दादा लछ्मण चेलाराम

दादा लछमण जो जन्म 04 दिसंबर 1938 ३८ ते सिंध जे मशहूर शहर कराची में थियो आहे। पिता चेलाराम हिकु नामवर गुरबाणी गायक (भगत) हुआ सो कुदरती तौर नंढी उमर खां ई दादा लछमन खे शब्द गुरबाणी ऐं कीरतन वासिते चाहु पैदा थियो। देश जे विरहांङें खां पोय कुटुंब दिल्ली अची रहण लगो पर अटकल डहन साल जे बार जे कोमल मन ते इन दौर में जिन तक़लीफ़ुन ऐं बेइजती खे हिन्दुन (खास करे सिंधियिन ऐं पंजाबिन) मुहं डिनो तिन जा ज़ख़्म रहजी विया। इन्हन ज़ख्मन जो असर चयिजे या बियो कुछ पर अगते हली दादा लछमन हिक धर्मिक संस्था “निजु थाऊं ” बरपा कयी।

दिल्ली में लछमण जी रिवायती स्कूली पढ़ायी शुरू थी पर संदस असली पढ़ायी हुयी रोज़ सिरी गुरु ग्रन्थ साहिब जो पाठु सो जडहिं हुन श्री गुरु तेग बहादुर खालसा कॉलेज नई दिल्ली मां B.A. जो इम्तिहान पास कियो त हू डिविनिटी (धर्मिक -गुरु ग्रन्थ सां लागापे वारो) विषय में पहिरियों नंबर आयो। पढ़ायी पूरी करण खां पोय नौकरी या धंधो करण बदिरां हिन सजो जीवन सिरी गुरु ग्रन्थ साहिब जी सेवा में गुजारिण जो फेसिलो कयो।

दादा लछमण जो बिन गालिहिन में काफी उनिहो ऐं पको विशवास आहे हिकु त मुख़तलिफ़ धारमिक विशवास हिक ई परमात्मा सां मिलण जा अलग अलग रसिता आहिन ऐं बियो सिरी गुरु ग्रन्थ साहिब जी बाणी हर इंसान खे राह डेखारीन्दड आहे। दादा लछमण लिखियिल विचारन ऐं गुरबाणी कीरतन वसीले मुख़तलिफ़ विशवासुन ऐं अलग अलग कमु कन्दडन में गुरबाणी जो सन्देश पहुचायिण जो कमु शुरू कियो न सिर्फ देश में पर किन विदेशी मुलकन में बि दादा जा दोरा हलन्दा पिया आहिन।

दादा लछमण गुरु ग्रन्थ साहिब जो आधार वठी नव [9] अलग अलग भाषाउन में अटकल 80 किताब लिखिया या छपाया आहिन। खास गालिह इहा आहे जो इहे किताब बिना नफे विकिया वेन्दा आहिन। दादा लछमन चवण आहे त जे सिरी गुरु ग्रन्थ साहिब जी बाणी लिखन्दडन इहो कमु पैसे वासिते न कियो त मुखे कहिडो हकु आहे जो मां उनजे तरजुमे मां पैसा कमायां। सिंधी कौम वासिते दादा सिंधी अरबी ऐं सिंधी देवनागिरी लिपि में सिरी गुरु ग्रन्थ छपाये हिकु अहिडो कमु कियो आहे जहिं वास्ते रहन्दी दुनिया तायीं दादा लछमण खे याद पयो कयो वेन्दो। दादा लछमण जो सपनो आहे दसम ग्रन्थ साहिब जो हिंदी में तरजुमो (चार हिसा) छपायिण।

केतिरन ई मोकन ते केतिरिन नामवर हसितिन जिनमे भारत जो माज़ी राष्ट्रपति सुरगुवासी ज्ञानी जैलसिंह बि शामिल आहिन दादा जो सत्कार कन्दे संदन कमन जी साराह कयी आहे। वेझडायी में नांदेड़ महाराष्ट्र में गुरु ग्रन्थ साहिब जी गुरता गदीअ जा 300 साल पूरा थियण जे कार्यक्रम दौरान दादा लछमण जो संदन 70 वें जन्म डीहं ते खास सत्कार कयो वयो हो।

दादा लछमण मूजिब सिरी गुरु ग्रन्थ साहिब हिक पवित्र बाणी आहे जेका दुखी ऐं मुँझियिल मन खे सुखी ऐं शांत बणाये थी, जेका प्रभु ऐं मानवता सां पियार करण सेखारी थी, जहिं में सिर्फ सिख गुरुन जूं सिखियायूँ शामिल न आहिन पर बियन हिन्दु संतन ऐं मुसिलमान फ़कीरन जो बि योगदान आहे। सिरी गुरु ग्रन्थ साहिब में राम, हरी, अल्लाह ऐं खुदा जहिडा अखर ओतिरा ई भेरा आयल आहिन जेतिरा भेरा वाहेगुरु।