परसराम जिया
Introductory
सजो नालो: परसराम हीरानंद सचानन्दानी
तखलुस: जिया
मशहूर नालो: परसराम जिया
जनम तारीख़: 11 July 1911
जनम जो शहर: टंडो आदम सिंध
रियाइश: उल्हासनगर
मशहूरी: सिंधी कवी- सिंधी गीतकार – सिंधी टीचर तरजुमेकार
सुरगवासु: 28 October 1958
खास जाण: अज़ु बि केतिरिन ई सिंधी घरन में सुबूह जो नियम सां भगवंती नावांणी जी गायल सुखमनी साहिब बुधण जी रीत आहे। सुखमनी साहिब गायिण भगवंती जे बेहद मशहूर करे छडियो पर किन विरलन खे ई खबर आहे त सुखमनी साहिब जो इहो सिंधी तरजुमो परसराम जिया साहिब कयो आहे।
बायोग्राफी - परसराम हीरानंद सचानन्दानी "जिया"
फेमस सिंधी कवी गीतकार – सिंधी साहित्य – सिंधी फिल्म – अबाणा
परसराम जिया जो जन्म 11 जुलाई 1911 ते टंडो आदम [प्रेम प्रकाश पंथ जो अहमियत वारो स्थान] सिंध में थियो हो। परसराम जिया शायद त वाहिद सिंधी गीतकार आहे जहिं जा लिखियिल गीत मास्तर चन्दर, भगत रांझन, बालू सी रानी, प्रो. राम पंजवानी, सी एच आत्मा, भगवंती नावांणी ऐं बियन सभनी मशहूर सिंधी गायकन गाया आहिन। परसराम जिया जी तरजुमो कियिल ऐं भगवंती नावांणी जी गायल सुखमनी साहिब त अजु बि हज़ारे सिंधी घरन जी रोज़ानो ज़िंदगीअ जो हिसो आहे।
परसराम हीरानंद सचानन्दानी सिंधी अदब जो अकेलो अदीब आहे जहिं सां ट्रे ट्रे तखलुस राफतो रखन था संदस पहिरियों वापरियिल तखलुस हो “परसो” पर जडहिं 1936 में जिया साहिब जो पहिरियों किताब “गुलज़ार रंजोर ” छापियो त उन में “रंजोर ” तखलुस हो। अगते हली नामवर अदीब शेख मुराद अली काज़िम [जहिं खां परसराम जिया तरनुम बाबत सिखिया हासिल कयी] जी सलाह ते “जिया” [मतलब रोशनी] तखलुस जो वापर करण शुरू कियो।
मैट्रिक जो इम्तिहान पास करण खां पोय परसराम हीरानंद सचानन्दानी बतौर सिंधी टीचर कमु करण लगो हो पर संदस अदबी सफर जी शुरुआत त उन खां बि अगु थी चुकी हुयी छो जो जिया साहिब चोदहन सालन जी नंढी उमिर में ई नजमुं ऐं गीत लिखण शुरू करे छड़ियो हो। विरहांङें खां पोय परसराम जिया भारत अची उल्हासनगर में रहण लगो। थोरो अरसो प्रिटिंग प्रेस में बतौर कंपोजर कमु करण खां पोय हू सिंधी टीचर तौर कमु करण लगो।
परसराम जिया वडी कामियाबी सां इहो साबित कियो त इहो सोचिण त हिकु कामियाब अदीब थियण वास्ते वधीक पढ़ियिल हुअण ज़रूरी आहे हिक भरम खां सिवाय कुछ न आहे। हिक गालिह में हू खुशनसीब बि हो जो मुंबई जी फिल्म इंडस्ट्री जी वेझडायी में रहण सबब हुन जे गीत लिखण जे जुनून खे मोकन जी घटितायी कोन हुयी। कुछ मशहूर सिंधी फिल्म्स – अबाणा , लाड़ली, झूलेलाल, इंसाफ किथे आहे – कंवर राम ऐं राय डियाच आहिन जिन जा गीत जिया साहिब लिखिया हुआ। जे रिकॉर्डिंग जो हिसाब कजे त परसराम जिया जा हिक हज़ार खां बि वधीक गीत रिकॉर्ड थियिल आहिन।
उल्हासनगर में जिया साहिब जो पाडेसिरी हो संदन खास दोस्त ऐं साथी मास्तर चन्दर अगते हली इहा दोस्ती सेणपीअ में बदिलिजी छो जो परसराम जी धीउ [गोपी] ऐं मास्तर चन्दर जो पुट्र [गोप चन्दर] जी शादी थी। परसराम जिया जे पुट्र नारायण पहिरियूं त धंधो शुरू कियो पर जल्दु ई हू सिंधियत जी सेवा में लगी सिंधी बोली ऐं सिंधी साहित्य जे वाधारे वास्ते कमु करण लगो। नवन सिंधी लेखकन कविन खे वझु डियण जी मुराद सां हुन “जिया ” उनवान सां हिक माहवारी मैगज़ीन शुरू कयी ऐं ता हयाती [18 फरवरी 2003] इन कम में लगो रहियो।
परसराम जिया जे अदबी जुनून खे इन गालिह मां बि समझी सघिजे थो त संदस लिखियिल “आलाप जिया ” “गीत विरह जा ” ऐं “पैगामे जिया ” इहे किताब संदन मौत खां पोय छपजिया आहिन। लफजन जे जादूगर परसराम जिया खे गीत लिखण जी कुदरती दात हुयी चवन था हिकु भेरो हिक फिल्म प्रोडयूसर खे जिया साहिब सिर्फ अध किलाक जे अरसे में गीत लिखी डिनो हो। 47 सालन जी नंढी उमर में 28 अक्टूबर 1958 ते जिया साहिब जो स्वर्गवास थियो। सिंधी साहित्य हिन बेमिसाल फनकार खे श्रद्धांजली तौर उल्हासनगर म्युन्सिपल कारपोरेशन उल्हासनगर -३ में ओ टी सेक्शन में जिया साहिब जे घर जे पासे वारे रोड जो नालो “परसराम जिया रोड ” ऐं ओभर ओलह उल्हासनगर खे जोड़ीन्दड पुल जो नालो “परसराम जिया उड़ान पुल ” रखियो आहे।
अदबी योगदान - लिखियिल किताब
सिंधी फिल्म अबाणा जो गीत “दाल छोला डबल ” अजु बि माणुहुन खे याद आहे। सिंधी नज़म। गीतन खां सिवाय सिंधी साहित्य खे डिनिल अनमोल सूखड़ी आहे भगवत गीता, जपजी साहिब, सुखमनी साहिब, नाएं महिला जा सलोक ऐं कुछ बियन धार्मिक रचनाउन जो सिंधी बोली में तरजुमो। परसराम जिया जा लिखियिल कुछ किताब आहिन: –
गुलज़ार रंजोर
बाग़ बहार
आलाप जिया
पैगामे जिया
गीत विरह जा
Books Window
परसराम जिया - अवार्ड
हालांकि इहो सचु आहे त ट्रिन डहाकन जे अदबी सफर में अहिड़ा बेशुमार मोका आया जो देश विदेश जी अलग अलग सामाजिक तोड़े अदबी संस्थाउन जिया साहिब जो सत्कार कयो पर संदन पहिंजे हिसाब सां 1958 में भारत सरकार जे तैलीमी खाते पारां साहित्यिक योगदान वासिते डिनल अवार्ड सभ खां वधीक अहमियत वारो हुओ।
Famous and popular Sindhi folk singer Bhagwanti Navani is eventually immortal as she even after losing the physical existence still alive at hearts of thousands and thousands of Sindhi music lovers. Often called as Sindhi Koyel Bhagwanti was born on 01 Feb 1940 at Nasarpur. Undisputed queen of Singing Sindhi Lada (marriage ritual songs) Bhagwanti will always be remembered for singing Sukhamani Sahib (Guru Bani) in Sindhi. She also acted in Sindhi film Sindhua Je Kinare. On 22 Oct 1986 she left for heavenly abode.