कुमार शाहाणी
TSW Citation
भारत जे केरल राज्य जे सामुंड्री किनारन जे कुदरती नज़ारन तोड़े केरल जी परफार्मिंग आर्ट जे शैदायी, नामचीन बॉलीवुड सिंधी शख्सियत कुमार शाहाणी खे हिंदी फ़िल्मी दुनिया जे आर्ट फिल्म या पैरेलल सिनेमा जे दायिरे में कमालियत पसंद (perfectionist ) शख्स जे रूप में सुञातो वेन्दो आहे। चाहे फिल्म्स जे तादाद जे घटि हुअण सबब कुमार शाहाणी मशहूरी जे आला मुक़ाम खां महरुम रहियो आहे पर हुन पंहिजे हिदायतकारी (direction) जे फ़न जो लाजवाब, बेमिसाल ऐं बेहतरीन मुज़हिरो कयो आहे। कुमार शाहाणी जी फिल्म हमेशा न सिर्फ नेशनल फिल्म अवार्ड खटण में कामियाब थी पर बॉलीवुड जे क्रिटिक्स खे बि नुक़तचीनी जो मोको न डिनो आहे। टीम TSW अहिड़े आला दरिजे जे फनकार, नामवर सिंधी जी जानकारी हिते शामिल करे फ़खुर महसूस करे थी।
कुमार शाहाणी: बायोग्राफी / फिल्मोग्राफी
फेमस सिंधी: सिंधी फिल्म डायरेक्टर: बॉलीवुड में सिंधी: आर्ट फिल्म्स
जेकडहिं सिप्पी जो नालो बॉलीवुड फिल्म्स जे कमर्शियल दायिरे में हिकु नामवर शख्सियत आहे त हिकु बियो सिंधी डायरेक्टर कुमार शाहाणी आर्ट या पैरेलल सिनेमा में पहिंजे बेदाग ऐं सुहिणे कम सबब इन खेतर जो सिरमोर लेखियो वंञे थो। हालांकि इहो बि सचु आहे त कुमार जी डायरेक्शन में आयल पहिरियीं ऐं बी फिल्म जे रिलीज़ थियण में काफी वडो पूरा 12 साल हुओ पर खास गालिह इहा आहे जो इहे बयी फिल्म्स माया दर्पण [1972] ऐं तरंग [1984] अवार्ड खटण वारियूं साबित थियूं आहिन।
सामुंड्री किनारन जी सैर जे शौकीन कुमार शाहाणी वास्ते केरल न सिर्फ मनपसंद छुटियूं गुजारिण जी जगह हुयी पर उहा जगह पिण हुयी जिते अची हू आराम ऐं सुकून हासिल कन्दो हुओ। केरल जी परफार्मिंग आर्ट सिखण ऐं उन बाबत वधीक जाण हासिल करण में कुमार खे खास चाहु ऐं इच्छा हुयी। संदस अखरन में
केरल जी परफार्मिंग आर्ट में तरह तरह जूं कलाउं आहिन। केरल जी परफार्मिंग आर्ट केतिरिन सभ्यताउन ऐं तहज़ीबी वरसन जे मिलाप जो हंद आहे। इहा हिकु खज़ानो आहे जहिं खे असां खे न सिर्फ महफूज़ रखिणो आहे पर पहिंजी रोजाने ज़िंदगी में बि शामिल करिणो आहे।
07 दिसंबर 1940 जे कराची शहर में जन्म वठण वारो कुमार शाहाणी, 1947 जे मुल्क जे विरहांङें सबब संदस कुटुंब जे लड़े बॉम्बे अचण वकत हिकु अबोध बालक हुओ। संदस तैलीम बॉम्बे में थी ऐं हुन यूनिवर्सिटी ऑफ़ बॉम्बे मां पोलिटिकल साइंस ऐं इतिहास में बी. ए. जी डिग्री हासिल कयी। ऋत्विक घटक जहिड़े माहिर जी रहनुमायी में कुमार फिल्म एंड टेलीविजन इंस्टिट्यूट ऑफ़ इंडिया में स्क्रीनप्ले लिखण ऐं हिदायतकारी [Advanced Direction] जी सिखिया हासिल कयी। फ्रांस सरकार वठां मिलियिल हिक स्कॉरलशिप सबब हू वधीक सिखिया हासिल करण वास्ते Institut des hautes études cinématographiques (IDHEC) फ्रांस वयो।
फ्रांस मां मुंबई मोटी अचण खां पोय कुमार शाहाणी जी हिदायतकारी में शॉर्ट्स फिल्म्स Rails for the World [1970] ऐं Object [1971] ठहियूं पर संदस पहिरियीं फिल्म आहे 1972 में रिलीज़ थियिल माया दर्पण। इन फिल्म कुमार वास्ते कामियाबी ऐं जस जी शाही राह खोले छड़ी। इन फिल्म खे न सिर्फ मानवारे फिल्म फेयर अवार्ड्स में बेस्ट फिल्म [Critics] जो अवार्ड मिलियो पर इहा हिंदी में बेस्ट फीचर फिल्म जो नेशनल अवार्ड खटण में बि कामियाब थी।
बेहद कामियाबी हासिल करण खां पोय बि कुमार जी बी फिल्म तरंग 12 सालन जे वड़े अरसे खां पोय 1984 में रिलीज़ थी। इन फिल्म खे नेशनल फिल्म अवार्ड्स में स्पेशल जूरी अवार्ड सां नवाज़ियो वियो न सिर्फ ऐतिरो पर क्रिटिक्स तोड़े फिल्म शौकीनन इन फिल्म जी दिल खोले साराह कयी। इन 12 सालन जे विच वारे अरसे में आयल फिल्म्स Belly [1973] ऐं Our Universe [1976] सां कुमार बतोर हिदायतकार जुडियिल हुओ पर इहे बयी शार्ट फिल्म्स हुयूं। इन अरसे दौरान ई कुमार खे होमी भाभा फेलोशिप मिली ऐं 1976 -1978 जे अरसे में खेस महाभारत जी रिवायतुन, बुद्ध धर्म जे मूरती विज्ञान, भारत जे शास्त्रीय संगीत ऐं भगिती तहरीक जो अभ्यासु करण जो मोको मिलियो। कुमार मूजिब फ़िल्मी दुनिया तपसिया सां गडु सजावट, चमक ऐं डेखाव जी दुनिया आहे। हिते चमत्कार करण वास्ते हर कहिं खे पहिंजो पाण खे हिमथायिणु पवन्दो आहे।
कुमार शाहाणी: अवार्ड्स हासिल कयल फिल्मस
1987 में कुमार शाहाणी हिकु भेरो वरी Vaar Vaar Vaari टाइटल वारी शार्ट फिल्म पेश कयी। 1989 में आयल फिल्म Khayal Gatha वास्ते न सिर्फ फिल्म फेयर अवार्ड्स जो Best Film [Critics] जो बियों भेरो अवार्ड मिलियो पर इन फिल्म खे Rotterdam International Film Festival में FIPRESCI Prize खटण वारी फिल्म जो मानु पिण मिलियो। कुमार शाहाणी जी कामियाबी जे सफर में 1990 में आयल फिल्म कसबा सबब कुमार खे ट्रियों भेरो फिल्म फेयर अवार्ड्स जो बेस्ट फिल्म [Critics] अवार्ड मिलियो त 1991 में ओड़िया भाषा में ठाहियल डॉक्यूमेंट्री Bhavantarana वास्ते Best Biographical Film जो नेशनल फिल्म अवार्ड मिलियो। कुमार शाहाणी जूं के बियूं फिल्म्स आहिन A Ship Aground [1989], Char Adhyay [1997], The Bamboo Flute [2000] ऐं As the Crow Flies [2004].
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.