EVM ऐं सिंधियत

हीउ जेको लंडन मां EVM ते शंका कंदे चयो वियो आहे त EVM हैक करे 2014 ऐं उन खां पोय थियल चूंडिन जो नतीज़ो बदिलायो वियो आहे उन बाबत तव्हां जो कहिड़ो रायो आहे ? एस पी सर !

को रायो कोन्हे ! ध्यान में आणिण जोग गालिह कोन आहे।

मुहिंजो चवण बुधी निखिमिणेमल जो वातु फाटी पियो। छा गालिह था कियो एस पी सर ! हिते देश जा वड़ा वड़ा न्यूज़ चैनल्स इन गालिह जी खोज में लगी विया आहिन त EVM बाबत शंका ज़ाहिर कन्दड़ जी सचाई छा आहे ऐं छा वाकई 2014 जी बीजेपी जे खटण में EVM को रोल हुओ छा ? देश जी कुछ सियासी पार्टियन त घुर करण शुरू करे छड़ी आहे त 2019 जूं चूंडियूं EVM वसीले न पर बैलट पेपर वसीले थियण घुरजन।

इहो न थिये हां त मुखे ज़रूर अज़ब लगे हां।

चाहिं ढुक पी निखिमिणेमल चयो। छा गालिह आ एस पी सर ? मुखे वाईडो करण जी पक करे वेठा आहियो छा अजु ?

छा आहे साईँ निखिमिणामल जो असां भारतीयन खे आदत आहे। जेकडहिं कहिं चयो त बिल्ली तुहिंजा कन कटे खणी वयी अथयी त बिना इहो विचार करण जे त जे बिल्ली कन कटे वयी हुजे हां त असां खे इहा गालिह बुधण में ई न अचे हां, असां लठ खणी बिली जी गोलिहा में लगी था वंञु। रहियो सवाल मुखालफती सियासी पार्टिन जो त इन्हन जी घुर ते छा ध्यान डिजे इन्हन त देश जी सेना खां सर्जिकल स्ट्राइक जा बि सबूत घुरिया हुआ।

मतलब EVM में का गड़बड़ न आहे ? तव्हां इहो ई चवण चाहियो था न एस पी सर ?

न साईं निखिमिणामल मां चवण चाहियां थो जे इलेक्शन कमीशन चयी चुको आहे – सभनी खे EVM हैक करे डेखारिण जो मोको ड़यी चुको आहे – त न त EVM में का गड़बड़ आहे ऐं न ई EVM खे हैक करण मुमकिन आहे। असां खे कहिं बिये जे चवण ते विशवास करण जी जगह ते पहिंजे देश जी चूंडियूं करायिण वारी संस्था ते भरोसो करण घुरिजे ? हर हर EVM ते शंका ज़ाहिर करण का सुठी गालिह त कोन्हे ?

तव्हां जी इहा शंका जी गालिह बुधी एस पी सर मुखे खियाल आयो आहे त असां जी सिंधियत बि EVM थी वयी आहे  छा ?

पहिंजी आदत मूजिब निखिमिणोमल चीन जी राह ते हलन्दे हलन्दे वंञी अमेरीका पहुतो। EVM जी गालिह खे सिंधियत सां जोड़े छाड़ियायीं ?

अज़ब में न पवो एस पी सर ! ध्यान सां मुहिंजी गालिह बुधन्दव त अहसास थींदुव त मां सही थो चवां त असां जी सिंधियत बि EVM थी वयी आहे।

बिना मुहिंजे जवाब जो इन्तिज़ार किये निखिमिणोमल शुरू थी वियो।

[1] डिसो एस पी सर EVM जी गालिह निकरे थी कहिं खास मोके ऐं माहोल में असां बि सिंधियत जी चिंता कयूं था खास मोकन ऐं माहोल में। मां हिक संस्था जे गोवा इजिलास में वियो हुयुम छा कॉकटेल पार्टी हुजे छा क्रूज़ ते रात जो गोवा जी सुहं जे नज़ारे जी सैर हर हंद हर शख्स सिर्फ इन चिंता में लगो पियो हो त सिंधियत खे कीयं बचाये सघिजे थो।?

[2] हाणे डिसो न एस पी सर कांग्रेस हुजे या बियूं पार्टियूं जे बीजेपी खटियो त EVM में गड़बड़ आहे पर जे इन्हन पार्टिन मां कहिं खटियो त EVM बराबर कम थी करे। सागी हालत सिंधियत जी आहे जे असां खे नयीं संस्था ठाहिण आहे त सिंधियत खतरे में आहे ऐं जे चंदो खपे त सिंधियत जे वाधारे वास्ते कोशिश करणी आहे। मूहिंजे चवण जो मतलब सिर्फ ऐतिरो आहे एस पी सर त जहिड़े नमूने देश जूं सियासी पार्टियूं पहिंजो नफो नुकसान ध्यान में रखी EVM जी गालिह कनि थियूं छा बिलकुल ओहिडे नमूने असां पहिंजी सहूलियत मूजिब सिंधियत जो जिकुर न था कयूं ?

[3]सियासी पार्टियूं त परे आम शहरी बि EVM बाबत राय ज़ाहिर करण में देर न था कनि। हाणे असां जे सिंधी समाज ते अचो एस पी सर त हर सिंधी वटि सिंधियत कायम रखण जो घटि में घटि हिकु तरीको त आहे। सोशल मीडिया ते कॉपी पेस्ट करण वारा बि पाण खे सिंधियत जे रहबरन ऐं माहिरन में शुमारिन था।

[4] जहिड़े नमूने बी पार्टी जे खटण ते EVM खे हार वास्ते जवाबदार बणायो वंञे थो न एस पी सर बिलकुल तहिडे नमूने हर सिंधी शख्सु तोड़े सिंधी संस्था बियन खे डोहु डियण में हिक पल जी बि देर न थी करे।

[5] जहिड़े नमूने इलेक्शन खां अगु ऐं पोय EVM जी गालिह थिये थी तहिडे नमूने छा सिंधियत गालिह बि जलसन सभाउन ऐं सिंधी संस्थाउन जे सालाने इजिलासन तायीं महदूद न थी वयी आहे ?

हाणे तव्हां पाण फेसिलो कियो एस पी सर त मुहिंजो इहो चवण त असां जी सिंधियत बि EVM थी वयी आहे कीयं गलत आहे ?

चाहिं जो खाली कोप हेठ रखी, पहिंजी गालिह पूरी करे निखिमिणोमल हलन्दो थियो बिना इन गालिह ते ध्यान डियण जे त EVM जो उपयोग बैलट पेपर जी जगह ते थी रहियो आहे ऐं बिलकुल मुमकिन आहे त अगते को बियो तरीको वज़ूद में अचे जहिं सबब EVM जो उपयोग बंद थी वंञे।

खैर निखिमिणोमल त सामहूं कोन आहे सो लाचारी में तव्हां खां ई पुछां थो इहो त मुमकिन आहे त चूंडिन में EVM जी जगह ते को बियो तरीको कम अचण लगे पर छा इहो बि मुमकिन आहे त सिंधी कौम जे जीवन में सिंधियत जे विरसे ऐं सिंधी भाषा जी जगह ते बियो कुछ शामिल थी वंञे ?