जस्टिस एच के चैनानी

29 फरवरी साल उहो डींहुं आहे जो साल जे डीन्हन जो तादाद हिकु वधाये थो। 29 फरवरी 1904 ते हैदराबाद सिंध में जन्म वठण वारे हशमतराय खूबचंद चैनानी में सिंधी कौम जो विरसे वारो इंसाफ वास्ते प्यार ऐं हिमथ सां इंसाफ लाय ज़फ़ाकशी करण जी खूबी सां गडु दया जी भावना सां भरियल इंसाफ ऐं सामाजिक भले जे पहिंजे जुनून वास्ते त्याग करण जा गुण बि हुआ। हैदराबाद में शुरुआती स्कूली सिखिया हासिल करे हुन वधीक तैलीम वास्ते कराची जे मशहूर डी जे सिंध कॉलेज में दाखिला वरती। हशमतराय पहिंजी बी ऐ जी डिग्री [Natural Science Tripos विषय ] कैंब्रिज इंग्लैंड जे मैगडोलेने मां हासिल कयी।

1925 में ग्रेजुएशन जी पढ़ायी पूरी करे हशमतराय, 1926 में इंडियन सिविल सर्विस [ICS] जो इम्तिहान डिनो ऐं वडी कामियाबी – पहिरियों नंबर अची – हासिल कयी। 1927 में भारत मोटण ते श्री एच के चैनानी खे रेवेन्यू खाते में शोलापुर जे असिस्टेंट कलेक्टर जे ओहदे ते बहाल कियो वियो। सागे ओहदे ते रहन्दे हुन नासिक ऐं पूना में बि कमु कियो। सुठो मानवारो ओहदो ऐं पगार बि संदस इंसाफ वास्ते ज़ज़्बे जी पियास पूरी करण में नाकामियाब थिये पयी। 1933 में खेस शोलापुर जे डिस्ट्रिक्ट ऐं सेशन जज जे ओहदे ते प्रमोशन मिलियो। हशमतराय चैनानी खे बॉम्बे लेजिस्लेटिव कौंसिल जे सेक्रेटरी ऐं असिस्टेंट लीगल रेमेमब्रान्सर जे ओहदे ते कमु करण जो बि वझु मिलियो।

1944 में बतोर होम डिपार्टमेंट जे जॉइंट सेक्रेटरी हशमतराय गवर्नमेंट ऑफ़ बॉम्बे जो हिसो बणियो पर जल्दु ई खेस भारत सरकार जे होम डिपार्टमेंट जे डिप्टी सेक्रेटरी जे ओहदे ते मुकरर कयो वयो। 1948 में जहिं वक़त हू रेवेन्यू खाते में कमिशनर हो उन वक़त खेस प्रमोट करे बॉम्बे हाय कोर्ट में घटि अख्तियारीअ वारे जज जे ओहदे ते मुकरर कियो वियो। इहो संदस क़ाबिलियत, कम करण जे ज़ज़्बे ऐं इंसाफ पसंदगी जो सबूत आहे जो जडिहिं 1958 में हाय कोर्ट जो चीफ जस्टिस एम सी चागला रिटायर थियो त हशमतराय चैनानी खे नवों चीफ जस्टिस मुकरर कियो वियो। हुन इन ओहदे ते डहाको साल,1965 में श्री वाय एस ताम्बे जे मुकरर थियण तायीं, कमु कयो। इन ओहदे ते रहन्दे संदस फेसिला बिना भव ऐं तरफ़दारी जे फेसिलन जे रूप में ऐं हू पाण इंसाफ वास्ते जुनून ऐं फेसिलो करण वक़त इंसाफ सां गडु दया खे बि अहमियत डियण वारे जज में मशहूर थियो।

जडिहिं बि आमु शहरन जे हकन जी गालिह आयी हिन कडिहिं बि सरकार जी पुठिभरायी कोन कयी पर सागे वक़त सरकार हलायिण जे मसैलन ऐं डुखियायी जो अहसास कन्दे हुन सरकार जे फेसिलन ते को अण वणन्दड हुकुम डियण खां बि पासो कियो।

1962 में हशमतराय चैनानी खे महाराष्ट्र राज्य जे एक्टिंग गवर्नर तोर कमु करण जो मोको मिलियो। इन दौरान वेस्टर्न इंडिया एडवोकेट एसोसिएशन जो सउ साल पूरा थियण जो जलसो थियो। इन प्रोग्राम जे मुख्य मेहमान तोर संदस भाषण न सिर्फ बार कौंसिल डांहु संदस प्यार ऐं इज़त जे ज़ज़्बे जो इजिहार हो पर गडोगडु इंसाफ ऐं दया जे लागापे जो बि बियानु हो।

28 नवंबर 1965 ते हिक रोड हादसे सबब इंसाफ जे पुजारी हशमतराय खूबचंद चैनानी खे हिन फानी दुनिया मां चालिणो करणो पयो।