के आर मलकानी

फेमस सिंधी लेखक – अख़बार नवीस – सिंधी राजनेता
19 नवंबर 1921 ते हैदराबाद सिंध में जावल केवलराम रतनमल मलकानी [ नारायणदास मलकानी जो नंढो भाउ ] जेको के आर मलकानी जे नाले सां वधीक मशहूर आहे तहिं 1948 भारत में पहिंजी हयाती जी शुरुआत हिन्दुतान टाइम्स जे असिस्टेंट एडिटर तौर कयी हुयी ।अगते हली सियासत सां जुडियो [हयाती जा अटकल ६० साल अख़बार नवीसी ऐं सियासत सां जुडियिल] तहिं जी आमु माणुहू सां वाकफियत न त अख़बारनवीस जे रूप में आहे ऐं ही बतौर सियासतदान। आमु माणुहुन वास्ते त के आर मलकानी हिक फेमस सिंधी लेखक आहे छो जो हिन वडी कामियाबी सां सियासत जे समझोतन ऐं आलिमन फाजलिन जी अदबी दुनिया जे दबाव ऐं घुरिजिन जे विच वारे मीज़ान खे सम्भालियो हो।

सियासत जे वातावरण वारे कुटुंब में जन्म वठण सबब नंढी उमर में ई केवलराम जी वाकफियत न सिर्फ सियासत जे मूल मन्त्र समझौतो सां थी पर हू पढ़ायी जी अहमियत बि चंगी तरह समझी वियो । नतीज़े तौर हुन मुंबई [उन वक़त बॉम्बे] जे स्कूल ऑफ़ इकनॉमिक्स एंड सोशियोलॉजी मां इकनॉमिक्स ऐं पोलिटिक्स में मास्टर डिग्री हासिल कयी। पढ़ायी पूरी करण खां हु बतौर लेक्चरर हैदराबाद जे डी जी नेशनल कॉलेज सां जुडियो ऐं 1945 खां 1947 तायीं कमु कियायीं। अगते हली केवलराम [1961-1962] बतौर नीमन फेलो हावर्ड यूनिवर्सिटी में पिण कमु कियो।

मुल्क जे विरहांडगें बैद 1948८ जी शुरुआत हुन “हिंदुस्तान टाइम्स” में असिस्टेंट एडिटर जे रूप में कमु करण शुरू कियो । जलदु ई हफतेवार “आर्गेनाइजर ” जे एडिटर जे ओहदे ते कमु करण लगो। लगभग 35 साल मतलब 1983३ तायीं हू अखबारुन जी दुनिया में कमु कन्दो रहियो । इन दौरान केवलराम एडिटर गिल्ड्स ऑफ़ इंडिया जो पहिरियों सेक्रेटरी [1978-1979] ऐं दीन दयाल रिसर्च इंस्टिट्यूट नई दिल्ली जो वाईस प्रेसीडेंट [1983-1990] जहिडियिन अहमियत वारन ओहदन ते बि रहियो। 1978 में भारत जे अख़बार नवीसन जो जेको डेलीगेशन चीन वियो हो केवलराम उन जो बि मेंबर हो।

कुटुंब जे सियासी माहोल सबब केवलराम पिण सियासत में दाखिल थियो । पहिंजन हिंदुत्व डान्हुँ लाडो रखन्दड विचारन सबब जनसंघ जे कमन में बहरो वठण लगो। 1980 में जडहिं भारतीय जनता पार्टी [ बी जे पी ] ठही त हू पार्टी बरपा कन्दडन मां हिकु हो । 1991 खां शुरू करे अटकल 10 साल पार्टी जे वाईस प्रेसीडेंट जे ओहदे ते कमु कियायीं। केवलराम 1994 खां 2000 तायीं राज्य सभा जो मेंबर हो ऐं इन अरसे में हुन केतिरिन पार्लियामेंट कमेटिन जे मेंबर तौर पिण कमु कियो। इमरजेंसी जे दौर में जिन सियासतदानन खे मीसा [ Maintenance of Internal Security Act ] में गिरफतार कियो वियो हो केवलराम मलकानी उन्हन में शामिल हो।

03जुलाई 2002 ते केवलराम मलकानी पोंडिचेरी जे लेफिनेंट गवर्नर जे ओहदे ते कमु करण शुरू कियो ऐं 27 अक्टूबर 2003 ते स्वर्गवास थियण तायीं ओहदे ते रहियो। आर के व्यास खां पोय मलकानी बियो लेफिनेंट गवर्नर हो जहिं जो ओहदे ते रहन्दे स्वर्गवास थियो हो। हिन जे कुटुंब में ब पुट्र अरविन्द, विक्रम ऐं हिक धीउ सिंधु आहिन।

बतौर लेखक केवलराम मलकानी जो योगदान बेमिसाल आहे जेतोणिक हिन जा लिखियिल किताब आमु तौर सियासत सां लागापो रखन था पर इन्हन में जहिं नमूने मुल्क जी हालतुन जो बियानु अचे थो सो कहिं बि भेट खां परे आहे। ” पोलिटिकल मिस्ट्रीज” हिन जो लिखियिल आखिरी किताब आहे इन किताब में महात्मा गांधी, डॉ श्याम प्रसाद मुखर्जी, इंदिरा गांधी ऐं राजीव गांधी जी बेवक़ती मौत जो बियानु आहे इहो किताब मलकानी जे डहन सालन जे शोध जो नतीज़ो आहे। 1984 में छपियिल “द सिंध स्टोरी ” केवलराम जी आलीशान अदबी रचना आहे। इहो किताब अजु बि शोध कन्दड़ वापिरायिन था।

केवलराम मलकानी जो अदबी योगदान जडहिं इन बाबत श्री एल के अडवाणी [जहिं हयाती जा अटकल 60 साल केवलराम सां गडु गुजारिया आहिन] खां पुछियो वियो त हुन जो चवण हो

“हिन जी विचार धारा में मुल्क जो फायदो सदायीं सभ खां अगु हूंदो हो। मलकानी हिकु महान विचारक ऐं असर पैदा कन्दड़ लेखक हो। “