माफिया राजु Mafia

तव्हां हिकु भेरो त कुछ डीन्ह दिल्ली में रही अचो एस पी असर पोय तव्हां खे मुहिंजो हीउ माफिया अखर ऐतिरो अजीब लगंदो।

निखिमिणेमल चाहिँ जो कोपु हेठ रखन्दे चयो।

तव्हां महसूस कन्दा एस पी सर त न सिर्फ अखबारून में या रस्तन पासन ते लगियिल वडी वडी होर्डिंग्स ते पर दिल्ली जे बारन जी ज़ुबान ते बि टैंकर माफिया, अस्पताल ऐं दवा माफिया, राशन माफिया , बिजली माफिया, स्कूल माफिया ऐं पाणी माफिया ज़बरदस्त हुकूमत पिया कनि।

दिल्ली जा घणा शहरी त इन माफिया अखर जे उचार करण खां सिवाय गालिहाये बि कोन था सघन। तव्हां जे ध्यान डियो एस पी सर त तव्हां त सवलायी सां अहसास करे वठन्दा त हू जण त पहिंजे कुटुंब जे कहिं मेंबर बाबत या रोज़ाना ज़िंदगी जी कहिं आम गालिह बाबत पिया गालिहायिन। सचु थो चवांव एस पी सर दिल्ली वारन जो माफिया बाबत उनिहो ज्ञान ऐं गालिहायिण में मुनासिब वापर तव्हां खे अज़ब में विझी छडीन्दो।

तव्हां चवो पिया माफिया को सुठो अखर कोन आहे पर एस पी सर अमिताभ खे सदी जो महानायक बणायिण वारो बि इहो [दीवार फिल्म जो] माफिया आहे। हा अफ़सोस आहे त को बि सियासी माफिया जी गालिह कोन थो करे। हाणे डिसो न एस पी सर बिया माफिया त हिकु भेरो अमीर गरीब, जात पात जो खियाल कनि था पर सियासी माफिया त सभनी खे हिक सागी नज़र सां पियो डिसे। छा अमीर छा गरीब ! छा आम माणुहू छा चूंडियिल राजनेता हुन जी नज़र में त सभु बराबर आहिन।

तव्हां खे खबर आहे एस पी सर त निखिमिणोमल बिना आधार कुछ न गालिहायीन्दो आहे छो जो आखिर कूड़ गालिहाये मां भगवान वटि कहिड़ो मुंहुं खणी वेन्दुम ?

हालांकि न त इहो पहिरियों भेरो हुओ ऐं न ई भविष्य में इहो वरी न थियण जी गैरन्टी कोयी डयी सघे थो। मां ताजो कर्नाटक में थियल सियासी घटना बाबत पियो चवां एस पी सर। डिसो न एकता डेखारिण जे नाले ते छा थियो ? छा कहिं खे पहिंजे कुटुंब जे मेम्बरन सां गड़िजण त परे गालिहायिण खां बि महरूम करे छड़िण कहिं सियासी पार्टी जो कमु थी सघे थो ? विचार करण जी गालिह त ज़रूर अथव एस पी सर।

चांहि खतम करे निखिमिणोमल त हलन्दो थियो पर मुसीबत त तव्हां असां वास्ते छड़े वियो न ?

सो दोस्तों अचो त गडिजी विचार कयूं त छा असां जहिड़ी लोकशाही वारे देश में सियासी माफिया जो को वज़ूद आहे या न ? जे आहे त इहो केतिरो ताकतवर आहे।