नओं साल - मासूय सवाल

साल 2021मोकिलायिण जी तयारी में लगो पयो आहे त साल 2022 शुरुआति करण जे पहिंजे वझ जो बेसबरी सां इंतिजार पयो थो करे। हर साल सिंधी सोशल मीडिया ते इहो अरसो थींदो आहे सिंधियत वासिते पहिंजी सिक ऐं हुब जो नुमाउ (प्रदर्शन Exhibition) करण जो मतलब गैर सिंधी भाषा में लिखियल नयें साल जे सुवागत जा मेसेज
अजु सिरफ तारीख बदली रही आहे असां सिंधियिन जो नओं साल त चेट्री चंड्र खां शुरू थींदो सो मां त नयें साल जूं वाधायूं तडहिं ई कबूल कंदुम।
जहिडे अखरन सां गडु फॉरवर्ड करण जो। मजेदार गालिह इहा हूंदी आहे त इहे अखर बि गैर सिंधी भाषा में लिखियल हूंदा आहिन।
मां ऐतिरो मस लिखियो हुओ जो व्हाट्सऐप ते नओं मेसेज अचण जे अर्लट जो आवाज़ थियो (मां व्हाट्सएप्प बि कंप्यूटर ते वापिराईंदो आहियां)
कल्ह जे मुहिंजे गोवा जे बीच सेलिब्रेशन जे वीडियो खे मुहिंजे व्हाट्सएप्प स्टेटस तोर शेयर करण जे जवाब में कहिं त हिकु बेहद मासूमियत भरियो कमेंट सिंधी अरबी में लिखी मोकिलियो हुओ
हिन में का सिंधियत त नजर न थी अचे
हाणे डियो जवाब एस पी सर !
साईं निखिमिणेमल जो आवाज बुधी मां शिरकु भरियो छो जो हिकु त सुबूह जो 10 बजे हुन साहिब जे अचण जो को मतलब ई कोन आहे ऐं बियो मुखे खबर ई न पयी त साईं निखिमिणोमल मुहिंजे पुठियां बीठो पढ़े पयो।
सिंधियत! सिंधियत! पया कन्दा आहियो न एस पी सर ! अथव कोयी जवाब ? हाणे त तव्हां सिंधी भाषा जे उपयोग न करण जी दांह बि न था करे सघो छो जो सामहूं वारे अरबी सिंधी में लिखी मोकिलियो अथव।
साईं निखिमिणामल! भला अहिडा मासूमियत भरिया सवाल बि जवाब जे काबिल हूंदा आहिन छा ?
बहानो न कयो एस पी सर ! सिधो छो न था चवो त तव्हां वटि इन सवाल जो जवाब कोन्हे?
सिधो जवाब त मूं वटि वाकयी कोन आहे साईं पर मुहिंजो जवाब बुधण लाय तव्हां वटि सबुरु मतलब मुखे बुधण जो वकतु बि आहे छा ? जेकडहिं मुखे गालिहायिणु डियो त मां जरुर तव्हां खे संतोष डियण वारो जवाब डियण जी कोशिश कयां।
मुहिंजी उमीद जे खिलाफ साईं निखिमिणेमल कुरसी ते विहंदे चयो वायदो आ एस पी सर त अजु मां तव्हां जी गालिह पूरे धियान सां बुधन्दम पर पहिरियूं भाभी खे चाहिं लाय त चवो न।
छा आहे साईं निखिमिणामल त इहो सवाल या कमेंट मुहिंजे उन विषय सां ई जुडियल आहे जहिं ते मां लिखां पयो।
उहो विषय छा आहे एस पी सर ! पहिंजो वायदो विसारे साईं निखिमिणेमल चयो।
विषय त इहो मासूमियत भरियो सवाल ई आहे पर मां इन सवाल खे नयें साल सां जोड़े लिखण पे चाहियो?
उहो बि बुधायिजो एस पी सर ! पर पहिरियूं हिन अरबी सिंधी में लिखियल कमेंट ते पहिंजा विचार बुधायो। छो जो हमेशा वांगुर सिधो जवाब त तव्हां डीन्दा न।
साईं निखिमिणामल अजु जहिं जुग में असां जियरा आहियूं उन जुग में
अलिमाडीअ खे वडी अहमियत हासिल आहे अलिमाडीअ में रखियल सामान खे न। अलिमाडी साधन आहे सामान खे संभाले सुठे नमूने रखण जो पर हिन समे में असां जे सिंधी समाज में अलिमाडीअ खे अंदर रखियल सामान जी भेट में बि वधीक अहमियत हासिल आहे ?
थोरो वधीक चिट्रायी सां बुधायो न एस पी सर ! जीयं साफ साफ समझ में अचे।
साईं निखिमिणामल मुखे हिक गालिह बुधायो तव्हां खे अलिमाडीअ त नजर ईंदी आहे पर छा तव्हां खे इहो बि नजर ईंदो आहे त अलिमाडीअ अंदर रखियल छा आहे ?
तव्हां कमाल न था कयो एस पी सर ! भला अलिमाडीअ खे खोलिण खां सिवाय मुखे अलिमाडीअ में रखियल सामान कीअं नजर अची सघे थो ?
सही था चवो साईं, हाणे हिक बी गालिह बि बुधायो अहमियत कहिंजी आहे ? अलिमाडीअ जी या अलिमाडीअ जे अंदर रखियल सामान जी ?
कमाल न था कयो एस पी सर ! भला जे अंदर रखियल सामान, कीमती, जरुरी ऐं असां वासिते अहमियत वारो न हुजे त पोय असां खे अलिमाडीअ जी जरुरत ई कहिडी आहे ?
बस इहो ई आहे इन्हन मासूमियत भरियल सवालन जो जवाब त अजु जे समे में अलिमाडीअ (नजर अचण – डेखाव) खे त कीमत आहे पर अलिमाडीअ में रखियल सामान खे न।
मुहिंजे चवण जो मतलब इहो आहे त तव्हां छा आहियो ? कहिडी काबिलियत – सलाहियत रखो था? (अलिमाडीअ में रखियल सामान) सिंधी समाज में अजु इन जी का कीमत न रही आहे। अहमियत आहे त अलिमाडीअ (नजर अचण – डेखाव) खे।
इहो त तव्हां सचु था चवो एस पी सर ! कहिं खे कहिडी खबर त मुखे सिंधियत जी घणी जानकारी आहे पर आम सिंधीअ जे वासिते त निखिमिणोमल सिंधी अगुवान आहे।
मां तव्हां जी गालिह सही नमूने समझी आहे न एस पी सर ?
हा साईं। हाणे तव्हां बुधायो त गोवा जी बीच ते सिंधियत गोलिहिण वारे इन मासूम सजण खे मां कीअं समिझायां त जहिं सिंधियत खे उहो गोवा जी बीच ते गोलिहे पयो थो त उन सिंधियत जो त केतिरा साल अगु पहिंजे ई घर में पहिंजन ई मासूम हथन सां हू खून करे चुको आहे।
तव्हां जो इहो चवण बि बिलकुल सही थो लगे। बराबर अजु असां सिंधी अखरन जो सही ऐं जोगो अरथु समझण खां सिवाय पया था वापिरायूं ऐं बियन जी नजरुन में ज्ञानवान बणिया वेठा आहियूं।
तव्हां सही समझियो आहे साईं। मुखे खबर आहे त साईं निखिमिणेमल खे सिंधी भाषा ऐं सिंधियत जो घणो ज्ञान आहे छो जो मां तव्हां खे सुंञाणा मतलब मां अलिमाडीअ जे नजर अचण वारे रूप जी जगह ते अलिमाडीअ खोले अंदर रखियल सामान डिठो आहे।
मां समझी वयुस एस पी सर ! मां त सोचियो हुओ त हिन भेरे नयें साल जो सुवागत करण जा मेसेज मोकिलिण वारन जी चंगी तरह खल लाहे सिंधियत जो परचम बुलंद कंदुम पर तव्हां जी गालिह बुधी समझ में आयो आहे त इहो न सिरफ गैर जरुरी आहे पर बिना मतलब बि आहे।
साईं निखिमिणोमल त हलियो वयो पर नयें साल जे सुवागत करण वारन मेसेजन जी मुख़ालफ़त (विरोध) करण वारन मासूमन जी इन गालिह जो छा कजे जो उन्हन खे खबर ई न आहे त
01. उहे पहिंजी ज़िंदगी जो हर ख़ुशी हुजे या गम जो मोको अंग्रेजी तारीख मूजिब था मलिहायिन।
02. उन्हन जी संतान सिंधियत वारे माहोल जे स्कूल में न पर अंग्रेजी ऐं मकानी (क्षेत्रीय) भाषा वारे माहोल में पढ़ायी करे पयी थी।
03. बियो त परे असां जो सिंधी समाज पहिंजा सिंधी डिण त्योहार बि इन अंग्रेजी साल या अंग्रेजी तारीख मूजिब थो मलिहाये।
छा तव्हां महसूस न था कयो त इन्हन गालिहिन ते विचार त थियण घुरिजे?