पी डी हिंदुजा

मुंबई या पुराणे समे जे बॉम्बे खे सपनन जो शहर बि चयबो आहे छो जो जे तव्हां में हिमथ ऐं होसिलो आहे। जे तव्हां पंहिंजे सपने खे हकीकत जो जामो पहिरायिण खातिर बिना थके मेहनत करण लाय तैयार आहियो त मुंबई जी धरती तव्हां खे ना उम्मीद न कन्दी। हुअ तव्हां खे बेशुमार मोका डीन्दी पहिंजे सपने खे हकीकत बणायिण लाय। मुंबई जी इन सलाहियत जो गवाह फेमस सिंधी बिजनेसमेन परमानन्द हिंदुजा बि आहे जहिं 14 सालन जी नंढी उमर में मुंबई में पैर रखिया हुआ ऐं कारोबार जो हिकु वडो राजु “हिंदुजा ग्रुप ” ठाहिण में कामियाबी हासिल कयी।

परमानन्द दीपचंद हिंदुजा जो उसूल हो “डियण लाय कमु करियो “ ऐं इन उसूल न सिर्फ हिन खे कामियाब बणायो पर इन उसूल खेस कारोबारी दुनिया जे आकाश जो रोशन सितारो बि बणाये छडियो। हिन जो चवण हो “मुखे पहिंजन लफजन जो मानु रखन्दे उन मूजिब हलत हलण घुरिजे “ कारोबार में संदस इन रुख वारी हलत सबब ई हू हिमालय जबल जहिड़े ऊँचे मुक़ाम ते पहुची सघियो।

हीउ चाहिं पियन्दड ऐं पूरी तरह सां वेशनु खाधो खायिन्दड शख्स इन लिहाज खां बि खुशनसीब हो जो संदस घरवारी जमुना देवी आध्यात्मिक ज़हनियत वारी नारी हुयी जेका न सिर्फ परमानन्द सां सदा साणु हूंदी हुयी पर हुन खे घुरजाउन जी वधीक ऐं वधीक मदद करण वासिते हिमथायीन्दड हुयी। परमानन्द मूजिब “कमु करण मुहिंजो धर्म (फरज़ु ) आहे जीयं मां बियन खे डयी सघां। “ हू सिर्फ पहिंजिन सामाजिक जवाबदारिन खां वाकिफ कामियाब बिजनेसमेन न पर हिकु देश भक्त बि हो जेको मुल्क खे आज़ाद करण जी कोशिश में लगियिल जी मदद करण सां गडु पाण बि आज़ादी जी हलचलुन में शामिल थींदो हो।

परमानन्द में आदत हुयी त हू हमेशा पहिंजी कमायी जो हिकु हिसो दान या बियन जी मदद वासिते महफूज़ रखन्दो हो। 1944 में इंसानियत जी सेवा जे वासिते हिन पहिरियों मज़बूत कदम पहिंजी माता जी यादगिरी में बरपा कियिल “श्रीमती पहुंचबाई दीपचंद हिंदुजा ट्रस्ट ” जे रूप में खन्यो। इहो ट्रस्ट अजु मुंबई जो मशहूर KPB हिंदुजा कॉलेज ऑफ़ कॉमर्स हलाये पियो। 1947 जे बदनसीब साल परमानन्द जे असली मददगार चेहरे खे सामहूं आन्दो मुल्क जे विरहांङें सबब दुखन ऐं तक़लीफ़ुन जे तूफ़ान सां घिरियिल सिंध मां भारत अची मुंबई में थायिंका थियण जी कोशिश कन्दड सिंधी कुटुंबन जी हिन हर मुमकिन मदद कयी।

परमानन्द मूजिब

“सुठी तंदरुस्ती ऐं पढ़ायी न सिर्फ वाधारे लाय ज़रूरी आहिन पर हर इंसान जो बुनियादी हकु बि आहिन। “

तहिंकरे हिन 1951 में हिक नंढी किलिनिक शुरू कयी जेका अजु वधी पी डी हिंदुजा नेशनल हॉस्पिटल एंड मेडिकल रिसर्च सेंटर मुंबई जो रूप अख्तियार करे चुकी आहे। 1968 में परमानन्द जी रहबरी में “हिंदुजा फाउंडेशन ” हिकु पब्लिक चेरीटेबल ट्रस्ट वज़ूद में आयो। इहो ट्रस्ट जिन मुख्य रुखन में कमु करे थो से आहिन

तंदरुस्ती – तैलीम [पढ़ायी] – कला – तहज़ीब [कल्चर] ऐं हिक बिये खे समझण – सामाजिक सलामतीअ ऐं खुशहाली ऐं रान्दियूं

परमानन्द हिंदुजा जो 1971 में सुरगवासु थियो। संदस चार पुट्र श्रीचंद ऐं गोपीचंद (लंदन में रहन्दड UK जा नागरिक), प्रकाश (जिनेवा में रहन्दड स्विजरलैंड जो नागरिक) ऐं अशोक हिंदुजा (मुंबई में रहन्दड भारत जो नागरिक) अजु बि पिता जे शुरू कियिल कमन खे अगते वधायिन पिया।

श्रीचंद हिंदुजा – हिंदुजा ग्रुप चेयरमैन – जो चवण आहे त “असांजो मकसद आहे पुल ठाहिण, भारत ऐं बियन मुलकन जे विच में, माज़ी [Past] ऐं अजु [Present] जे विच में, हाणोकी पिढियिन ऐं अीन्दड पिढियिन जे विच में। ” शल साईं हिंदुजा कुटुंब खे उहा कुउत ऐं सलाहियत बख्शे जो स्वर्गवासी परमानन्द दीपचंद हिंदुजा जा शुरू कियिल कम रहन्दी दुनिया तायीं हलन्दा रहन।