पारु चावला

सिंधी साहितकारन मां जिन साहितकारन पहिंजी जवानी जी उमिर जी शुरुआति खां अगु (During teen age) देश जे विरहाङे ऐं भारत लडे अचण सबब सिंधियिन जी सठियल तकलीफुन ऐं मजबूरिन जो आजमूदो खुद महसूस कियो उनहन में हिकु खासु नालो आहे पारु ठाकुर चावला। खासु इनकरे जो पारु पहिंजे माता पिता जी पहिरियीं संतान हुयी ऐं पिता जे नोकरी करण सबब परिवार जी आरथिक हालत का वधीक आथत भरी कोन हुयी। नतीजो इहो थियो जो मैट्रिक जो इमतिहान पास कंदे ई परिवार जी आरथिक जवाबदारी संभालिण में पिता जी मदद करे पहिंजन छहन नंढन भाउरुन ऐं भेनिरुन जी पढ़िहायी जो खियाल रखण लगी।
पारु चावला जो जनम रेलवे में नोकरी करण वारे दीपचंद लालवानी जी पहिरियीं संतान जे रुप में 19 जुलाई 1932 ते सिंध (हाणे पाकिस्तान जो हिसो ) में थियो हुओ। माता पिता जी पहिरियीं संतान हुजण सबब परिवार जी पूरी पुनी आरथिक हालत खां पोय बि पारु जो बालपणो बेहद घणे लाड कोड ऐं संभाल लहण वारे माहोल में गुजिरियो शायद इहो ई कारण रहियो जो 1967 में पिता जे बेवकते सुरगवास पारु में नंढन भाउरुन ऐं भेनिरुन जी जवाबदारी जो अहसास कराये उनहन खे पिता जी कमी महसूस थियणु न डिनी।
पिता जे मोत खां अगु पारु हिक किसम सां नासतिक हुयी पर पिता जे मोत खेसि करम सां गडु नसीब जी अहमियत समझणु सेखारी। संदस लाडो जिंदगीअ जे धारमिक रुख तरफ कुझु वधीक मुडियो ऐं हुअ धन सिरी गुरु ग्रंथ साहिब जो पाठु करण लगी। इहो लाडो जलदु ई अटूट विशवास में बदिलिजी वियो ऐं पारुअ पिता जी वरसी ते गुरु ग्रन्थ साहिबन जे भोग साहिब ऐं शबद कीरतन जो सिलसिलो शुरू कियो। इहो सिलसिलो चयिन डहाकन खां बि वधीक अरसे तायीं हलंदो रहियो।
हकीकत में डिसजे त घर में ई गुरु गिरंथ साहिब जो पाठु शुरु करणु बि पारु खे पिता जी डिनल सिखिया सखतु मेहनत ऐं इमानदारी सां गडु पाण खे रुधियल (busy व्यस्त) रखण कामियाब थियण जी राह जी पहिरियीं ऐं बेहद अहमियत वारी मंजिल आहे। पिता जे विछोड़े जो दुख सहण जी ताकत हासिल करण जी मुराद सां शुरु किअल इहो पाठु करण जो सिलसिलो साहित सिरजन जा बिज पोखे वियो।
पिता जी मोत वांगुर सिंधी अदबी संसार में मशहूरी हासिल करण जी शुरुआति करण वारे ठाकुर चावला सां शादी ऐं पदम श्री सिंधियत शैदायी प्रो. राम पंजवानी सां मुलाकात पारु जी जीवन में नयीं बहार जी नयीं मुंद आणिण जहिड़ियूं गालिहियूं साबित थियूं। दादा राम पंजवानी जन खेसि न सिरफ सिंधी कलाम गायिण जो होसिलो डिनो पर सूफियत जे रंग वारियूं चौकियूं पेश करण वासिते बि हिमथायो। हिकु भेरो शुरु थियण खां पोय इहो पुठी वराये न डिसण वारो सिलसिलो साबित थियो। रिवायती तेलीम हासिल करण में गरीब साबित थियल ऐं गीत संगीत जी का सिखिया न हासिल करण वारी पारु चावला वकत जे थोरे अरसे में ई पहिंजी गायिकी वासिते हरदिल अजीज ऐं मशहूर थी वयी।
पारु चावला जिंदगीअ जी पंज रंगी जवाबदारिन जो लतुफु माणिण लगी। हिक औरत ऐं जाल जे रुप में घरु, हिक माउ जे रुप में बारन जी सिखिया संभाल जी जवाबदारी, हिक कवी, हिक लेखक ऐं हिक गायिका जे रुप में अदबी ऐं संगीत संसार जूं जवाबदारियूं। पारु घणो कामियाब थी इन वासिते इहो ई काफी आहे त पहिंजे समे में हुअ अकेली हुयी जेका सिंधी अदब जी तिरमूरती शाह सचल ऐं सामी जूं रचनाउं हिक ई वकत ते ऐं हिक जेतिरी कमालियत (perfectness) सां पेश करे सघण जी सलाहियत रखंदी हुयी।
सिंधी अदबी संसार जी बेमिसाल शखसियत ऐं हिक लाजवाब शानदार ऐं जवाबदारी भरियो पर सादो जीवन जियण वारी पारु चावला जो 14 अगस्त 2016 ते सुरगवासु थियो।