निरंजन हीरानंदानी

निरंजन हीरानंदानी जो जन्म 08 मार्च 1950 ते थियो आहे। संदस पिता जो नालो लेखुमल हीरानंद हीरानंदानी ऐं माता जो नालो कांता हीरानंदानी आहे। पिता डॉ हीरानंदानी हिक मशहूर ENT सर्जन हो जेको मुल्क जे विरहांङें खां अगु खां, 1942 खां मुंबई में रहन्दो हो तहिं करे बियन नंढन सिंधी बारन वांगुर निरंजन खे विरहांङें जे दर्दनाक दौर खे मुहं न डियणो पियो। 1947 -1948 जे सालन में डॉ हीरानंदानी जी जान सां भारत आयल सिंधियिन जी सेवा में लगल हो तहिं करे नंढी उमर में ई निरंजन में सामाजिक कमन लाय चाह पैदा थियो। इन चाह जो नतीज़ो आहे त अजु हू केतिरिन सामाजिक संस्थाउन, स्कूलन ऐं कॉलेजन सां जुडियिल आहे।

निरंजन खे स्कूली तैलिमी वासिते मुंबई जे कैंपियन स्कूल में दाखिल कयो वयो हो। हुन सिडनहम कॉलेज मां कॉमर्स जे ग्रेजुएट जी डिग्री हासिल कयी। इंस्टिट्यूट ऑफ़ चार्टर्ड एकाउंटेंट्स ऑफ़ इंडिया मां FCA पूरो करे हुन हिक अकाउंट टीचर जे रूप में कमु करण शुरू कयो। कारोबार जी दुनिया में निरंजन जो पहिरियों कदम हो 1981 में मुंबई में कांदिवली में हिकु नंढो टेक्सटाइल वीविंग यूनिट शुरू करण पर अजु जे निरंजन हीरानंदानी बणिजण जे सफर जी शुरुआत थी 1985 में जडिहिं हुन भाउ सुरेन्द्र हीरानंदानी सां मिली करे पवई में अटकल 200 एकड़ ज़मीन ते हीरानंदानी गार्डन जी शुरुआत कन्दे रियल एस्टेट जे धंधे में पेर रखियो।

निरंजन हीरानंदानी, हीरानंदानी ग्रुप जो को फाउंडर ऐं मैनेजिंग डायरेक्टर आहे। इहो ग्रुप रियल एस्टेट जे धंधे सां जुडियिल आहे। जे निरंजन जी कामियाबी जो विचार कजे त शक्तिअ (ऊर्जा) जे लिहाज खां सलाहियतुन वारी बनावट, बिल्डिंग ठाहिण जी विद्या [Architectural] जे लिहाज खां मुनासिब ठहकन्दड डिजाइन, कीमत ऐं मार्केट जी घुर [Demand] में मुनासिब मीज़ान बरपा करण कुछ गालिहियूं आहिन जिन खेस भारत जी रियल एस्टेट दुनिया जो कामियाब ऐं नामवर बिजनेसमेन बणिजण में मदद कयी आहे।