जी पी सिप्पी

हिंदी फिल्म इंडस्ट्री में विमल रॉय खे फिल्म फेयर अवार्ड में बेस्ट डायरेक्टर अवार्ड हासिल करण जूं ब हैट्रिक (1954 -1955-1956 ऐं 1959-1960-1961) ठाहिण वास्ते त राज कपूर खे हिंदी फ़िल्मुन खे दुनिया जी हर कुंड में पहुचायिण वास्ते याद कियो वेन्दो आहे त जी पी सिप्पी उहो शख्स आहे जहिं खे इहो जसु हासिल आहे त हिन अहिडी फिल्म (फिल्म शोले 1975) ठाही जेका न सिर्फ हिंदी फ़िल्मुन जे इतिहास में सभ खां वधीक कमायी कन्दड़ साबित थी पर रिलीज़ थियण जे पंजाहु सालन खां पोय बि माणुहू जहिं खे वरी डिसण पसंद कन था। मज़े जी गालिह इहा बि आहे त फ़िल्मुन में अचण खां अगु गोपालदास परमानन्द सिप्पी जगहियुं ठाहिण ऐं होटल हलाइण जा धंधा कंदो हुओ।

हिक इंटरव्यू में गोपालदास पहिंजे कम जे बाबत चयो बि हुओ त भारत लडे आयल बिन सिंधी नवजवानन सरकारी वकील थियण जो इमतिहान डिनो पर बिनही मां सिरफ हिकु चूंडियो वियो। जेको चूंडियो वियो उहो देश जो मशहूर वकील ऐं राजनेता राम जेठमलानी हुओ ऐं मुखे मुहिंजे पिरालबध शोले डिनी।    

14 सितम्बर 1914 ते जनम  वरतल गोपालदास परमानन्द सिपहमलानी – जी पी सिप्पी जी 1955 में रिलीज़ थिएल पहिरियीं फिल्म “मरीन ड्राइव ” खां वठी सभनी फ़िल्मुन में ब आम गालिहियूं नज़र अचन थियूं। पहिरियीं त हर फिल्म में फिल्म इंडस्ट्री जा नामवर स्टार्स ऐं हर दिल अज़ीज़ कलाकारन जो कमु करण। बियो हिन जो फिल्म जी कहाणी ऐं शूटिंग दौरान फिल्म जे सभनी चरित्रन खे सही नमूने पेश करण वासिते मेहनत करण। फ़िल्मुन में बेहद मशगूल हूंदे बि हिन फ़िल्मी दुनिया जी संस्था “फिल्म एंड टी वी प्रोडयूसर गिल्ड ऑफ़ इंडिया ” वास्ते वक़तु कढ़ियो ऐं चार भेरा संस्था जे चेयरमैन तौर कमु कियो।

1968 में फिल्म “ब्रह्मचारी” जी शूटिंग जे दौरान फिल्म जे डायरेक्टर भप्पी सोनी सां सिप्पी जो निफ़ाक़ थी वियो जहिं करे न सिर्फ इन फिल्म जे पूरे थियण में देर थी पर हिन जी बी फिल्म “बंधन” (राजेश खन्ना – मुमताज़) जी शूटिंग बि वक़त ते शुरू कोन थी सघी। हालतुन जे ख़राब हुअण जो अंदाज़ लगायिण वास्ते इहो काफी आहे त हिकु भेरो त हिन जे मन में फ़िल्मुन में कमु बंद करण जो विचार पिण आयो पर खुशकिस्मतीअ सां हालतुन में सुधार आयो। गोपालदास लंदन जे स्कूल ऑफ़ इकनॉमिक्स में पढ़ायी कन्दड पुट्र खे पहिंजी मदद वास्ते वापस घुरायो ऐं बिन्ही मिली करे फिल्म “सीता और गीता ” जहिं में धर्मेंद्र, संजीवकुमार ऐं हेमा मालिनी जहिडा स्टार्स हुआ ठाही जेका १९७२ जी हिट फ़िल्मुन में शुमार थिये थी।

१९७५ जो साल सिप्पी फिल्म्स ऐं सिप्पी कुटुंब वास्ते बेशुमार कामियाबी वारो साल साबित थियो। सलीम जावेद जी लिखियिल स्क्रिप्ट ते अमिताभ बच्चन, धर्मेंद्र, संजीवकुमार, जया भादुड़ी, हेमा मालिनी जहिडियिन नामवर अदाकारन ऐं नयें चेहरे अमज़द खान जी सिप्पी फिल्म्स जी फिल्म शोले रिलीज़ थी। फ़िल्मी दुनिया में कामियाबी जो हिकु नवों इतिहास लिखियो। मुंबई जे मिनर्वा थिएटर में फिल्म लागीता 286 हफ्ता हली ऐं बॉलीवुड में कमायी जो रिकॉर्ड ठाहे हिंदी फ़िल्मुन जे इतिहास में सभ खां वधीक कामियाब साबित थी। फिल्म जी कामियाबी जो आलम इहो आहे जो अजु लगभग पंजाहु सालन खां जो अरसो गुजिरण खां पोय बि माणुहुन खे गब्बर जा डायलॉग “जो डर गया समझो मर गया ” या “कितने आदमी थे ?” याद आहिन।

1995 में रिलीज़ थियिल ज़माना दीवाना खां पोय जी पी सिप्पी फ़िल्मुन में कमु बंद करण जो फेसिलो कियो हालांकि हिन जी प्रोडयूस कियिल आखिरी फिल्म “हमेशा ” 1997 में रिलीज़ थी। जी पी सिप्पी जी फिल्म्स खे ब भेरा बेस्ट फिल्म जो फिल्म फेयर अवार्ड मिली चुको आहे। 2007 जो क्रिसमस (25 दिसंबर) जो डीहुं गोपालदास परमानन्द सिपहमलानी जी हयाती जो आखिरी डीहुं साबित थियो इन डीहं ते लीवर जी खराबी सबब हिन जो सुरगवासु थियो।