काजल चंदीरामानी

काजल चंदीरामानी जो जन्म 13 नवंबर 1965 ते अहमदाबाद में सरोज ऐं किशिन केवलरामानी जी कन्या जे रुप में थिएल आहे। सरोज प्रो राम पंजवानी जी धीउ आहे मतलब जेको अंग्रेजी में चयो वेन्दो आहे Born with silver spoon उन तर्ज़ ते चयी सघिजे थो त काजल पाण सां संगीत जी विरासत खणी जायी हुयी। हुअ सिर्फ ट्रिन महीनन जी हुयी जो संदस रुअण जो आवाज़ बुधी चयो वयो त हीउ छोकिरी पक गायिका थींदी। सो अठें साल जी उमिर में संदस संगीत में चाहु डिसी काजल खे क्लासिकल संगीत जी सिखिया डियण जी शुरुआत थी।

कुझु ई सालन जी संगीत सिखिया ऐं माउंट कारमेल हाई स्कूल में रिवायती सिखिया हासिल कन्दे काजल आल इंडिया रेडियो जे ऑडिशन में शामिल थी खेसि न सिर्फ चूंडियो वयो पर बियन जी भेट में उचे दरिजे वारो गायक लेखियो वयो। इन ऑडिशन जा जज अज़ब में हुआ हिक 13 सालन जी छोकिरी खे पूरी महारत सां सूफी कलाम गायीन्दे बुधी।

कुझु ई वक़त खां पोय बिर्ला ऑडिटोरियम में बिन रातिन जो राम पंजवानी नाईट जो प्रोग्राम हुओ ऐं काजल उन प्रोग्राम वासिते बिन कलामन जी तियारी कयी जिन मान हिकु हुओ लासानी शाह साहिब जो उमर मारवी जी कहाणी सां लगापो रखण वारो। स्टेज ते पहिरियें डींहुं जडहिं काजल कलाम गायो त न सिर्फ बुधण वारा अज़ब में पयजी वया पर ख़ुशी विचां प्रो राम पंजवानी जा गोड़िहा वहण लगा। बिये डींहुं अखबारुन जी हेड लाइन हुयी प्रो राम पंजवानी जे खानदान में सिंधी संगीत जे हिक नयें सितारे जो जन्म थियो आहे ।

1996 में आल इंडियन रेडियो, आकाशवाणी वारन पहिंजन बियन गायकन सां गडु टेलीविजन जे सिंगिंग शो सारेगामापा में बहरो वठण वासिते काजल खे बि मोकिलियो ऐं काजल इहो शो खटी करे पहिंजी सलाहियत ऐं क़ाबिलियत जो सबूत डिनो। अजु तायीं शायद त काजल अकेली सिंधी गायिका आहे जहिं टेलीविजन जो को सिंगिंग शो खटियो आहे। इन शो जे खटण करे काजल जे सामहूं मोको हुओ त हुअ बॉलीवुड जी संगीत दुनिया में कॅरियर बणाए सघे पर हुन सिंधी संगीत खे चूंडियो छाकाण संदस चवण आहे त समाज जी सुञाणप आहे भाषा। सिंधी हुजण सबब मुहिंजो फरज़ु आहे त मां सिंधी भाषा ऐं सिंधी संगीत जे वाधारे में योगदान डियां।

इहा काजल जी सिंधी संगीत में महारत ऐं संदस आवाज़ जो जादू आहे जो सिंध जे मशहूर संत साईं साधराम जन संगीत जे प्रोग्राम वासिते काजल खे सिंध घुरायो। काजल जो चवण आहे त रहड़की में भगत कंवरराम साहिबन जी समाधी ते नाले अलख जे बेड़ो तारि मुहिंजो हिक ता ज़िंदगी न विसारिण वारो आज़मूदो आहे।

मुंबई जे महेश चंदीरामानी सां शादी कयल काजल अजु बि पहिंजी सिंधी गायिकी, सिंधी संगीत जे प्रोग्रामन ऐं म्यूजिक अल्बम वसीले सिंधी भाषा ऐं सिंधी संगीत जी सेवा कन्दे प्रो राम पंजवानी जन जे संगीत वरसे खे अगिते वधाये पयी। काजल जा के मशहूर एलबम्स आहिन

होजमालो, सिंधुडी मुहिंजी अमड, जियन जोगीयडा, काजल गाये दादा जी पसंद, मास्तर चन्दर जा कलाम, संगीत सिंध जो ऐं गीत काजल जा

दुनिया जे अलग अलग हिसन मां सिंधी संस्थाउं काजल खे सिंधी संगीत जे प्रोग्राम वासिते घुराईंदयूं पयूं आहिन। संदस हिक सपनो आहे को त अहिड़ो सिंधी गीत रचियो वञे जहिं जे सुर ताल ते न सिर्फ सिंधी पर ग़ैर सिंधी पिणु नचण वासिते मज़बूर थी वञन ऐं वासिते संदस उमीद मरकज़ आहिन नवजवान सिंधी गीतकार ऐं सिंधी संगीतकार।

वेझिड़ायी में काजल जा बेड़ी पारि उतारि – दमादम मसत कलंदर ऐं गणपति बपा मोरिया जहिड़ा गीत काफी मशहूर थिया आहिन।