हज़ार लफजन जे बराबर

छा इहो मुमकिन आहे त को हिकु या ब लफ़ज़ हज़ार लफजन जे मुलह ऐं अहमियत वारा बणिजी पवन ? छा को अहिड़ो हिकु लफ़ज़ थी सघे थो जो हज़ारें लफजन जी तासीर ऐं असर रखन्दो हुजे ?

जे असां डिसूं त अहिड़ो हिकु लफजु न सिर्फ असां खे खबर आहे पर असां बाखूबी उन जो वापर बि कंदा आहियूं फरकु सिर्फ इहो आहे जो असां सिंधी मुनासिब मोके ऐं मुनासिब जगह ते इन जे वापर में कंजूसी वास्ते उन नमूने ऐं ओतिरा ई मशहूर आहियूं जेतिरो असां जी धंधो करण ऐं पैसा कमायिण जी काबलियत।

तव्हां ज़रूर विचार करे रहिया आहियो न त सिंधी कौम त पहिंजी फराखदिली वास्ते फेमस आहे हीउ अजु एस पी सर खे छा थियो आहे जो सिंधी कौम खे कंजूस चयी रहियो आहे।

असां जे पहिंजे निखिमिणेमल मूजिब बि जे असां ध्यान में आणियूं त इहो समझण में का देर न लगंदी त

[1] हर हिक शहर जे सिन्धियन जा 5 -8 व्हाट्सएप्प ग्रुप आहिन।

[2] हर हिक ग्रुप जे नाले में सिंधी, झूलेलाल , सिन्धियत , सिंधी भाषा जहिड़ा लफ़ज़ बि ज़रूर शामिल आहिन।

[3] आम तोर हिक ग्रुप में 50 खां 100 मेंबर्स आहिन ऐं व्हाट्सएप्प ते एक्टिव हर सिंधी 5 -8 ग्रुप्स जो मेंबर पिण आहे।

[4] हर हिक ग्रुप में आम तोर रोज़ 50 खां वधीक पोस्ट थियन थियूं पर इन्हन पोस्ट्स जो 10 % बि सिंधी भाषा या सिन्धियत सां लागापो न थो रखे।

[5] वधीक तादाद उन्हन सिंधी ग्रुप्स जो आहे जेके दावो त कनि था त उन्हन जे मेंबर्स में वधिक तादाद अलग अलग शहरन जा आहिन पर उन्हन में जेके पोस्ट लिखियूं वञन थियूं तिन में सागी पोस्ट्स जो तादाद काफी वडो थिये थो।

[6] रोज़ हिक या हफ्ते में मुशकिल सां 5 -6 पोस्ट सिंधी भाषा में लिखियिल थियन थियूं न त हिंदी अंग्रेजी में लिखियिल फॉरवर्ड थियण वारिन पोस्ट्स जी बादशाहत कायम आहे।

[7] जेके सिंधी में लिखन था से बि पाण में जोश जी घटितायी जो अहसास कनि था छो जो ग्रुप जा बिया मेंबर्स उन्हन जी पोस्ट या त पढ़हिन न था या रिस्पांस डियण में कंजूसी कनि था।

मुखे खबर कोन हुयी त मां हीउ जेको लिखां पियो थो सो निखिमिणोमल मुहिंजे पुठियाँ बीठो पढ़े पियो।

वाह एस पी वाह ! मां त समझां पियो त तव्हां सिर्फ लिखण वास्ते लिखंदा आहियो पर तव्हां त साराह जी अहमियत जी समझाणी तमाम बेहतर नमूने समझायी आहे।

त दोस्तों इहो हिकु लफ़ज़ आहे साराह जेको हज़ारें लफजन जी तासीर ऐं असर रखे थो ऐं जहिं जे वापर में असां केतिरा फ़राख़दिल या कंजूस आहियूं इन जो फैसिलो मां तव्हां ते छड़ियां थो। तव्हां पाण फेसिलो कियो त सिंधी साराह करण में कंजूस आहिन या फ़राख़दिल ?