डुखिया अखर

मुखे समझ में न थो अचे एस पी सर त वेठे वेठे तव्हां खे थी छा थो वंञे।
मां बिलकुल बि न समझियो हो त साईं निखमिणोमल कहिड़े विषय बाबत पियो गालिहाये पर मुखे खबर हुयी विच में टोकिण मतलब ड़ेभुन जे बिर में हथ विझण।
तव्हां इहा जेका खुशनुमा फ़िज़ां कविता मोकिली ! बुधायो त एस पी सर इहा कहिड़े लिहाज़ खां खुशनुमा हुयी ?
साईं निखमिणामल आखिर तव्हां जेको चवण था चाहियो सो साफ़ साफ़ छो न था चवो ?
तव्हां खे त खबर आहे ई त जे निखमिणेमल खे बीह खरीद करणा हूंदा आहिन त अघु पुछंदो आहे कचालुन जो।
साफ़ ई चँवाव एस पी सर आखिर ऐतिरा डुखिया अखर कम आणिण जी ज़रूरत कहिड़ी आहे ?
जडिहिं खां वठी मां अखरन जी मायना लिखण शुरू कयी आहे साईं निखमिणोमल नाराज़ पियो हले। हुन जो चवण आहे त या त मां इहे अखर कमि न आणियां या मायना लिखण बंद कियां।
साईं निखमिणामल जे इहे अखर कमि न आणिबा त नवजवानन खे खबर कीयं पवंदी त इहे सिंधी अखर आहिन। भाषा खे जियरो रखणो आहे त वक़त ब वक़त अहिड़ा अखर बि कमि आणिणा पवंदा।
इहा भाषा जी गालिह सुठी था चवो एस पी सर ! मां हिते हाणे अमेरिका में थोरी घणी सिंधी बुधा पियो था – सिंधु में जेका सिंधी गालिहायिन था ऐं जेका सिंधी भाषा भारत में वापर में आहे – ध्यान डिजे त लगे ई न थो त हिक भाषा आहे। महसूस थिये थो त ट्रे अलग अलग भाषाउं आहिन जिन में के अखर सागिया आहिन।
साईं निखमिणामल चाहे वक़तसार आसे पासे जे सिंधी घरन में भाजिन जी डे वठु बंद थी वयी आहे पर भाषाउं त सिंधी घर नाहिन न ?
एस पी सर वरी डुखिया अखर ! भला भाषा जो भाजिन जी डे वठु सां कहिड़ो लागापो ?
भाजिन सां त न पर भाषाउन जो पाण में त डे वठु जो नातो कायम आहे न ?
सवलन अखरन में समिझायो न ! एस पी सर !
डिसो साईं निखमिणामल जहिड़ी तरह सां हर सउ मीलन ते बोली बदिलिजी वेंदी आहे तहिडी तरह भाषा बि आसपास जी भाषाउन जे असर हेठ अलग महसूस थिंदी आहे।
खुशीअ जी गालिह इहा थी जो साईं निखमिणोमल बिना मीन मेख कढ़िये चुप वेठियो रहियो।
त साईं अजु भारत में असां सिंधी जेका सिंधी भाषा गालिहायूं था तहिं में 15 – 20 % हिंदी अखर , 25 -30 % अंग्रेजी अखर ऐं बाकी 40 -50 % सिंधी अखर वापिरायूं था सो तव्हां खे इहा सिंधी सिंधु ऐं अमेरिका जी सिंधी खां अलग महसूस थिये थी।
निखमिणोमल त खुश थी वीडियो कॉल बंद करे हले वियो पर दोस्त छा तव्हां बि खुश आहियो ?