पचर परायी

अजु जो निखिमिणोमल रोज़ वारे खां जुदा पे महसूस थियो छो जो नुकतचीनी ऐं पचर जहिड़े विषय ते सवाल पुछण खां पोय बि हू न त बेसबिरो पियो लगे ऐं न ई हमेशा वांगुर जवाब जो इंतिज़ार किये बिना पहिंजा विचार रखण जी ज़हनियत में हुओ। संदस सवाल हुओ

इहो त सभनी खे खबर आहे एस पी सर त पर पुठि जी पचर छा राजा छा खचर पर छा इहो बि सचु न आहे त हकिकत में इहा पचर ऐं बिना मतलब जी नुकतचीनी जी आदत सिंधी समाज में एकता जी अणाठ जे मुख्य सबबन मां हिकु आहे ? मुखे त एस पी सर इहो बिलकुल समझ में कोन थो अचे त असां सिंधियन जी खायिन पियन पहिंजो पचर कनि परायी वारे रुख में बदिलाव कीयं ईंदो ?

साईं निखिमिणामल छा आहे जो इंसानी स्वाभाव आहे त इंसान खे सवलो कमु करण वधीक पसंद पवे। हाणे तव्हां पहाकन जो उपयोग कियो आहे त मां बि हिंदी जो मुहावरो कमि आणे चवांव थो सिंधी कौम आहे धंधे जे लाडे मतलब हर गालिह में नफे नुकसान जो विचार करण वारी सो इहा परायी पचर या बियन जी मीन मेख कढ़ण जी गालिह उन्हन वास्ते हींग लगे न फिटकरी फिर भी रंग चोखा जहिड़ी थिये।

पहिंजे स्वभाव मूजिब निखिमिणेमल बियो सवाल सामहूं रखी छडियो।

पर एस पी सर को जाणु नुकतचीनी करे त गालिह समझ में अचे थी पर हिते त हालत इहा आहे जो मेंहि चये गाईं खे हलु पुछ कारी ? हाणे जे तव्हां असां सिंधियन जी इन हलत खे समझाये सघो त तमाम सुठो।

मां निखिमिणेमल खां इहो वायदो वठी त हू पहिंजा चप सिर्फ चाहिं पियण में रुधियिल रखन्दो गालिहायिण शुरू कियो। डिसो साईं निखिमिणामल अजु ज़मानो आहे शोहरत ऐं पाण खे ज्ञानवान साबित करण जो सो

[1] हर हिकु चाहे थो ऐं कोशिश करे थो त बिना कमायी नानिका मुखे साधन जहिड़ो करि मतलब असां कोशिश कयूं था त बिना मेहनत शौहरत हासिल करे समाज जे जाणुन ऐं ज्ञानवान शख़्सियतुन में शुमारिया वंञू।

[2] इहा त असां खे खबर आहे त कमु करण डुखी गालिह आहे पर बिये जे कियल कम में गलतियूं कढ़ण को खासु डुखियो न आहे सो असां इहो गलतियूं कढ़ण जो घटि डुखियो कम चूंडियूं था।

[3] इहो त तव्हां चवो समझो था न त मेंहि चये गाईं खे हलु पुछ कारी पर मेंहि वास्ते त संदस सजो रंग हिक करो आहे ऐं अछी गाईं जो कारो पुछ गाईं जी घटितायी आहे सो मेंहि पहिंजी समझ, ज्ञान ऐं अकुल मूजिब गाईं खे पुछ कारी चवण में न त का झिझक महसूस करे थी ऐं न ई उन खे इहा गालिह गलत महसूस थिये थी।

माठि करे विहे मतलब उहो निखिमिणोमल कीयं सड़ायिजंदो सो वायदो करण खां पोय बि निखिमिणोमल पहिंजी वाणी खे विराम डियण में कामियाब कोन थियो।

हिकु आम माणुहू इहा हिमाकत करे त गालिह समझ में बि अचे एस पी सर पर हिते त अहिड़ा बि आहिन जिन खे न सिर्फ पहिंजे कहिं हुनर / कला सबब या कहिं अखिल भारतीय संस्था जे ओहदेदार तोर शौहरत हासिल आहे या जिन खे सोशल मीडिया ते जाणू ऐं ज्ञानवान लेखियो पियो वंञे अहिड़ा बि या त इहा गालिह पाण कनि था या वरी करण वारन जी पुठिभरायी कनि था।

समझण जी कोशिश कियो साईं निखिमिणामल असां

[1] लोकशाही में रहूं पिया ऐं लोकशाही मतलब अंगन ऐं तादाद जी ताकत। सो हर हिकु चाहे थो तादाद में पुठिते न पवे ऐं इन कोशिश में बियन जी गलत गालिह जी पुठिभरायी करण लाचारी बणिजी पवे थी। मुखे खबर आहे तव्हां गलत आहियो पर जे मां चवंदुम त छा तव्हां पहिंजो रसतो धार न करे छड़िईन्दा ? सो लाचारी में मुखे तव्हां जी गालिह खे सही चवणो पवन्दो।

[2] केतिरा ई भेरा असां खे इहा बि खबर हून्दी आहे त सामहूं वारे जी गलती अणजाणीय में थियल आहे पर इहा असां खे मोको थी डिये पहिंजी अहमियत डेखारिण जो – पाण खे कम करण वारे खां वधीक ज्ञानवान ऐं आजमूदेगार साबित करण जो – हाणे जे इन मोके जो फायदो न वठऊं त केर असां खे सियाणो चवन्दो ?

मुखे कुछ बियो बि चवणो हुओ पर बेसबिरे निखिमिणेमल रोके छड़ियो।

तव्हां हीउ लेख अजु ई पोस्ट कन्दा न एस पी सर ? त मां मोकल थो वठां। आखिर तव्हां किथे त टाइपिंग जी गलती कन्दा न सो मुखे बि मोको मिलन्दो गलती कढ़ी शौहरत हासिल करण जो ऐं ज्ञानवानन, सियाणन ऐं आजमूदेगारन में शामिल थियण जो।

दोस्तों मां बि त अजु जे ज़माने में पियो जियां सो निखिमिणेमल जो इंतिज़ार वधाये हीउ लेख 12 किलाकन खां पोय पोस्ट करे रहियो आहियां उमीद त सुभाणे तायीं तव्हां निखिमिणोमल जी कढ़ियल गलतिन सां बि वाकिफ थी चुका हून्दव। मोखे मोकल डियो कबीर साहिब जे हिक दोहे सां गडु

कबीरा तेरी झोपड़ी गलि कटियन खे पास
जो करेंगें सो भरेंगें तू क्यों भयो उदास।