बिना सबब ऐतिराज

साई निखिमिणोमल लगभग 20 डीन्हन खां पोय अजु वरी चाहिं पियण जे वकत ते अची हाज़िर थियो सो मुखे महसूस थियो त वापास वंञण खां अगु पहिंजे वायदे मूजिब आयो आहे ।

तव्हां कमाल न था कयो एस पी सर ! छा मां बिना कहिं सबब सिरफ चांहिं पियण लाय न थो अची सघां छा? 

छो न पर हाणे तव्हां वडा माणुहु 

हमेशा वांगुर साईं निखिमिणेमल मुहिंजे आवाज़ खे बन्द कराये चवण शुरू कयो ।

सिरफ अचण छो एस पी सर हिन दुनिया मे बेशुमार गालिहियूं बिना सबब थी सघन थियूं ? 

पर साईं विज्ञान त चये थो त मोट क्रिया त क्रिया खां सिवाय न थिये ऐं ऐतिराज बि त मोट 

मुहिंजो गालिहियिण हमेशा वांगुर पूरो थियण जी कोशिश में बेवकतो मोतु मुओ ।

तडिहिं त चवांव थो कुझु त मॉर्डन थियो एस पी सर ! नयें जमाने जा नंवा तरीका  सिखो ।

हाणे डिसो न भला गोवा वयल काके वटि कहिडो सबब आहे कुझु हज़ार खरचु करे पहिंजन खीर जहिड़न सफेद वारन खे कुझु किलाकन लाय रंग बिरंगो बणाये मिनी चड़ो ऐं टी शर्ट पाये डिस्कोथेक में वञण जो या बाहुन जे डोरन ते अजीबोगरीब टेटू ठाहिरायिण लाय?

मां कुझु चवण चाहियो पर साईं निखिमिणोमल माठि करे इहो बि मुमकिन कोन हो ।

इहा त हुन काके खे बि खबर आहे त मोटी अची पैजामो कुरतो पाये दुकान ते वेन्दो सो इहो टेटू त कहिं खे नजर अचणो आहे कोन ।बुधायो एस पी सर हुन काके जो टेटू कढ़ाइणु बिना सबब आहे या न ? जे सबब गोलिहिण जी कोशिश कन्दा त बस इहो मिलणो अथव उमिर खे मारि गोली गोवा आयो आहियां त कुझु त ऐश मां बि कयां। 

ऐं बिना सबब जे ऐतिराज जी गालिह त असुल न कजो एस पी सर ! दुनिया में हिकु ऐतिराज ई आहे जेको खणण लाय तव्हां खे न त सबब जी जरुरत आहे ऐं न ई इहो सोचिण जी त ऐतिराज करण सही आहे गलत ? 

बियो त परे पर ऐतिराज करण वासिते तव्हां जो ज्ञानवान हुजण बि जरूरी न आहे। ऐतिराज खणण वासिते इहा गालिह बि बेमतलब आहे त जहिं विषय जी गालिह ते ऐतिराज अथव उन विषय जो तव्हां सां को लागापो आहे या न ? 

एस पी सर समझण जी कोशिश कयो ऐतिराज तव्हां जो उहो सामाजिक हक आहे जेको तव्हां खां न त केरु खसे सघे थो ऐं न ई इन ऐतिराज करण जे उपयोग करण खां तव्हां खे केरु रोके सघे थो। 

मुहिंजी गालिह धियान सां बुधिजो एस पी सर ! उहे चरिया आहिन जेके ऐतिराज लाय सबब था गोलिहिन। ऐतिराज त भाई सिरफ ऐतिराज आहे जहिं जे वासिते फ़ासीअ जी सजा त मिलणी न आहे। 

मुहिंजी त सभनी खे सलाह आहे त जेतिरो वणेव ओतिरो ऐतिराज खणो ऐं पहिंजे ऐतिराज खणण जो पूरो पूरो उपयोग कयो। एस पी सर जी चिंता त मागे असुल न कयो। 

छा एस पी सर तव्हां जी फरमाइश ते मुहिंजा ऐतिरा किसा लिखण ते कडिहिं ऐतिराज कयो आहे ? न न त पोय असां खे ऐतिराज खणण वासिते सबब गालिहिण जी जरुरत कहिडी आहे। 

साईं निखिमिणोमल त हलन्दो थियो आहे ऐं इहो मुहिंजे हथ त आहे कोन जो मां ऐतिराज करे सघां।