जी एस रामचंद
TSW Citation
अजु जो सिंधी युथ चाहे उहो पंकज आडवाणी हुजे या को बियो बिलाशक स्पोर्ट्स में बेमिसाल कामियाबी हासिल करे रहियो आहे पर सिंधी युथ जी स्पोर्ट्स में कंहिं बि कामियाबी जी भेट इंडियन क्रिकेट टीम जे कैप्टेन रही चुके जी एस रामचंद जी कामियाबी सां करण बेमानी आहे। असां खे इहो यादि रखणु घुरिजे त रामचंद गुलाबराय सिपहमलानी जंहि समे क्रिकेट में कामियाबी जी बुलंदी ते पहुतो उहो वक़त जो उहो दोर हुओ जो सिंधी बार सिंधी बेतु (बाल गीत) खेड़न्दे कुड़न्दे थींदे ख़राब बुधन्दे गायीन्दे वडो थींदो हुओ । इहो सिरफु बेतु न आहे पर उन समे जी सिंधी समाज जी स्पोर्ट्स बाबत नज़रिये जो ज़ाहिरी इजिहार आहे। अज़ोको सिंधी युथ इन गालिह में खुशनसीब आहे जो जंहि वक़त हू स्पोर्ट्स में कॅरियर करण बाबत सोचे थो त परिवार नाराज़ थियण जी जगह ते खुश थिये थो। जी एस रामचंद जी कामियाबी इन खियाल खां बि लासानी आहे जो उन खां पोय बियो को सिंधी क्रिकेटर कैप्टेन न बणियो आहे। टीम TSW जो खियाल आहे त जी एस रामचंद बाबत पढ़ी सिंधी युथ खे होसिलो मिलन्दो ऐं इहो बिलकुल मुमकिन आहे त असां कंहिं सिंधी क्रिकेटर खे बि इंडियन क्रिकेट टीम जे कैप्टेन जे रूप में डिसूं।
बायोग्राफी - जी एस रामचंद
फेमस सिंधी क्रिकेटर – इंडियन क्रिकेट कैप्टेन – इंग्लिश क्रिकेट लीग
चाहे इहो विशवास करण डुखियो आहे पर इहो सचु आहे त जे गालिह भारत जे सिंधियिन जे स्पोर्ट्स में योगदान जी हुजे त फेमस सिंधी स्पोर्ट्स पर्सन जा नाला गणिण वास्ते आंगिरियूं ई काफी आहिन। इन खां वडो हिकु बियो बि सचु आहे त जडहिं बि कहिं बि सिंधीअ कहिं बि स्पोर्ट्स में बहरो वरतो आहे त आमु तौर हुन आलीशान , बेमिसाल कामियाबी हासिल कयी आहे। चाहे उहो फेमस सिंधी क्रिकेटर नरेंद्र हिरवानी हुजे जहिं पहिंजी लेग स्पिन जे जोर ते पहिंजे पहिरियें ई टेस्ट मॅच में वर्ल्ड रिकॉर्ड जी बराबरी कई हुजे या नंढी उमर [टीन ऐज] जो बिलियर्ड ऐं सिनूकर जो वर्ल्ड चैंपियन पंकज आडवाणी। जे वधीक पुराणे इतिहास में डिसजे त जहिं पहिरियें इंडियन क्रिकेट कैप्टन खे टेस्ट मॅच में ऑस्ट्रेलिया खे हारायिण में कामियाबी मिली उहो हिकु सिंधी रामचंद गुलाबराय सिपहमलानी -जेको जी एस रामचंद जे नाले सां मशहूर आहे- हो।
भारत जी 33 टेस्ट मैचन में नुमाइंदगी करण वारे जी एस रामचंद जो जन्म 26 जुलाई 1927 ते कराची सिंध में थियो हो। रामचंद हकीकत में हिकु आल राउंडर हो छो जो बैटिंग में ताकतवर स्ट्रोक्स, त बॉलिंग में तेज मीडियम पेस ऐं हिकदम सही लाइन ते बॉलिंग कन्दो हुओ। तंहि खां सिवाय जी एस रामचंद हिकु बेहतरीन भरोसेमंद किलोजिंग फील्डर पिणु हुओ। उन समे भारत जी बॉलिंग मुख्य रूप सां स्पिन ते मदार रखन्दी हुयी ऐं इन किसम जी बॉलिंग वासिते किलोजिंग फील्डिंग जी वधीक अहमियत हूंदी आहे। हिन जी पहिरियीं मॅच हुयी सिंध ऐं महाराष्ट्र जे विच में साल 1945 -1946 में । विरहांङें खां पोय संदस कुटुंब मुंबई में रहण लगो हो ऐं भारतीय टीम जे 1952 जे इंग्लैंड दोरे सां हिन जे क्रिकेट जीवन जी शुरुआत थी हुयी।
पहिंजे पहिरिएं टेस्ट मॅच में हेडिंग्ले में रामचंद जे सामहूं हुयी लेन ह्टन जी मज़बूत इंग्लैंड टीम। रामचंद बैटिंग में शानदार जोड़ो (बिन्ही इनिंग में बुड़ी ते आउट थियण) हासिल कियो। इन टेस्ट में रामचंद जिम लेकर [पहिरियीं इनिंग] ऐं जेफ्री इवांस [बी इनिंग] जो शिकार बणियो इन नमूने हू पाण खे भारत जो जोड़ो ठाहिण वारो सोरिहों प्लेयर [उन वक़त तायीं] थियण खां न बचाये सघियो। इंग्लैंड जी पहिरियीं इनिंग में हुन बिन प्लेयर खे आउट करे पहिंजे टेस्ट विकेट जी शुरुआत कयी।
पंहिजे क्रिकेट जीवन में रामचंद सिर्फ ब भेरा सौ सेंचुरी ठाही हुयी ऐं बयी भेरा भारत में पंहिंजन घरु मैदानन ते खेड़न्दे। पहिरियों भेरो 106 नॉट आउट 1955 -1956 में कलकता में न्यूज़ीलैंड जे खिलाफ ऐं बियो 1956 में ऑस्ट्रलिया जे रॉय लिंडवल, एलन डेविसन ऐं रिची बेनौ जहिडियिन बॉलर्स जे खिलाफ – मुंबई में 109 रन्स। इन इनिंग खे रामचंद जी ज़िंदगी जी इनिंग चयो वेन्दो आहे छो जो जहिं वक़त हू बैटिंग करण आयो भारत जो स्कोर हो 4 विकेटन ते 74 रन्स हुओ ऐं वधीक इमकान इहो पयो लगे त भारत टेस्ट हाराये वेन्दो पर रामचंद जी इनिंग जे करे भारत इज़त सां टेस्ट ड्रा करायो।
पहिंजे टेस्ट सफर में रामचंद 24.58 जी सरासरी सां 1180 रन्स ठाहिया ऐं 46.31 जी सरासरी सां 41 विकेट वरिता हुआ। 145 फर्स्ट किलास मॅचन में हिन 6026 रन्स (36.30) ठाहिया जिनमे 16 भेरा सेंचुरी कयी। मुंबई वास्ते खेड़ण वक़त रामचंद जी सरासरी वधी 75.55 आहे। हिन जी बेस्ट बॉलिंग जो पंहिंजो रिकॉर्ड या कॅरियर जी बेस्ट बॉलिंग फिगर आहे 12 रन्स डयी 8 विकेट 1959 सौराष्ट्र जे खिलाफ मुंबई वास्ते खेड़ण वक़त। ऐतिरो ई न पर हिन जेका 230 रन्स जी पंहिंजी कॅरियर बेस्ट इनिंग खेड़ी सा बि मुंबई वास्ते महाराष्ट्र जे खिलाफ।
रामचंद 1951 खां 1957 तायीं छह साल इंग्लिश क्रिकेट लीग बि खेडियो हो। 1965 -1966 जे क्रिकेट सीजन खां पोय हिन क्रिकेट मां त रिटायरमेंट वरती पर एयर इंडिया में कमु कन्दो रहियो। 1959 -1960 में कानपुर में रिची बेनौ जी ऑस्ट्रेलिया टीम खिलाफ थियिल टेस्ट मॅच हिन जी ज़िन्दगी जी यादगार मॅच आहे इन्ही टेस्ट मॅच में भारत जीत हासिल कयी हुयी ऐं रामचंद पहिरियों इंडियन क्रिकेट कैप्टन बणियो जहिं ऑस्ट्रेलिया खे टेस्ट मॅच में हारायो।
जी एस रामचंद पहिरियों इंडियन क्रिकेटर हो जहिं कहिं कमर्शियल [जाहिरात] में कमु कियो हो। १९७५ में थियिल पहिरियें वन डे क्रिकेट वर्ल्ड कप जे वक़त रामचंद भारत जी क्रिकेट टीम जो मैनेजर हो। मुंबई में हिक कार्यक्रम में शामिल ऑस्ट्रेलिया जे कैप्टन रामचंद वटि वञी चयो हो “सर मुहिंजो नालो मार्क टेलर आहे मां हिन कार्यक्रम में असांजी ऑस्ट्रेलिया जी टीम खे मिलण वारो अवार्ड हासिल करण वास्ते शामिल थियो आहियां। छा मुखे उन शख्स सां हथु मिलायिण जो मोको मिली सघे थो जहिं पहिरियों भेरो असांखे हारायो हो। “
रामचंद पहिंजे क्रिकेट वास्ते चाह ऐं जुनून लाय बि मशहूर हो। चवन था त पहिंजी मौत खां हिकु डींहुं अगु बि हार्ट अटैक सबब हिंदुजा हॉस्पिटल में दाखिल हूंदे हुन पहिंजी जाल खे पाकिस्तान ऐं बंगलादेश टेस्ट मॅच जे स्कोर जी जाण वास्ते हॉस्पिटल मां बाहिर मोकिलियो हो। 08 सितम्बर 2003 ते जे हिंदुजा हॉस्पिटल मुंबई में हार्ट अटैक सबब जी एस रामचंद जो सुरगवासु थियो।
रिकॉर्ड बुक्स
क्रिकेट जे रिकॉर्ड बुक्स में जी एस रामचंद बाबत दरजु आहे
पहिरियों टेस्ट मॅच: इंग्लैंड जे खिलाफ 05 खां 09 जुलाई 1952 लीड्स में
आखिरी टेस्ट मॅच: ऑस्ट्रेलिया जे खिलाफ 23 खां 28 जनवरी 1960 कलकता में
फर्स्ट किलास क्रिकेट जो दौर: 1945 -1946 खां 1965 -1966 तायीं
जन्म: 26 जुलाई 1927 (कराची)
सुरगवासु: 08 सितम्बर 2003 (मुंबई)
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.