इतिहास खटियल ऐं हारायल

चाहे इहो थधि जी मुंद में असुर वेले गरम चाहिं जे लुतफ जी लालच हुजे या बियो कुछ पर अजु वरी निखिमिणोमल मुहिंजे सामहूं वेठो आहे ऐं उमीद रखण में कहिड़ो हरजु त हाणे इहो सिलसिलो वरी हलन्दो रहन्दो।

एस पी सर छा इहो सचु न आहे त इतिहास हमेशा खटण वारा लिखन्दा आहिन ? इहा खटण वारन जी जीयं मरज़ी थिये तहिड़े नमूने उहे हारायलन खे, उन्हन जी सामाजिक हलत खे पेश कनि। मतलब हारायिण वारा देव हुआ या दानव इहो जेको इतिहास लिखियो वेन्दो सो पूरी तरह सां खटण वारन जी पसंदगी ते मदार रखे थो।    

बिलकुल सही था चवो साईं निखिमिणामल। मां विरले मिलियिल मोके जो फायदो वठन्दे चयो।

तव्हां इहो ज़रूर पढियो हूंदो त द्रोपदी जे चीरहरण खां अगु राज सभा में इहो तर्क रखियो वियो हो त युधिष्टर पहिरियूं पहिंजो पाण खे हारायो, पोय हस्तिनापुर जो राजु हारायो, पोय भाउरन खे हारायो ऐं आखिर में द्रोपदी खे हारायो। जीयं द्रोपदी खे हिक हारायल दांव ते लगायो सो द्रोपदी खे आज़ाद करे छड़िण घुरिजे छाकाण त हारायल जो पहिंजो को वज़ूद न थिये उहो त खटण वारे जो गुलाम हूंदो आहे।

हाणे वंञी इहा गालिह समझ में आयी आ एस पी सर त आखिर असां जा नवजवान छो भारत वासिन खे पुठिते पियल ऐं अंग्रेजन तोड़े बियन यूरोप वारन खे तरकीयाफता समझन था। आखिर भारत 500 सालन खां वधीक अरसो मुगलन तोड़े अंग्रेजन जो गुलाम रहियो आहे। सो जेको इतिहास आहे सो बि त इन्हन खटियलन जे नज़रिये सां लिखियिल हूंदो न ?

पर हिक गालिह त बुधायो एस पी सर छा हारायल पहिंजो इतिहास बि विसारे विहंदा आहिन ? छा हारायलन जो सामाजिक जीवन उन्हन जा विचार कडिहिं बि इतिहास जो हिसो न बणिजी सघन्दा आहिन ?

मुखे महसूस थी रहियो हो त अजु ज़रूर निखिमिणोमल कहिं सखी आत्मा जे असर हेठ हुओ छो जो हुन मुखे वरी गालिहाये सघण जो मोको डिनो आहे।

साईं निखिमिणामल हारायल न त पहिंजो इतिहास विसारे विहंदा आहिन ऐं न ई पहिंजी सुठियइन सामाजिक हलतुन खां परे थींदा आहिन। थींदो छा आहे जो जीयं नाटक में अदाकार जी अदाकारी त सभनी खे नज़र अचे थी पर हिदायतकार परदे जे पुठियां लिकियल रहजी वंञे थो तीयं खटियलन जे सामहूं हारायल बि लिकियल रहजी वंञन था।

त छा एस पी सर इहे हारायल कडिहिं बि इतिहास जो हिसो न था बणिजी सघन ?

न साईं इयें न आहे। वकत जे बदिलाव सबब अहिड़ो दौर बि अचे थो जो हारायल न सिर्फ ताकतवर बणिजी पवन था पर उन हालत में बि अची सघन था जो उहे खिटयलन जे लिखियल इतिहास में बि बदिलाव आणे सघन।

ओह ! त कांग्रेस वारा अजायो बीजेपी ते तोहमत पिया लगायिन त बीजेपी देश जो इतिहास बदिलायिण जी कोशिश करे रही आहे। हकीकत में बीजेपी त सिर्फ ऐतिरो करे रही आहे त कांग्रेस जी हुकूमत जे दौरान जिन गैर कोंग्रेसी अगुवानन खे इतिहास जो हिसो बणिजण खां परे रखियो वियो उन्हन खे इतिहास जो हिसो बणाये रही आहे।

बिलकुल सही नतीजे ते पहुता आहियो साईं।

त एस पी सर इतिहास चाहे हकिकतुन जो बयान छो न आहे पर इहो सचु कहिं खास नज़रिये सां लिखियल आहे जहिं में के हकिकतूं वधीक रोशन आहिन त के लिकियल रूप में वज़ूद में आहिन।

हमेशा वांगुर चाहिं खतम थींदे ई निखिमिणोमल त हलन्दो थियो आहे पर असां वास्ते इतिहास जे ज़ाहिरी रूप ऐं लिकियल रूप ते विचार करण वास्ते हिकु नओं विषय छड़े वियो आहे।