजिबो।