मुरलीधर जेटली

दिल्ली यूनिवर्सिटी – सिंधी फोनोलॉजी – सिंधी साहित्य – सिंधी लेखक
07 नवंबर 1930 ते हैदराबाद सिंध में जावल मुरलीधर किशनचंद जेटली उमिर जे उन दौर में हो जहिं में इंसानी सरीर न सिर्फ शक्ति जे ज़खीरे ते पर सपनन जी दुनिया ते बि पहिंजी हुकूमत जो अहसास कंदो आहे जो हुन खे मज़बूरी में मुल्क जे विरहांङें सबब तैयार नयीं सरहद पारि करणी पयी। इहो तमाम दुखदायी आज़मूदो हुओ छो जो बेघर थियण सां गडोगडु ज़िंदगी गुज़ारिण जे वसीलन जी बि खातिरी कोन हुयी। इहो शायद त डाडे पंडित टोपणलाल, जेके हैदराबाद जा मशहूर संस्कृत जा माहिर ऐं आयुरवेदिक डॉक्टर हुआ, जी सिखियाउन जो असर ऐं मुरलीधर जी सियाणप हुयी जो हुन इन्हन दुखन, तक़लीफ़ुन जी तपिश खे सिंधियत जी जोति जगायिण वास्ते घुरिबल ज़ज़्बे में बदिलायिण में कामियाबी हासिल करे सिंधी अदबी दुनिया में मानवारी जगह हासिल कयी आहे।

विरहांङें जे तक़लीफ़ुन सां भरियल ऐं असंतोष खे जन्म डियण वारे अरसे खे याद कंदे हिकु इंटरव्यू में डॉ मुरलीधर चयो आहे त संदस कुटुंब भारत में पहिरियूं जोधपुर ऐं पोय अबू रोड में अची रहियो इन लड पलाण सबब हू 1948 में मैट्रिक जो इम्तिहान न डयी सघियो। जहिं वासिते हुन खे चाचे वटि बड़ोदा वञणो पियो ऐं 1949 में हुन मैट्रिक जी परीक्षा पास कयी। इन वक़त तायीं संदस कुटुंब पुणे में रहण शुरू कियो हो सो हुन पुणे यूनिवर्सिटी में दाखिलो वठी एम ऐ ऐं फिलोसॉफी में डॉक्टरेट जी डिग्री हासिल कयी। कॉलेज जी पढ़ायी कंदे मुरलीधर नवीन हिंद हाय स्कूल में हिंदी ऐं संस्कृत पढ़िहायिण जो कमु बि कयो।

1965 में मॉर्फोलॉजी ऑफ़ सिंधी लैंग्वेज हिन विषय ते रिसर्च वासिते हुन खे पुणे यूनिवर्सिटी मां पी एच डी जी डिग्री मिली ऐं हू इहा तैलीमी कामियाबी हासिल करण वारो पहिरियों सिंधी बणियो।

Ph.D. हासिल करण खां पोय खेस पुणे जे डेकन कॉलेज में सिंधी भाषा जे लिंगविस्टिक विभाग में रीडर जे ओहदे ते कमु करण जो वझु मिलियो जिते हू बियन सां गडु सिंधी -अंग्रेजी डिक्शनरी ठाहिण जे प्रोजेक्ट ते बि कमु करण लगो पर उल्हासनगर जे आर के तलरेजा में हिंदी जे लेक्चरर जी नौकरी मिलण सबब हुन खे इहो प्रोजेक्ट अध में छडिणो पयो। उल्हासनगर में रहन्दे डॉ मुरलीधर मुंबई मां छपिजण वारी हफतेवार हिंदवासी जे सब एडिटर जो कमु करण बि करण लगो। 1966 में खेस दिल्ली यूनिवर्सिटी में सिंधी लेक्चरर जी नौकरी मिली ऐं 1995 में हू दिल्ली यूनिवर्सिटी मां रिटायर थियो।

डॉ मुरलीधर सिंधी लेखकन जी उन विरली ज़मात में शामिल आहे जेके पहिंजी का बि रचना छपायिण खां अगु गहरी खोजना ऐं उनिहे अभ्यास खे वधीक अहमियत डियन था। दर हकीकत में संदस इन आदत में संदस नवल राय हीरानंद अकादमी जे टीचर श्री राजपाल पूरी ऐं बालपणे में मिलियिल घरु माहोल जो वडो हथु आहे छो जो इन्हन बिन्ही जे गडियिल असर हेठि 10 – 12 सालन जी नंढी उमिर में ई मुरलीधर में पढ़िहण जी आदत पैदा थी वयी। डॉ मुरलीधर न सिर्फ सिंधी साहित्य जो इतिहास हिक किताब जे रूप में पेश कियो आहे पर गडोगडु सिंधी साहित्य जी लासानी रचना शाह जो रिसालो ते पहिंजे अभियास खे बि हिक किताब जे रूप में पेश कियो आहे।

दिल्ली यूनिवर्सिटी में कमु करण दौरान डॉ मुरलीधर साहित्य अकादमी, के के बिर्ला फाउंडेशन ऐं भारतीय ज्ञान पीठ सां बतोर मेंबर जुड़िजण खां सिवाय दिल्ली सरकार जी सिंधी अकादमी जे ऑनररी सेक्रेटरी [1994 -1996] जे ओहदे ते बि कमु करे चुको आहे। जून जी शुरुआति खां डायबिटीज जी बामारी सां जुडियल तंदुरिसतीअ जी खराबी सबब असपताल में दाखिल डॉ जेटली जो 03 जुलाई  2023 जो शाम जे पंजे बजे दिल्ली में सुरगवासु थियो।  संदन अंतिम संसकार सुभाणे  (04 जुलाई )  ते कयो वयो।