मास्तर चन्दर

मुखे अजु बि याद आहे त मास्तर चन्दर जो नालो मां पहिरियों भेरो अटकल पंजाहु साल अगु पहिंजे पिता जे वातां तडिहिं बुधो हो जडिहिं हुनन असां खे ऐट्र ऐं छोकिरी जी कहाणी बुधायी हुयी। मास्तर चन्दर जो आवाज़ बेहद सुरीलो ऐं मन मोहीन्दड आहे अजु बि जे को नवजवान सिंधी संदस गायल रुठा ही रहन शल हुजेन हयाती बुधे त मास्तर चन्दर जी गायिकी जो मुरीद थी पवे थो ऐं चाहे थो त हिन जा गायल बिया गीत बि बुधे। सिंधी लोक गायिकी जी आत्मा लेखियो वेन्दड मास्तर चन्दर सिंधी नवजवान गायकन, खास करे जिन जो जन्म 1947 जे मुल्क जे विरहांडगें खां पोय थियो आहे, जी होसिला अफ़ज़ाई जो उहो अटूट मरकज़ आहे जेको गायिकी जी राह ते हरदम संदन रहबरी पयो थो करे।

हालांकि एच एम वी संगीत कंपनी जहिं मास्तर चन्दर जा गाना रिकॉर्ड किया आहिन जो चवण आहे त हिन अटकल 400 गाना गाया आहिन पर हकीकत में मास्तर चन्दर जे गायल गीतन जो तादाद हिक हज़ार खां बि वधीक हूंदो। कोशिश थियण घुरिजे त मास्तर चन्दर जे गायल गीतन खे MP3 फॉर्मेट में बदिलायो वञे जीयं न सिर्फ नवजवान सिंधी हिन जी सुरीली आवाज़ जो लुतुफ वठी सघन पर सिंधी संगीत जे आलिशान विरसे खे बि महफूज़ रखी सघिजे।

मास्तर चन्दर जी जन्म तारीख बाबत हिक राय न आहे कुछ चवण पिया त हिन जो जन्म 12 दिसंबर 1907 ते सिंध जे नवाबशाह जिले जे थारु शाह गोठ में हिक ज़मींदार कुटुंब में थियो हो त किन बियन जे राये मूजिब तारीख हुयी 7 दिसंबर । हिन बाबत महेश चन्दर (मास्तर चन्दर जो पुट्र) जो चवण आहे त मास्तर चन्दर जन्म 1907 में गीता जयंती डींहुं थियो हो उन हिसाब सां अंग्रेजी तारीख थिये थी 15 दिसंबर 1907 ऐं डींहुं आरतवार।

जडहिं हुन 12 सालन जी नंढी उमर में मंदिरन ऐं दरगाहुन में गायिण शुरू कियो त तडिहिं ई इहो समझ में अचण लगो त गीत संगीत वासिते मास्तर चन्दर में चाहत न पर दीवानो पन आहे। हिक ज़मींदार कुटुंब में जन्म वठण सबब, गायिण वासिते इन दीवाने पन खे बरकरार रखण का सवली गालिह कोन हुयी। चन्दर जी खुशकिस्मतीअ संदस हिकु चाचो चन्दर जे गायिण जे हुनर खे पसंद करण लगो ऐं हिन जो होसिलो वधायिण वासिते कलकता मां हिन वास्ते हारमोनियम खरीद करे आयो।

काके जीवतराम चन्दर खे संगीत जी रिवायती सिखिया ऐं गायिण जी कला बाबत ज्ञान डिनो। मास्तर चन्दर जो आवाज़ साफ, मिठो, सुरीलो ऐं दिलिन खे छुअण वारो हो। हिन खे गायीन्दे बुधी, हिन जी आवाज़ जी तासीर जो अहसास करे साईं कंवर राम साहिबन अगकथी कयी त हिक डीहुं हीउ छोकरो सिंधी संगीत जी लासानी ऐं बेमिसाल शख्सियत बणजंदो ऐं बियन सिंधी गायकन वास्ते मिसाल साबित थींदो।

1932 में मास्तर चन्दर जो पहिरियों गीत सुहिणा अरज़ु आहे रिलीज़ थियो ऐं ऐतिरो कामियाब थियो जो संगीत जा दरवाजा मास्तर चन्दर वास्ते हमेशा हमेशा लाय खुली विया। संदस सलाहियतुन सबब खेस पुठिते वरी डिसण जो बि मोको कोन मिलियो। इहो गीत क्लासिकल संगीत ते मदार रखन्दड हो ऐं अजु जे संगीतकारन जे राये मूजिब इहा “RAP” गायिण जी पहिरियीं कोशिश हुयी।

मास्टर चन्दर कुछ हिंदी फ़िल्म में बि कमु कियो हो। बतौर हीरोइन देविका रानी जी फिल्म अछूत कन्या में जेको किरदार अशोक कुमार निभायो सो पहिरियूं हिन खे आशियो वियो हो। डिलाराम ऐं मौत का तूफ़ान इहे मास्तर चन्दर जूं शुरुआती फिल्म आहिन। गायिकी चन्दर जो जुनून हुयी सो हिन एक्टिंग जी जगह ते गीत गायिण खे पसन्दगी डिनी। नतीज़े तौर हिन सिंधी गायिकी खे हिक नयी – संगीत ऐं कहाणी जे मेल मां जन्म वरतल – गायिण जी कला जी वाकफियत डिनी। इन गायिकी जी नयीं रीत जी शुरुआत करण सबब मास्तर चन्दर खे संगीताचार्य जो लकब डिनो वयो । मास्तर चन्दर जो तमाम मशहूर गीत अंञा त ऐट्र मां नंढड़ी आहियां इन नयीं कला जो पहिरियों मिसाल आहे।

मुल्क जे विरहांडगें खां पोय मास्तर चन्दर माउ, घरवारी हेती ऐं बारन समेत मुंबई में अची रहियो। संदस ब पुट्र गोप ऐं महेश चन्दर हाणे न्यूयार्क अमेरिका में रहन पिया। किसमत कयी जुदाई ऐं होशियार सिंधी वसीले चन्दर बेहतरीन नमूने में उन बेबसी, लाचारी, गुसे, तक़लीफ़ुन ऐं दुखन जो इज़हार कियो जिनखे सिंधी कौम सिंध मां लड़े भारत अचण जे दौर में मुहं डिनो हो।

मास्तर चन्दर जी खास गालिह इहा बि हुयी त एच एम वी बियन गायकन खे त 5% या उन खां बि घटि रॉयलिटी डीन्दी हुयी पर मास्टर चन्दर खे 7% मिलन्दा हुआ। गीत संगीत जे हिन बेजोड़ फनकार खे कुदरत 3 नवंबर 1984 ते संगीत जूं नयूं रचनाऊँ करण खां हमेशा हमेशा वासिते रोके छड़ियो। मास्तर चन्दर जी यादि में हरि साल राति चन्दर जी सुर चन्दर जा इन सिंधी संगीत कार्यक्रम जो आयोजन कयो वेन्दो आहे जहिं में सिंधी संगीत दुनिया जा फनकार सिंधी संगीत जी आत्मा मास्तर चन्दर खे श्रध्दाजंली डीन्दा आहिन।

दिल त चाहे थी त मास्तर चन्दर बाबत लिखन्दो ऐं लिखन्दो रहां पर छा इहो मुनासिब ऐं मुमकिन आहे?